MOP Orienta Hahú Halo Rekonstrusaun Ba Estrada Monu Iha Embaixada Japaun Oin

MOP Orienta Hahú Halo Rekonstrusaun Ba Estrada Monu Iha Embaixada Japaun Oin

DILI, 20 ABRIL 2021: S. Exa, Ministériu Obras Públikas (MOP), Arq. Salvador Eugénio Soares dos Reis Pires, orienta Diresaun Jerál Obras Públikas (DJOP) liuhosi Diresaun Nasionál Estrada Ponte no Kontrolu Seias (DNEPCC) servisu hamutuk ho kompañia ajudikadu hahú halo rekonstrusaun permanente ba estrada monu iha embaixada Japaun oin, Kampung Alor, Dili, ne’ebé afeita husi inundasaun loron 04 Abril 2021.

Bazeia ba despaxu husi S. Exa, Primeiru Ministru (PM), Sr. Taur Matan Ruak, ho nú. 46/PM/IV/2021 hodi forma ekipa Task Force (husi Ministériu Planu no Ordenamentu - MPO & MOP) halo identifikasaun no kuantifikasaun ba estragus sira infraestrutura nian iha kapitál Dili no munisípiu sira kauza husi dezastre naturál 04 Abril 2021.

Nune’e, ekipa Task Force halo verifikasaun ba estragus sira liuliu estrada monu iha embaixada Japaun oin, no nota katak estrada ne’e protokolu no presiza halo rekonstrusaun emerjénsia ka urjente hodi fasilita movimentasaun transporte no komunidade iha área refere, nune’e ekipa Task Force prepara estudu no dezeñu, inklui delibera ona iha Konsellu Administrasaun Fundu Infraestrutura (KAFI) iha loron 19 fulan-Abril 2021 mak Ministériu Obras Públikas hanesan ajénsia implementadór ho finansiamentu liña ministeriál ohin loron 20 Abril 2021 iservisu ho empreza ajudikadu hahú desloka ekipamentu pezadu ba iha tereñu halo servisu rekonstrusaun permanente ba estrada refere.

Inísiu servisu husi Kompañia ajudikadu Montana Diak iha fatin refere akompaña direita husi Diretór Nasionál DNEPCC, Sr. João Gama, no tékniku sira hodi orienta kompaña serisu tuir estudu no dezeñu ne’ebé iha.

#Media_MOP