MOP Orienta EDTL Normaliza Enérjia Eletrisidade No BTL Atu Firnese Bee-Moos Ba Komunidade Beduku To’o Kasnafar

MOP Orienta EDTL Normaliza Enérjia Eletrisidade No BTL Atu Firnese Bee-Moos Ba Komunidade Beduku To’o Kasnafar

DILI, 11 ABRIL 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, orienta Prezidente Eletrisidade Timor-Leste (EDTL, E.P), Sr. Paulo da Silva, atu normaliza hikas enérjia eletrisidade ba komunidade no Prezidente Bee Timor-Leste (BTL,E.P), Sr. Carlos Peloi dos Reis, atu kontinua fornese bee-moos ba komunidade afeitadu inundasaun 04 Abril 2021 iha área Beduku to’o Kasnafar.

“Prezidente, ha’u hakarak ita-boot sira hadi’a tiha liña eletrisidade ne’e, no BTL kontinua monta Tanki iha ne’e par abele fornese bee-moos ba komunidade,”Sr. Ministru orienta bainhira halo observasaun ba kondisaun infraestrutura ne’ebé hetan estragus iha Beduku to’o Kasnafar iha Domingu loraik ne’e.

Prezidente EDTL, E.P, Sr. Paulo sa Silva, konfirma katak estrada alternativu iha ona, EDTL sei koloka ekipa ho ekipamentu hodi hdi’a no halo manutensaun ba liña enérjia eletrisidade ne’ebé hetan estragu grave husi inundasaun.

Nune’e mós, BTL sei koloka Tanki públiku iha área Beduku no Kasnafar hodi nune’e komunidade sira bele asesu ba bee-moos.

Atu informa katak, hafoin inundasaun iha loron 04 Abril 2021, ekipa tékniku EDTL,E.P no BTL,E.P servisu no halo esforsu maka’as hodi normaliza enérjia eletrisidade no fornese bee-moos ba komunidade afeitadu inundasaun tula no ense de’it ba Tanki públiku sira, tanba maioria sistema bee-moos hetan estragus hotu.

Ministériu Obras Públikas lihosi instituisaun tutela hanesan EDTL,E.P, BTL,E.P no Institutu Jestaun Ekipamentus (IJE) hamutuk ho Diresaun Jerál Obras Públikas (DJOP) kontinua halo identifikasaun ba estragus no halo normalizasaun emerjénsia ba infraestrutura estragus iha kapitál Dili no munisípiu sira.

Atividade Observasaun ne’e, Sr. Ministru Obras Públikas akompaña husi Diretór Jerál Administrasaun no Finansas (GJAF), Sr. Januário Barbosa, Prezidente Bee Timor-Leste Empreza Públika (BTL.E.P), Sr. Carlos Peloi dos Reis, Prezidente Eletrisidade Timor-Leste Empreza Públika (EDTL,E.P), Sr. Paulo da Silva, Prezidente Institutu Jestaun Ekipamentus (IJE), Sr.a Hermenegilda da Costa Laurentina, inklui tékniku sira.

#Media_MOP