MOP Apela Labele Sukat Rasik Projetu Estrada no Eletrisidade

MOP Apela Labele Sukat Rasik Projetu Estrada no Eletrisidade

Dili, Tersa, 21 Agostu 2018: S. Exa, Ministru Obras Públikas (MOP), Salvador Eugénio Soares dos Reis Pires, apela ba ema hotu liuliu emprejáriu sira hodi labele sukat ka dezenvolve rasik projeitu estrada no eletrisidade.

Orientasaun polítika Governu Konstitusionál da-ualu (VIII) lideradu, Sr. Taur Matan Ruak, mak projeitu hotu governu mak tau iha prioridade, governu mak identifika no governu mak dezenvolve no halo aprovizionamentu ba projeitu sira.

“Kazu balun mak hanesan kompañia balun halo projeitu laiha koñesimentu governu nian no governu ida-ne’e apelu ba ema hotu-hotu katak projeitu só promovidu ou dezenvolvidu husi governu, governu mak sei promove projeitu, la’os ema individu ida arbitrariamente sukat estrada, sukat ponte no sukat eletrisidade, governu sei la premite ida-ne’e atu akontese. Governu mak tau prioridades, governu mak identifika prioridades, governu mak dezenvolve projeitu, no aprovizionamentu ba projeitu sira ne’e, ne’ebé laiha oportunidade ba kompañia ba sukat tiha, halo dezeiñu, hatama proposta mai husu kontratu, ne’e sei la kontratu. Ne’e la’os ministru nia hanoin maibé ne’e orientasaun polítika husi Primeiru Ministru Governu Konstitusionál da-ualu (VIII) nian, tanba ne’e, ha’u apelu ba ita-nia emprejáriu sira, ita-nia povu liuliu ita-nia apa-ama veteranu sira para atu koopera ho Governu sentrál,” S. Exa, Ministru, Arq. Salvador Eugénio Soares dos Reis Pires, ba jornalista husi jornál INDEPENDENTE iha edifísiu MOP, Kaikoli, Dili.

Kona-ba kualidade projeitu, Ministru Obras Públikas, afirma daudauk ne’e governu tau ona osan ba projeitu sira ne’ebé tama iha kontratu, maibé, bainhira governu atu selu, ekipa inspesaun halo inspesaun bazeia ba kontratu, karik hetan faillansu ruma, entaun governu tenke fó sansaun ba kompañia hanesan la selu, to’o kompañia sira hadi’a faillansu ne’ebé iha.

Ba projeitu sira ne’ebé hotu ona no iha hela príodu retensaun mós governu sei la selu hotu osan retensaun nian, bainhira hetan faillansu ruma, kompañia tenke toma nia responsabilidade, depois mak governu selu tuir inspesaun no kontratu ne’ebé iha.

Aliende ne’e, intervista mós kona-ba dívidas husi kompañia fornesedór kombustível ba sentrál eletrisidade Hera no Betano.

Ministru Obras Públikas garante katak ahi eletrisidade sei la mate no tenta jere para evita dívidas iha ministériu.

 

Ministériu Obras Públikas

#Media_MOP