MOP Akompaña PM Identifika Estrada No Ponte Ne’ebé Hetan Estragus Husi Inundasaun

MOP Akompaña PM Identifika Estrada No Ponte Ne’ebé Hetan Estragus Husi Inundasaun

DILI, 06 ABRIL 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña S. Exa, Primeiru Ministru (PM), SR. Taur Matan Ruak, no S. Exa, Vise Primeiru Ministru no Ministru Planu no Ordenamentu (V-PM no MPO), Sr. José Reis, hodi halo identifikasaun ba estrada no ponte ne’ebé hetan estragus afeita husi inundasaun, 04 fulan-Abril 2021.

Identifikasaun ba estragus husi infraestrutura bázika ne’e hala’o hahú husi estragus estrada ne’ebé kotu iha área embaixada Japaun nia oin, kontinua hala’o identifikasaun ba estragus iha ponte Kumoro liuliu estrada mota ninin ne’ebé kotu kauza sobu husi mota. Hafoin ne’e kontinua kedas halo identifikasaun ba iha Manleu Beduku hodi identifika estrada diresaun Manleuanna ba munisípiu Aileu ne’ebé estraga no kotu totál.

Aliende ne’e, kontinua halo identifikasaun ba estrada ne’ebé kotu iha área Aimutin, Estrada liga Perumnas ba Ailok-Laran ne’ebé kotu totál, inklui iha área mota Maloa ne’ebé sobu estrada mota ninin kotu totál tanba sobu husi mota Maloa. Hafoin identifika iha Maloa, Sr. Ministru akompaña Sr. Primeiru Ministru identifika estrada ne’ebé kotu iha área Bidau Toko Baru mota ninin liga ba Bekora Merkadu, no kontinua kedas hala’o identifikasaun ba estragus iha área Ponte Bekora Terminál ne’ebé nakonu ho sedimentasaun.

Sr. Ministru mós akompaña Sr. Primeiru Ministru halo identifikasaun ba estrada nakfera kauza husi rai-halai iha Fatuhai, inklui identifika estragus balun iha Hera. Sr. Primeiru Ministru kontinua akompaña husi membru Governu sira halo identifikasaun ba área Ponte Bekussi nian ne’ebé durante tempu udan sempre hamosu inundasaun ba komunidade sira tanba ponte refere la konsege absorve mota bainhira mota-tuun, inklui halo observasaun área afeitadu sira seluk.

Bainhira halo identifikasaun ba área afeitadu sira, Sr. Primeiru Ministru orienta S. Exa, Vise Primeiru Ministru no Ministru Planu no Ordenamentu (V-PM no MPO), Sr, José Reis, S. Exa, Ministru Obras Públikas (MOP), Arq. Salvador Eugénio Soares dos Reis Pires, no Ajénsia Dezenvolvimentu Nasionál (ADN), Diresaun Jerál Obras Públikas (DJOP) no Institutu Jestaun Ekipamentus (IJE) hahú halo atendimentu emerjénsia, rekolla dadus no dezeñu ba implementasaun projetu emerjénsia liuliu estrada no ponte ne’ebé hetan estragus totál.

Daudauk ne’e, ekipamentu pezadu husi IJE destaka ona iha fatin inundasaun sira hodi halo normalizasaun ba mota no hasai sedimentasaun, inklui apoiu husi kompañia sira ba normalizasaun mota ne’ebé hetan estragus.

#Media_MOP