Konsellu Ministru Altera Rejime Jurídiku Aprovizionamentu Simplifika
Tratamitasaun Espesiál
DILI, 14 ABRIL 2021: S. Exa, Ministru Obras Publikas
(MOP), Arq. Salvador Eugénio Soares dos Reis Pires, partisipa iha reuniaun
Konsellu Ministru ne'ebé lidera husi S. Exa, Primeiru Ministru (PM), Sr. Taur
Matan Ruak, iha Palasiu Governu, Dili.
Iha reuniaun Konsellu Ministrus ne'e aprova ona projetu
Rezolusaun Governu nian, ne’ebé aprezenta husi S. Exa, Ministra Negósiu
Estranjeiru, Sra. Adaljiza Magno, kona-ba aprovasaun ba kandidatura Timor-Leste
hanesan membru Konsellu Direitu Umanu nian husi Organizasaun Nasoins Unidas
(ONU), ba períodu tinan 2024 ba 2026.
Konsellu Direitu Umanu sira iha membru hamutuk 47, eleitu
liuhusi maioria Estadu Asembleia Jerál ONU nian ba mandatu tinan tolu, país
sira seluk mantein estatutu observadór sira. Distribuisaun husi asentu sira sei
halo tuir aprezentasaun jeográfika ekuitativa nian (Grupu 13 husi País
Afrikanu, Grupu 13 husi País sira Aziátiku, Grupu hitu husi País sira Leste
Europeu, Grupu ualu husi País sira Amérika Latina, no husi Karaíbas, no Grupu
hitu husi País sira Europa Osidentál no Sira seluk).
Halo mós aprovasaun, ho alterasaun, ba Projetu
Dekretu-Lei, kona-ba alterasaun dahituk ba Dekretu-Lei n. 10/2005, loron 21 fulan-novembru,
ne’ebé prova Rejime Jurídiku Aprovizionamentu nian, ho objetiva atu simplifika
tramitasaun espesiál husi ajusta diretu urjente.
Ho Dekretu-Lei ida-ne’e, halo introdusaun husi regra foun
ba tramitasaun husi prosedimentu ajustu diretu kompras emerjénsia nian, tuir
akontesimentu ne’ebé labele prevee hodi tau risku iha saúde públika no
seguransa nian, ka bainhira eziste nesesidade urjente ida, labele prevee no la
provoka benefisiáriu aprovizionamentu nian kona-ba obra, beins ka servisu sira,
ne’ebé la’ós fasil prátiku hodi hahú prosedimentu sira husi konkursu ka kualkér
métodu sira seluk aprovizionamentu, ka karik deklarasaun ofisiál husi
katástrofe ka situasaun emerjénsia nian, ne’ebé tau nesesidade hodi halo
servisu ho obra ka hodi fornese beins ka simu servisu sira hodi evita lakon
moris, no lakon propriedade sira Governu nian, ka ezijénsia sira seluk ne’ebé
obriga asaun urjente iha interese públiku.
Nune’e, iha kazu sira-ne’e, hodi permite katak órgaun
kompetente hodi asina kontratu atubele pratika atus prosedimentu
aprovizionamentu no selebra kontratu sein kualkér formalidade sira. Maske
kontratu ne’e prodús efeitu imediatu, atus aprovizionamentu no kontratu sira
tenke redús eskritu iha prazu másimu loron 60. Kazu sira ne’e la presiza
autorizasaun no aprovasaun no kabimentasaun sei asegura to’o momentu redusaun
eskritu kontratu nian.
Bainhira trata kontratu sira ezekusaun obra nian, presu
ne’e sei determina husi aplikasaun valór umanitáriu sira ne’ebé prevee iha
Diploma Ministeriál Konjunta husi Governu ne’ebé responsabiliza husi obras
públikas no husi planu no ordenamentu.
Diploma refere iha ámbitu deklarasaun estadu de sítiu ka
estadu emerjénsia, nune’e mós deklarasaun husi situasaun alerta, kontinjénsia
ka kalamidade, bele utiliza prosedimentu aprovizionamentu husi solisitasaun
husi kotasaun sira, independentemente husi valór, ba adjudikasaun kontratu sira
ho kontrapartida iha despeza kategoria husi beins no servisu sira, iha
sirkunstánsia espesífika sira.
Hafoin halo analiza ba aprezentasaun husi pontu situasaun
epidemiolójika país nian, husi Sala Situasaun Sentru Integradu Jestaun Krize,
Konsellu Ministrus aprova ona projetu sira Rezolusaun Governu nian, ba
kontinuasaun husi impozisaun serka sanitária iha Munisípiu Dili, Baukau no
Vikeke to’o loron 2 fulan-maiu. Halo mós aprovasaun ba projetu Rezolusaun
Governu nian ba impozisaun serka sanitária iha Munisípiu Ermera, Kovalima no
Ainaru to’o loron 2 fulan-maiu. Nune’e, bandu sirkulasaun ema nian entre
munisípiu sira-ne’e no divizaun administrativa sira seluk, exetu iha kazu sira
ne’ebé ho fundamentu forte tanba razaun sira hanesan seguransa públika, saúde
públika, asisténsia umanitária, manutensaun sistema sira abastesimentu públiku
ka ba realizasaun interese públiku nian.
Aprova ona mós alterasaun dahuluk husi Dekretu Governu N.
12/202, loron 1 fulan-abril, kona-ba medida sira ezekusaun husi deklarasaun
estadu emerjénsia nian ne’ebé efetua husi Dekretu Prezidente Repúblika
N.17/2021, loron 31 fulan-marsu, kona-ba regra sira kuarentena ba pesoál ajuda
umanitária nian.
S. Exa, Ministra Saúde, Sra. Odete Maria Freitas Belo,
halo ona aprezentasaun ba Konsellu Ministrus kona-ba progresu kampaña
vasinasaun kontra COVID-19 nian. Husi loron 7 fulan-abril, vasina rihun 24 maka
to’o ona iha Timor-Leste, halo ona vasina hamutuk 2 907, husi númeru
hirak-ne’e, hamutuk feto 887 no mane hamutuk 1 742 maka simu vasinasaun. Vasina
ona mós ba profisionál saúde hamutuk 1 619 no profisionál sira seluk husi liña
frente nian hamutuk 1 010.
Ministra Saúde halo mós aprezentasaun kona-ba rezultadu
sira husi teste variante sira SARS-CoV-2 nian ne’ebé iha país, ne’ebé analiza
ona iha Austrália. Rezultadu barak maka hetan iha amostra 70 ne’ebé analiza ona
hatudu padraun hanesan ba ida-ne’ebé deteta ona iha país sira seluk iha rejiaun
nian no deteta ona kazu variante ida husi Reinu Unidu (B.1.1.7), kona-ba
pasiente ida-ne’ebé iha hela izolamentu profilátiku bainhira deteta ona, iha
loron 27 fulan-dezembru tinan 2020 no la provoka kontájiu sira. La deteta kazu
variante sira iha Áfrika Súl (B.1.351) no husi Brazíl (P.1). Sei haruka iha
aviaun tuirmai amostra liu 246 hodi bele halo analiza.
S. Exa, Ministru Administrasaun Estatál, Sr. Miguel
Pereira de Carvalho no S. Exa, Sekretáriu Estadu Protesaun Sivíl, Sr. Joaquim
José Gusmão dos Reis Martins, halo ona aprezentasaun ba Konsellu Ministrus
kona-ba pontu situasaun husi impaktu inundasaun iha loron 4 fulan-abril
tinan2021, ne’ebé provoka husi siklone tropikál Seroja no medida sira apoiu
nian ne’ebé implementa ona. Tuir dadus hirak ne’ebé aprezenta iha sorumutuk,
inundasaun provoka ema mate hamutuk 35 (ruanulu husi Dili, na’in neen husi
Ainaru, na’in tolu iha Vikeke, na’in rua iha Kovalima, na’in rua iha Manatutu,
no na’in ida iha Aileu no na’in ida iha Baukau) no sanulu maka lakon (na’in
haat iha Ainaru, na’in haat iha Manatutu no na’in rua iha Dili). Família liu
rihun 25 iha país maka afeta husi inundasaun no hela-fatin 4 546 maka aat ka
hetan estragu. Iha nivel infraestrutura públika sira, Siklone Tropikál Seroja
estraga ona estrada 22 no ponte 11. Iha Dili, daudaun ne’e, ema 11 104 maka
hela iha sentru ativu 38 iha Dili. Husi totál família hamutuk 8 548 mak afeta
husi inundasaun sira iha sidade Dili, Governu fahe ona, to’o loron 11
fulan-abril, apoiu ona ba hamutuk família 1 396, ne’ebé planeia hela no hala’o
hela to’o loron 18 fulan-abril, hodi fahe ba família sira seluk. Ohin entrega
apoiu iha Manatutu. Aban sei iha Vikeke no iha loron 16 fulan-abril sei entrega
apoiu iha Munisípiu Ermera no Aileu.
S. Exa, Ministru Transporte no Komunikasaun, Sr. José
Agustinho da Silva, aprezenta ona opsaun polítiku-lejizlativa subjasente sira
ba projetu kona-ba regulasaun husi organizasaun serbisu sira inspesaun ró no
embarkasaun sira. Aprezentasaun ne’e ho objetivu atu analiza preliminár husi opsaun
sira polítiku-lejizlativa nian ba estabelesimentu husi norma sira no ba
prosedimentu rejistu no ba servisu sira inspesaun husi utilizasaun ró no
embarkasaun nasionál sira, tuir padraun internasionál sira seguransa marítima
no protesaun ambiente tasi nian.
Ikusliu, S. Exa, Ministru Finansas, Sr. Rui Augusto
Gomes, halo ona aprezentasaun preliminár ida ba Konsellu Ministrus kona-ba
proposta ida segmentasaun husi Fundu Mina-rai nian, ne’ebé fahe fundu iha parte
rua, ida ba ativu likidés aas no ida seluk ba investimentu ba prazu naruk.
0 Comments:
Posting Komentar