Estabelese Ona CPV No Kontratu, Montana Diak Iha Kapasidade Halo Rekoperasaun Permanente Ba Estrada Iha Embaixada Japaun Oin

Estabelese Ona CPV No Kontratu, Montana Diak Iha Kapasidade Halo Rekoperasaun Permanente Ba Estrada Iha Embaixada Japaun Oin

DILI, 21 ABRIL 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete kompañia Montana Diak hahú halo rekonstrusaun permanente ba estrada monu iha embaixada Japaun oin tanba Konsellu Administrasaun Fundu Infraestrutura (KAFI) aprova ona kustu hamutuk rihun $314, nune’e ekipa tarefa infraestrutura nian rekomenda no kria ona Kompromissu ba Pagamentu Voucher (Commitment Payment Voucher - CPV) no kontratu ba projetu emerjénsia refere.

“Horseik iha KAFI aprova ona tipu de konstrusaun no kustu ne’ebé mak iha rihun $314, tanba problema finansiamentu iha KAFI ne’ebé ita hein hela prosesu orsamentu ne’e rasik (retifikativu) ne’ebé la’o hela. Iha liña ministériu iha osan oituan através liña ministeriál ami ezekuta desizaun ne’ebé iha, ohin (21/04/2021) ita-boot sira haree, iha ekipa ne’e tuir despaxu sira mak halo rekomendasaun kompañia sira ne’ebé mak iha kapasidade finanséiru, tékniku no esperiénsia para bele ezekuta obra emérjensia ne’e ho lalais no bazeia ba rekomendasaun ekipa de tarefa infraestrutura. Ohin ita iha manán na’in ida mak Montana Diak ne’ebé ekipa ne’e rekomenda mai no Graças a Deus katak kriasaun CPV no kontratu ohin ita estabelese ona no ohin nia hahú obra ne’e, espera katak loron ida, rua ka semana ida ita bele rekopera fali movimentasaun tráfiku husi seksaun estrada ida-ne’e,”Sr. Ministru Obras Públika informa ba jornalista sira iha embaixada Japaun oin, Kampung Alor, hafoin akompaña S. Exa, Primeiru Ministru (PM), Sr. Taur Matan Ruak, observa servisu rekonstrusaun ba estrada refere.

Bazeia ba despaxu husi S. Exa, Primeiru Ministru (PM), Sr. Taur Matan Ruak, ho nú. 46/PM/IV/2021 hodi forma ekipa Task Force halo identifikasaun no kuantifikasaun ba estragus sira infraestrutura nian iha kapitál Dili no munisípiu sira kauza husi dezastre naturál 04 Abril 2021. Iha ekipa rua, ida mak responde ba kesaun umanidade, no ida fali mak liga ba infraestrutura ne’ebé konstitui husi Ministériu Planu no Ordenamentu (MPO) no MOP ho ajénsia sira hanesan Ajénsia Nasionál Dezenvolvimentu (AND), Grande Projetu, Komisaun Nasionál Aprovizionamentu (CNA), Diresaun Jerál Obras Públikas, Bee Timor-Leste (BTL,E.P), ho Eletrisidade Timor-Leste (EDTL,E.P).

Esforsu ne’ebé Governu halo mak normalizasaun no hasai sedimentasaun sira iha mota, liuliu seksaun estrada sira ne’ebé prinsipál iha Bairru liga ho povu nia moris. Kona-ba estrada monu iha embaixada Japaun oin kauza husi inundasaun 04 Abril 2021 ne’e fó biban ba ekipa tékniku sira halo dezeñu hodi responde ba estragus sira, no konstrusaun ne’ebé halo ne’e fiksu nune’e ekipa tékniku lori tempu oituan hodi deskuti dezeñu inklui kestaun tékniku no tipu konstrusaun ba estrada iha área refere.

“Montante tuir rekomendasaun ne’ebé mak aprova husi KAFI no ekipa tékniku sira hamutuk rihun $314 ba seksaun estrada ho tipu konstrusaun sira bolu dehan Asphalt concrete ne’ebé tau fatuk, pois rai-henek, depois mak tau alkatraun no mós bareira retensaun ne’ebé satan invazaun tasi-been bainhira tasi-been sa’e. Ne’e obra emerjénsia, se lais liu ne’e di’ak liután, hanoin katak ita fó tempu badak para sira bele ezekuta,”Sr. Ministru esplika.

Sr. Ministru Obras Públikas haktuir, hafoin inundasaun iha loron 4 fulan-Abril, iha loron 5 fulan-Abril, S. Exa, Primeiru Ministru (PM), Sr. Taur Matan Ruak, S. Exa, Vise Primeiru Ministru no Ministru Planu no Ordenamentu (V-PM no MPO), Sr. José Reis, akompaña husi Sr. Ministru Obras Públikas ho ekipa tékniku sira halo observasaun ba estragus iha fatin refere, no Xefe Governu orienta tenke halo rekonstrusaun permanente tanba estrada ne’e estrada prinsipál.

Aliende ne’e, tanba inundasaun 4 Abril hamosu estragus iha fatin barak nune’e Governu esforsu halo normalizasaun, hasai sedimentasaun no halo limpeza hodi fó tempu ba ekipa tékniku tarefa infraestrutura nian halo análiza no dezeñu, nune’e lori tempu oituan hodi halo rekonstrusaun fiksu, no iha loron 20 Abril 2021 hahú halo rekonstrusaun permanente ba estrada refere.

Durante observasaun Xefe Governu nian iha tereñu akompaña mós husi Prezidente IJE, Sra. Hermenegilda da C. Laurentina, diretór no tékniku sira husi Ministériu Planu Ordenamentu (MPO) no MOP.

#Media_MOP