Alterasaun Orsamentu MOP Aprovadu Iha Debate Espesialidade Ho Votus 42

Alterasaun Orsamentu MOP Aprovadu Iha Debate Espesialidade Ho Votus 42

DILI, 22 ABRIL 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa loron daruak iha diskusaun ba Orsamentu Retifikativu ba alterasaun lei Orsamentu Jerál Estadu (OJE) 2021 iha uma fukun Parlamentu Nasionál (PN).

Iha debate loron daruak ne’e Ministériu Obras Públikas hetan proposta rua husi deputadu sira mak proposta 39 no 40 ba alterasaun iha Orsamentu Retifikativu. Husi proposta rua ne’e, iha votasaun proposta 40 pasa ho votus afavór 39, kontra 0 no abstensaun 22, inklui deputadu prezente ida la vota, nune’e proposta 40 pasa. Proposta 39 lapasa ho votus afavór 23, kontra 39 no abstensaun 1, nune’e proposta 39 la pasa.

Hafoin halo votasaun ba proposta husi ministériu sira, S. Exa, Prezidente Parlamentu Nasionál (PN), Sr. Aniceto Guterres, pronúnsia hodi halo aprovasaun ba orsamentu liña ministériu ne’ebé sobre alterasaun iha orsamentu ratifikativu ne’e.

“Tuir mai ita aprova kedas lai liña ministeriais ne’ebé nia orsamentu sofre alterasaun ho ratifikativu ida-ne’e, no alterasaun ne’e presiza aprova. Rezultadu votasaun, afavór 42, kontra 0, absentaun 20, alterasaun orsamentais ba ministériu Obras Públikas aprovadu,”Sr. Prezidente PN pronunsia.

Antes halo votasaun ba proposta 39 no 40, inklui halo aprovasaun ba orsamentu liña ministériu, Sekretaria Mesa PN, deputada, Lídia Norberta dos Santos Martins, pronúnsia uluk kona-ba proposta alterasaun 39 no 40. Proposta alterasaun 39 mak atu hasai tan orsamentu husi Ministériu Obras Públikas nian hodi tau ba iha órgaun fundu COVID-19, ba prevensaun no mitigasaun surtu COVID-19, maibé Governu defende katak orsamentu ne’e koloka mós ba Empreza Públika tutela sira hanesan Bee Timor-Leste (BTL) no Eletrisidade Timor-Leste (EDTL) tanba ne’e Governu la konkorda atu hasai orsamentu ne’e hodi tau ba fundu COVID-19 nian.

“Proposta alterasaun númeru 40, iha anexu tabela 3, despeza ba órgaun servisu administrasaun sentrál, tipu do Ministériu Obras Públikas iha kategoria despeza Kapitál Dezenvolvimentu, programa 548 Dezenvolvimentu Konstrusaun, Rehabilitasaun, Manutensaun no Jestaun Estrada, Ponte no Kontrolu Seias. Dotasaun inisiál millaun $15,046 mill, alterasaun sei hasai millaun 3,762 mill dotasaun finál da kategoria millaun $11,284 mill. Dotasaun inisiál husi totál ba kategoria despeza millaun 22,167 mill, dotasaun finál husi totál ba kategoria despeza millaun $18,406 mill sei tau ba iha dotasaun ba Tudo Governu iha kategoria Bens no Servisu iha programa 148 kontijénsia. Dotasaun inisiál ba kategoria millaun $18, 163 mill alterasaun aumenta tan millaun 3, 762 mill, dotasaun finál husi kategoria millaun 22,924 mill. Dotasaun inisiál husi totál kategoria despeza millaun $44,562 mill, dotasaun finál husi totál kategoria despeza millaun $48,324 mill,” Sekretaria Mesa PN, deputada, Lídia Norberta dos Santos Martins, pronunsia proposta alterasaun númeru 40.

#Media_MOP