DILI, 19 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Administeativu Fundu Infraestrutura (KAFI) iha Palásiu Governu, hodi analiza medidas prevensaun no rehabilitadaun iha zona sira ne'ebé afeitada husi inundasaun ne'ebé akontese iha loron 13 fulan-Marsu tinan 2020.
Grupu Tékniku Traballu iha Kinta-feira ne'e aprezenta ba KAFI, lista detallada kona-ba medida urjente no nesesáriu hodi halo atendimentu emerjénsia ba estragus liuliu kontrusaun ba moru protesaun iha área afeitadu sira.
Objetivu intervensaun husi Grupu Traballu ne'e mak halo normalizasaun ba área afeitadu, kontinua fornese enérjia eletrisidade ho di'ak, garante no halo reparasaun ba sistema kanalizasaun bee-moos.
Aliende ne'e, servisu urjente hodi halo limpeza ba drenajen sira, halo normalizasaun ba mota, inklui konstrusaun ba moru protesaun sira hodi evita iha époka ida-ne'e labele akontese tan inundasaun.
Durante reuniaun, halo mós analizasaun detalladamente kona-ba intervensaun nesesáriu relasiona ho karakterístika projetu emerjénsia ne'ebé sei realiza. KAFI halo avaliasaun tuir legalidade iha prosesu aprovizionamentu. Projetu sira ne'e hetan ona aprovadu no sei finánsia iha ámbitu Fundu Infraestrutura nian.
Hafoin inundasaun, ekipamentu pezadu husi Institutu Jestaun Ekipamentus (IGE) halo kedas intervensaun hasai sedimentasaun hodi normaliza mota, no hetan mós apoiu husi emprejáriu lokál sira, nune'e mós halo limpeza hodi hamoos iha área afeitadu ba inundasaun. Sekretáriu Estadu Protesaun Sivíl (SEPS) fó mós apoiu emerjénsia hodi distribui nesesidade báziku ba vítima sira ne'ebé afeitadu husi inundasaun.
Grupu traballu ne'e lidera husi Diretór Jerál Obras Públikas (DGOP) partisipa mós husi Ajénsia Dezenvolvimentu Nasionál (ADN), Diretór Jerál Água no Saneamentu (DGAS), IGE.IP. no Komisaun Nasionál Aprovizionamentu (CNA).
Reuniaun ne'e partisipa husi S. Exa, Ministru do Planeamentu no Investimentu Estratéjiku (MPIE) iha ezersísiu, Sr. Fidelis Manuel Leite Magalhães, S. Exa, Ministra Finansas (MF) iha ezersísiu, Sra. Sara Lobo Brites, S. Exa, Ministru Obras Públikas (MOP), Arq. Salvador Eugénio Soares dos Reis Pires, S. Exa, Ministru Transporte no Komunikasaun (MTK), Sr. José Agustinho da Silva, Diretór ba Secretariadu Grandes Projetos (SGP), Sr. Krispim Fernandes, Diretór Jerál ADN, Sr. Samuel Marçal, Diretór Jerál CNA, Sr. Aniceto do Rosário, Diretór Jerál DGAS, Sr. Gustavo da Cruz, Diretora Jerál Eletricidade (DGE), Sra. Arlinda Miranda, Diretór Jerál DGOP, Sr. Rui Guterres, tékniku husi MF no asesór legál sira.
0 Comments:
Posting Komentar