DILI, 15 ABRIL 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete Governu husi MOP liuhosi Diresaun Jerál Eletrisidade Timor-Leste (DG-EDTL) ho operadór telekomunikasaun sira sei fornese ka halo transferénsia pulsa EDTL to'o loron 26 fulan-Abril 2020, loron perdiódu Estadu Emerjénsia ne'e termina.
"Ita sei iha anúnsiu ba públiku tanba ne'e válidu até 26 Abril periódu Estadu Emerjénsia nian, see mak seidauk sms bele sms para hetan tanba ne'e válidu to'o 26. Ita-nia extensaun ne'e depende ba gravidade dekretu Governu, extende halo nusa depois ita haree fali ba oin halo nusa. Agora ita-nia polítika subsídiu ne'e durante estadu emerjénsia to'o 26 Abril, see Governu deside 26 laiha ona, taun laiha ona, se extende ou expanda tan mak Ministru sei halo fali despaxu foun atu tetu kona-ba ida-ne'e," Sr. Ministru Obras Públikas, Salvador Eugénio Soares dos Reis Pires, informa ba jornalista iha CCD-Dili, hafoin partisipa iha reuniaun Konsellu Miniatru.
Númeru prepagu ne'ebé entrega ba operadór telekomunikasaun ne'e númeru token la'os osan, tanba ne'e, Sr. Ministru esplika, karik to'o loron ne'ebé determina mak kliente balun seidauk manda númeru kontadór prepagu mak sistema sei konsidera katak prepagu ne'e la foti ona.
"Se laiha (see la manda mensajen) ne'e ita kontabilidade katak la foti, tanba iha ne'e subsídiu naun finanséiru, tanba ita transforma de'it rendimentu ne'e sai fali despeza para kontabilidade ita sura ba osan hira ne'e vezes $15dollares depois ita haree nain hira mak foti ona, maibé subsídiu ne'e ekivalente ho despeza hira, maibé ida-ne'e naun finanséiru transforma de'it reseitas ba sai despeza,"Sr. Ministru esplika.
Daudauk ne'e kliente hamutuk 114.000 resik mak asesu ona hodi hetan subsídiu prepagu EDTL nian. Dadus ne'ebé MOP simu ona ne'e husi operadór telekomunikasaun TT no Telemor no seidauk simu dadus husi Telekomsel.
"TT (Timor Telekom) ativu iha Domingu, Segunda loraik sira fó relatóriu númeru prepagu ne'ebé sms susesu hetan subsídiu ne'e iha 37.000 resin, ohin ha'u hetan fali telemor nian 77. 000. Ha'u hein hela Telkomsel nian seidauk mai, ne'ebé ita pruvolta 100.000 resin ona ne'ebé besik hotu ona," Sr. Ministru afrima.
SUBSÍDIU BA BEE-MOOS
Subsídiu ba bee nian Sr. Ministru esplika katak kona-ba bee-moos nian MOP liuhosi Diresaun Jerál Água no Saneamentu (DGAS) halo diferente, iha fulan-Abril ne'e la aprezenta konta ba konsumidór sira. Subsídiu ne'e ba liu kliente sira ne'ebé mak iha ligasaun ho sistema EDTL no DGAS nian para kliente labele sai husi uma ba pagamentu ka forma iha balkaun banku, no ba hola pulsa.
Karik la implementa subsídiu, kliente sira kontinua ba hola pulsa EDTL no ba forma iha balkaun banku hodi selu bee, maka movimentasaun populasaun nian iha fatin públiku sei nafatin hanesan baibain la'os hanesan tempu Estadu Emerjénsia nian.
Tanba ne'e, ho subsídiu ne'e bele kontribui hamenus movimentasaun kliente sira nian tanba distansiamentu sosiál no evita kontaktu fíziku ne'e importante tebes hodi halo prevensaun ba pandémia COVID-19.
Atu informa mós katak kada kontadór prepagu EDTL sei hetan mensajen númeru token dala ida de'it. Númeru kontadór ne'ebé simu ona token sei lahetan tán maske kliente sira manda dala rua ka dala tolu, operadór telekomunikasaun sei manda nafatin númeru token ne'ebé hanesan.
0 Comments:
Posting Komentar