DILI, 07 ABRIL 2020: Esplikasaun S. Exa, Ministru Obras Públikas (MOP), Arq. Salvador Eugénio Soares dos Reis Pires, kona-ba interpretasaun transferénsia pulsa EDTL ho montante US $15 ba kliente EDTL tomak ne'ebé uza ona prepagu hodi evita propagasaun COVID-19 no atendimentu tékniku EDTL nian ba avariasaun enérjia eletrisidade iha postu administrativu Atauro, munisípiu Dili.
Sr. Ministru esplika katak ezemsaun pulsa ba kliente sira ne'e tuir tarefa, no tarefa ba pulsa EDTL ne'ebé iha mak 0.12kwh, nune'e sistemátikamente US $15/0.12kwh mak hetan 125kwh ou karik kliente sira hola pulsa EDTL ho osan dollar $1 nian mak sei hetan 0.83kwh, nune'e 0.83kwh X $15 mak hetan 125kwh
Tuir mai esplikasaun Sr. Ministru nian ba jornalista sira iha Palásiu Governu, hafoin partisipa reuniaun interministeriál:
Jornalista: Kona-ba EDTL ne'e tanba saida mak ko'a fali to'o 12 dollar de'it la'os 15 dollar?
Sr. Ministru: Lae, ida-ne'e interpretasaun mak sala tanba see ita-boot sira haree 0.12 kwh see ida-ne'e ita dívidu por US $15 ne'e ita hetan 125kwh, ida-ne'e bazeia ba tarefa ne'ebé mak iha tiha ona, ita halo ezensaun tuir tarefa ne'e mak ami bolu dehan ezensaun tuir tarefa. Sira (kliente) nia hanoin ne'e dehan $15 dollar ne'e hetan 150kwh la'os hanesan ne'e, see ita-boot sira hola pulsa EDTL dollar $1 hetan 8.333kwh kali (X) 15 ne'e hetan 125kwh, ida-ne'e iha ministru nia despaxu iha kedas, ne'ebé ida-ne'e hanesan interpretasaun sala de'it.
Jornalista: Entaun 15dollar ne'e la'os?
Sr. Ministru: Ita fó subsídiu ne'e US $15 maibé baku ba kwh mak 125kwh ne'e tanba perkwh ne'e ita bagi 0.12 fali. Haree iha ami-nia pájina ne'e ami esklarese iha ne'eba, depois ida-ne'e gratuitu, sei la selu tan fali, tanba balun dehan fali horsida selu fali.
Depois ida-tan mak ne'e, ita balun dehan sese mak seidauk hetan eletrisidade ne'e. Intensaun ne'e para atu prevene propagasaun kontajia COVID-19, ne'ebé kliente ne'ebé rejistu tiha ona labele mai sena malu hodi sosa pulsa, ida-ne'e de'it, ne'e la'os subsídiu ekonómiku ka saida? Pakote sira seluk Governu-MKAE mak sei haree fali MTCI (Ministériu Turizmu Komunikasaun nk Industria) mak sei halo, fó transferénsia osan ba família ka buat sira seluk ne'e la'os ha'u-nia servisu, ami ko'alia kona-ba buat ne'ebé mak liga ho ami-nia sistema. Loos ga lae, entaun ami prevene klientes atu mai hola iha fatin ida, ida-ne'e, ne'e la'os objetivu ekonómiku. Subsídiu ami-nian ne'e atu kontribui ba saúde públiku, ita mantein para saúde públiku ne'e labele kontajia husi COVID-19 ne'e.
Jornalista: Ita simu ona relatóriu balun husi operadór telekomunikasaun tolu to'o agora hira ona mak simu ona pulsa EDTL)
Sr. Ministru: Horseik ha'u simu dehan 30.000 resin mak manda ona mensajen, tanba ida-ne'e sistema otomátiku, nia kontabilidade ne'e klaru loos, transferénsia ne'e laiha bobar tuun bobar sa'e.
Depois iha ida fali tan, ita-boot sira hatene tanba kategoria konsumidores ne'e oioin, ida doméstik ne'e mak ohin ne'e 0.12 kwh ne'e, agora sira seluk hanesan komersiál sira ne'e, balun uluk loke kios, rejistu komersiál ne'e sira hetan 0.24 dívidu por US $15 ne'e mak sira hetan de'it 62.5kwh ne'e, ne'ebé ita tuir kategoria konsumidores ne'e, ne'ebé sistema ne'e kan sistema naun finanséira, osan ita la haree, ita halo ezensaun ne'ebé buat sira ema dehan ami atu halakon osan, ne'e lahetan tanba sistema la fó fatin, tanba ita la haree hetan osan ne'e mak ita halo ezensaun tarefa ne'e. Osan ita kaer ho liman ba bee ita dehan rai tiha US $2 ida.
Jornalista: Sr. Ministru Atauro nian ahi lalakan, solusaun saida mak foti ona?
Sr. Ministru: Atauto nia jeradór mak aat lori tempu atu hadia hadia hotu ona ita transporta ba iha horbainruak (05/04/2020) hanesan ne'e, durante ne'e ita-boot sira hatene tanba situasaun ita iha osan duo desimál, osan atu halo pagamentu laiha, ami atende iha munisípiu sira seluk jeradór sira lori mai mak tau hamutuk fali hadi'a, konsege duni horbainruak ita transfere fali ba Atauro, lori ekipamentu sira Transformadór ho jeradór sira ba, horseik ahi lakan tiha ona.
Jornalista: Ne'e garante katak sira sei aseseu?
Sr. Ministru: Agora lakan tiha ona.
Aliende ne'e jornalista sira husu mós kona-ba rekoperasaun ba inundasaun.
Jornalista: 15 Milloens KAFI (Konsellu Administrasaun Fundu Infraeatrutura) hodi halo rekoperasaun ba inundasaun?
Sr. Ministru: Kinta agora 10 oras ami enkontru fali desizaun ikus, tanba durante ne'e ita-nia tékniku sira prepara hela halo levantamentu dadus, halo kedas, ida-ne'e ita la fó despaxu, ita direitamente tama iha kontratu ne'ebé Kinta agora ami ajenda tiha ona 10 oras ami iha Ministériu Finansas halo enkontru sei halo aprezentasaun finál husi ekipa Task Force ne'e ba lokalizasaun sira ne'ebé mak hetan dezastre naturais atu halo rekoperasaun.
0 Comments:
Posting Komentar