KONSTRUSAUN ESTRADA NASIONÁL DILI TO’O BAUKAU ATINJI ONA 80%

DILI, 14 JANÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete konstrusaun estrada nasionál husi kapitál Dili to’o Manatuto no Manatuto to’o Baukau atinji ona pursentu 80 (80%).

Tuir kontratu ne’ebé iha ba konstrusaun estrada nasionál husi Dili ba Manatuto no Manatuto to’o Baukau sei remata iha tinan ida-ne’e, nune’e, Ministériu Obras Públikas liuhosi Unidade Manajementu Projetu (PMU) intensiva nia kontrolu ba konstrusaun estrada nasionál, atu garante kualidade ne’ebé di’ak.

“Iha meiadu tinan ne’e remata ona no daudauk ne’e atinji ona pruvolta pursentu 80 resin, Dili-Manatuto, Manatutu-Baukau ita-boot sira haree rasik, di’ak tebes ho kualidade, dezde ami reestrutura tiha PMU ita estabelese fali ekipa Task Force tolu ne’ebé mak diariamente sira iha terenu ho ita-nia kompañia sira, konstrutór sira hodi implementa estrada ne’e,” Sr. Ministru Obras Públikas informa ba jornalista sira hafoin simu ekipamentu peskiza husi kompañia Crown, iha edifísiu Diresaun Nasionál Peskiza no Dezenvolvimentu Obras Públikas (DNPDOP), Kolmera, Dili.

Kontrusaun estrada nasionál daudauk ne’e ho kualidade di’ak no nia progresu la’o lais liu tanba tékniku sira loron-loron iha hela de’it tereñu hodi kontrola kualidade konstrusaun estrada ne’e rasik no espera katak sei remata tuir kontratu ne’ebé iha.

Hafoin Governu Konstitusionál daualu (VIII) asumi responsabilidade, Ministériu Obras Públikas reestrutura tiha PMU no aumenta tanba ekipa Task Force 3, atu asegura no kontrolu kualidade projetu, ne’ebé mak fahe ba Leste, sentru oeste.

#Media_MOP