DILI, 14 JANÉIRU 2020: Diretór kompañia Crown Unip. Lda, Sr. Agusto Baltazar, entrega ekipamentus peskiza Falling Weight Deflectometer (FWD) ba S. Exa, Ministériu Obras Públikas (MOP), Arq. Salvador Eugénio Soares dos Reis Pires, iha edifísiu Diresaun Nasionál Peskiza no Dezenvolvimentu Obras Públikas (DNPDOP), Kolmera, Dili.
“Ekipamentus ne’e nia funsaun halo teste ba kualidade ka kamada estrada nian, naodistrutivu, ne’e signifika katak ne’e la hanesan teste manuál. Normalmente depois de halo instalasaun ita ko’a hodi sukat nia kamada, base-course, sub-base, no mós superfísie tuir esplikasaun husi Diretór Nasionál Peskiza no Dezenvolvimentu nian, see ita uza ida-ne’e sei lais liu para haree kualidade kamada tuir dezeñu no espesifikasaun, nia mós bele uza ba iha paviamentu ba estrada sira ne’e, kona-ba kompozisaun estrada nian ne’ebé ita tau iha planu hodi implementa. Ne’e ajuda tebes ba ita-nia prosesu verifikasaun no inspesaun ba investimentu ne’ebé Governu halo iha setór estrada nian, hametin konektividade tuir vizaun PEDN (Planu Estratéjiku Dezenvolvimentu Nasionál) nian, hasa’e kresimenu ekonómiku, ida-ne’e mak ita hakarak. Ita ko’alia kualidade, ita presiza mós ekipamentus iha ita-nia laboratóriu nasionál ho aparellu ka ekipamentus importante sira hanesan ne’e para ita asegura kualidade konstrusaun tuir ita-nia planu ne’ebé trasa ona iha ita-nia planu dezenvolvimentu sira," Sr. Ministru hatete hafoin serimonia simu ekipamentus peskiza husi kompañia Crown.
Sr. Ministru hatete, ne’e faze ida importante tebes, foin primeira-vez mak MOP liuhosi DNPDOP iha mákina FWD ba peskiza kualidade konstrusaun estrada.
MOP iha planu atu aumenta tan ekipamentus ba hasa’e prestasaun servisu hodi asegura kualidade husi laboratóriu nasionál hanesan teste besi betaun. Governu fó importánsia maka’as ba investimentu iha laboratóriu nasionál para asegura kualidade husi investimentu kapitál liuliu iha setór estrada.
Governu kontinua tau orsamentu hodi bele kompleta tiha ekipamentus ne’ebé presiza iha laboratóriu nasionál para presta sira-nia servisu, asegura kualidade husi investimentu sira ne’e, konstrusaun sivíl ne’ebé ita halo iha setór estrada.
“Ami kontente tebes ho mákina ida-ne’e, ha’u fiar katak ita-nia teste na kualidade estrada ne'e sei kualidade liután no lais liu, sei asegura mós prosesu pagamentu tanba iha birokrasia barak,"Sr. Ministru.
Iha fatin hanesan,
Diretór Jerál Administrasaun no Finansas (DGAF), Sr. Januário Barbosa,
esplika, tenderizasaun ba sosa ekipamentus ne'e loke iha tinan 2019,
liuhosi Diresaun Nasionál Aprovizionamentu (DNA) no kompañia 5 mak
kompete tuir prosesu normál tenderizasaun nian, ikus mai kompañia Crown
mak sai manán na'in hodi hatama ekipamentus peskiza.Kompañia CROWN manán projetu sosa ekipamentus peskiza ne'e ho orsamentu hamutuk rihun $272, ne'ebé prevé iha Orsamentu Jerál Estadu (OJE) 2019.
Husi orsamentu ba sosa ekipamentu peskiza FWD inklui karreta ho assesoria hanesan komputadór ho ekipamentu seluk no kompañia sei fó treinamentu ba tékniku DNPDOP durante semana ida nia-laran hodi halo operasaun ba mákina refere.
Hafoin simu ekipamentu peskiza husi kompañaia Sr. Ministru kontinua intrega ba Diretór Jerál Obras Públikas (DGOP) liuliu ba DNPDOP.
Serimonia ne'e partisipa mós husi S. Exa, Vise Ministru Obras Públikas (MOP), Eng. Nicolau Lino Freitas Belo, DGAF, DGOP, Diretór Jerál Água no Saneamentu (DGAS), Diretór Nasionál sira husi Diresaun Jerál Eletrisidade (DGE), Prezidente Konsellu Administrasaun IGE, inklui Diretór Nasionál sira.
#Media_MOP
0 Comments:
Posting Komentar