KOMISAUN INTERMINISTERIÁL APREZENTA EZEKUSAUN BA DEKLARASAUN KALAMIDADE 4 ABRIL

KOMISAUN INTERMINISTERIÁL APREZENTA EZEKUSAUN BA DEKLARASAUN KALAMIDADE 4 ABRIL

DILI, 28 JULLU 2021: S. Exa, Ministru Obras Públika (MOP), Arq. Salvador Eugénio Soares dos Reis Pires, Kuarta-feira ne'e partisipa iha reuniaun Konsellu Ministru ne'ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Iha Konsellu Ministru ne'e, Komisaun Interministeriál ba Protesaun Sivil no Jestaun Dezastre Naturál halo aprezentasaun ba Konsellu Ministrus kona-ba ezekusaun ba deklarasaun situasaun kalamidade hodi hanoin fali okorénsia inundasaun iha munisípiu Dili, iha madrugada, loron 4 fulan-abril tinan 2021. Realiza aprezentasaun husi Ministériu Administrasaun Estatál no Ministériu Obras Públikas ne’ebé hatudu ona impaktu husi inundasaun no resposta emerjénsia nian, no atu rekupera estragu sira.

Daudaun ne’e, sei iha ema hamutuk nain 731 maka hela iha sentru akollamentu neen ne’ebé sei ativu iha sidade Dili. Totál ema hamutuk nain 34 maka mate no nain 14 maka lakon. Iha nasionál, totál husi família nain 30. 322 maka afeta ba inundasaun ne’e, entre família sira ne’e, família 24.816 iha munisípiu Dili no uma hamutuk 4.231 mak estraga totál. Sei dezenvolve planu ida hodi harii sentru alojamentu multifunsaun hodi hatán ba situasaun sira emerjénsia nian, maka hanesan kontribuisaun ba prosesu reorganizasaun urbana no polítika desentralizasaun administrativa no podér lokál.

Kona-ba resposta Governu nian, ba apoiu umanitáriu emerjénsia, mobiliza ona rekursus umanus no disponibiliza ona beins materiál sira, ekipamentu sira, be’e no ai-han, ai-moruk no nesesidade sira-seluk ba populasaun afetada.

Kona-ba obras públikas, hala’o ona atividade nesesária sira hanesan limpeza, normaliza dalan públika no rekonstrusaun ba infraestrutura sira. Durante aprezentasaun, aprezenta mós projetu sira ne’ebé la’o hela ka sei dezenvolve iha kurtu no longu prazu, la’os atu rezolve de’it estragu sira ne’ebé identifika ona, maibé atu prevene no reduz risku sira husi dezastre sira tuirmai no kria infraestrutura sira ne’ebé rezilente liu.

Konsellu Ministru mós hafoin analiza aprezentasaun ba pontu situasaun epidemiolójika nasionál, husi Sala Situasaun Sentru Integradu Jestaun Krize, Konsellu Ministrus aprova Dekretu Governu kona-ba medida sira ezekusaun Deklarasaun Estadu Emerjénsia nian, ne’ebé efetua husi Prezidente Repúblika n. 56/2021, loron 27 fulan-jullu, hodi hatán ba pandemia COVID-19. Estadu emerjénsia, ne’ebé renova ona, abranje ba territóriu nasionál tomak no vigora entre tuku 00:00, loron 1 fulan-agostu tinan 2021 to’o tuku 23:59 loron 30 fulan-agostu tinan 2021.

Mantein medida sira ezekusaun deklarasaun estadu emerjénsia anteriór, liuliu obriga sidadaun sira hotu ne’ebé hela iha Timor-Leste atu mantein distánsia, pelumenus, metru ida ho ema seluk ne’ebé la hela iha ekonomia komún. Kontinua obriga atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira, industriál ka prestasaun servisu sira-nian ka ba edifísiu sira iha ne’ebé servisu administrasaun públika nian funsiona. Ema hotu-hotu nafatin iha obrigasaun mós atu evita formasaun halibur-malu, iha dalan públiku.

Konsellu Ministrus delibera mós projetu Rezolusaun Governu nian rua hodi:

·         Mantein Impozisaun serka sanitária iha munisípiu Dili to’o oras 23:59 husi loron 12 fulan-agostu tinan 2021.

·         Impoin serka sanitária iha munisípiu Ermera entre oras 00:00 husi loron 29 fulan-jullu tinan 2021 to’o oras 23:59 loron 12 fulan-agostu tinan 2021.

Nune’e, bandu sirkulasaun ema sira-nian entre munisípiu Dili no Ermera no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 mai kraik ne’ebé akompaña.

Aprova mós projetu Rezolusaun Governu nian ne’ebé aprezenta husi S. Exa, Ministru Administrasaun Estatál, Sr. Miguel Pereira de Carvalho, hodi nomea Guilhermina Filomena Saldanha ba Kargu Prezidente Autoridade Munisipál Dili, ba periodu tinan lima, hahú husi data simu pose nian.

Konsellu Ministrus aprova, ho alterasaun, projetu Proposta Lei Komisaun Funsaun Públika, ne’ebé aprezenta husi S. Exa, Ministru Prezidénsia Konsellu Ministrus, Sr. Fidelis Manuel Leite Magalhães. Liu ona tinan sanulu husi nia kriasaun, ho lei ida-ne’e sei pretende reforsa garantia sira independénsia atuasaun Komisaun nian no ninia Komisáriu sira, nune’e mós tuir kedas reforma ba nia ámbitu intervensaun, liuliu, atu rezolve problema sira ne’ebé identifika ona ne’ebé signifika difikuldade ba efisiénsia funsionamentu Funsaun Públika. Nune’e, ho experiénsia ne’ebé iha tiha ona, hakarak katak Komisaun Funsaun Públika iha papél ba apoiu hodi define polítika públika sira funsionamentu públiku nian, no fó kbi’it atribuisaun nian ba Ministériu sira no kompeténsia sira husi órgaun sira kona-ba rekursus umanus.

Aprova mós, ho alterasaun, projetu deliberasaun kona-ba Planu dezenvolvimentu ba Portu Dili, ne’ebé aprezenta husi S. Exa, Ministru Transporte Terrestre no Komunikasoins, Sr. José Agustinho da Silva. Planu ne’e aprova hodi prevee reestruturasaun no moderniza ba Portu Dili, hafoin transferénsia funsaun portu karga nian ba portu foun Tibar, no nia konversaun iha marina ida no portu kruzeiru sira. Prevee katak investimentu iha projetu atu garante retornu boot no iha aumentu turizmu no investimentu privadu, no dezenvolve negósiu no kria empregu.

Konsellu Ministrus fó podér tomak ba S. Exa, Ministru Defeza, Sr. Filomeno da Paixão de Jesus, hodi asina Akordu entre Ministru Defeza Timor-Leste no Departamentu Defeza Austrália nian (DDA), refere ba atividade infraestrutura no instalasaun sira ba Portu Hera. Akordu ne’e atu promove dezenvolvimentu infraestrutura sira hodi hasa’e kapasidade no sustentabilidade FALINTIL-Forsa Defeza Timor-Leste (F-FDTL) asisténsia benefísiu ba parte rua Timor-Leste no Austrália nian. Ho akordu ne’e, DDA sei realiza atividade ne’ebé nesesáriu ba konstrusaun iha Portu Hera hodi entrega, iha tinan 2023, ro’o patrulla (GSB) rua ne’ebé Austrália sei fó ba Timor-Leste.

Aprova mós, ho alterasaun, projetu delibersaun ne’ebé aprezenta husi S. Exa, Ministru Finansas, Sr. Rui Augusto Gomes, kona-ba revizaun ba valór husi tarifa kobransa nian ba utilizadór sira iha Portu Tibar, taxa konsesaun ne’ebé sei hetán husi konsesionária, hanesan royalty, no penalidade sira ne’ebé selu husi konsesionária tamba la kumpre rekezitu mínimu sira servisu no ekipamentu nian. Revizaun ba valór sira ne’e ho faktór indesaun 1, 061, ne’ebé karga tráfegu diminui kompara ho previzaun, ekonomia reál iha tinan hirak ikus ne’e, konstranjimentu sira ne’ebé rezulta husi pandemia COVID-19 no vontade konsesionária hodi kontinua dezenvolve projetu no hahú opera ho lais liu, maka hanesan faktu husi valór sira ne’ebé maihusi revizaun sei hanesan ho valór sira ne’ebé tama iha vigór konsesionária bele hahú ona operasaun iha data ne’ebé prevee.

Konsellu Ministrus aprova, ho alterasaun, projetu deliberasaun kona-ba selebrasaun Akordu Finansiamentu ida no Akordu Kontribuisaun Finanseira ho Banku Dezenvolvimentu Aziatiku. Akordu rua ne’e refere ba projetu dezenvolvimentu infraestrutura be’e no saneamentu ne’ebé lokaliza iha Viqueque, Lospalos no Same. Konsellu Ministrus fó podér tomak ba Ministru Finansas, hodi reprezenta Estadu Timor-Leste atu asina akordu ne’e.

S. Exa, Ministru Petróleu no Minerais, Sr. Víctor da Conceição, halo aprezentasaun ida kona-ba planu projetu konstrusaun Terminál Importasaun Petróleu nian iha Metinaro. Terminál ne’e sei lokaliza iha Aldeia Manleu, Suku Wenunuk, Postu administrativu Metinaru, Munisípiu Dili, no sei iha kapasidade hodi armazena petróleu ba loron 120. Ho objetivu hodi garante stock estratéjiku nasionál petróleu nian ba loron 90 no stock adisionál nian ba loron 30 ba komersializasaun husi Timor Gap. Remata

https://mop.gov.tl/

#Media_MOP

  

Read More

MOP PARTISIPA ENKONTRU TLDPM HO ADB EMBAIXADÓR JAPAUN

MOP PARTISIPA ENKONTRU TLDPM HO ADB EMBAIXADÓR JAPAUN

DILI, 27 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha enkontru TLDPM (The Timor-Leste and Development Partners Meeting  - TLDPM) ne’ebé organiza husi Ministériu Negósiu Estranjeiru no Kooperasaun (MNEK) no Ministériu Finansas (MF) no lidera husi S. Exa, Vise Primeiru Ministru (V-PM), Sr. José Reis, iha salaun enkontru edifísiu MNEK, Praia dos Coqueiros, Dili.

Enkontru TLDPM ne’e hanesan enkontru ida importante tebes ne’ebé Timor-Leste organiza kada tinan hodi rona kontribuisaun sira husi parseiru dezenvolvimentu ba dezenvolvimentu no konstrusaun nasaun.

Iha enkontru ne’e membru Governu sira hato’o prioridade Governu nian iha área oioin ba parseiru dezenvolvimentu sira liuliu dezenvolvimentu infraestrutura, rekursu umanu, reforsa setór privadu no kooperativa, dezenvolvimentu rurál no oinsá halo diverisikasaun ba ekonómia iha rai-laran.

Partisipasaun Sr. Ministru nian iha enkontru ne’e, ba dahuluk ho Banku Dezenvolvimentu Ajiátiku (ADB), Sr. Sunil Mitra,ho nia ekipa, ne’e partisipa mós husi membru Governu relevante sira hanesan Ministru Finansas (MF), Ministra Negósiu Estranjeiru no Kooperasaun (MNEK),  (MTK), Ministru Agrikultura no Peskas (MAP).

Enkontru daruak ho Embaixadór Japaun mai Timor-Leste, Sr. Masami Kinifuchi, ho nia ekipa, partisipa mós husi membru Governu relevante hanesan, Ministru Finansas (MF), Ministra Negósiu Estranjeiru no Kooperasaun (MNEK), Ministru Agrikultura no Peskas (MAP), Vise Minitru Saúde (MS), no Ministru Turizmu Komérsiu no Industria (MTKI).

#Media_MOP 

Read More

MOP DISTRIBUI TETU FISKÁL OJE 2022 NO HALO AVALIASAUN BA EZEKUSAUN OJE 2021 EZEKUSAUN OJE 2021 ATINJI ONA 49.7%

MOP DISTRIBUI TETU FISKÁL OJE 2022 NO HALO AVALIASAUN BA EZEKUSAUN OJE 2021 EZEKUSAUN OJE 2021 ATINJI ONA 49.7%

MAUBARA, 26 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, no S. Exa, Vise Ministru Obras Públikas (V-MOP), Eng. Nicolau Lino Freitas Belo, Segunda-feira ne’e lidera reuniaun avaliasaun ba ezekusaun Orsamentu Jerál Estadu (OJE) tinan fiskál 2021 no distribuisaun tetu fiskál OJE tinan fiskál 2022 ne’ebé Ministériu Finansas atribui ona ba MOP millaun $ 157 resin.

“Ohin ami hala’o enkontru ho órgaun tutela direita no indireita ba Ministériu Obras Públikas atu haree fahe pakote millaun 157 (157,140,777.00) ne’ebé Ministériu Finansas atribui ba Ministériu Obras Públikas ba Orsamentu Jerál Estadu 2022. Ami mós deskuti prioridade no atividade sira, inklui atribui pakote ne’e ba ajénsia no órgaun autónomu ne’ebé tutela ba Ministériu Obras Públikas,”Sr. Ministru Obras Públikas informa ba jornalista sira hafoin reuniaun ho ajénsia tutela diréita no indiréita iha fatin Uma Retiru Madre Carmetila, postu administrativu Maubara, munisípiu Likisa.

Sr. Ministru hatutan, pakote fiskál ne’e sei fó prioridade “Kontinua área bee, eletrisidade no mós estrada, kona-ba estrada rurál sira ita kontinua halo rehabilitasaun, no ita-boot sira hatene katak 2021 nian ita halo tenderizasaun ba projetu rehabilitasaun de’it totál Kilometru 324 ba área estrada rurál ne’ebé daudauk ne’e inkursu hela iha CNA no mós manutensaun periódika rutina ba Kilometru 900 resin. Tinan oin ita hakarak kontinua rehabilitasaun estrada aumenta nia Kilometru, tanba ita-nia meta mak to’o Kilometru 500 durante ita-nia mandatu”.

Kona-ba Eletrisidade nian daudauk ne’e Eletrisidade Timor-Leste Empreza Públika (EDTL,E.P), promove ona projetu ba suku balun no suku balun restante sei ba faze segundu iha fulan-Agostu ka inísiu Setembru ba suku sira ne’ebé seidauk asesu ba eletrisidade nune’e iha 2022 EDTL E.P hahú projetu ba aldeia sira.

“Prioridade balun mak husu ba EDTL atu haree ba aldeia sira apezar de sira-nia suku tama ona maibé aldeia sira seidauk asesu ba enérjia eletrisidade, no mós hanesan dijitalizasaun ba ita-nia sistema distribuisaun atu kontrolu sufisiente kona-ba ahi mate ba atendimentu di’ak liután no konversaun ba naturál gas atu redús gastu produsaun enérjia eletrisidade, investimentu enérjia renovável, solar pánel ne’ebé mak nia preparativus ho Ministériu Finansas no parseiru dezenvolvimentu ita ko’alia hela, ita kontinua fó prioridades. Investimentu sira ne’e hala’o iha autoridade para bele haree,”Sr. Ministru esplika.

Kona-ba bee-moos, Sr. Ministru hatete “Ita kontinua hasa’e kobertura fornesimentu bee nian, daudauk ne’e BTL,E.P (Bee Timor-Leste Empreza Públika) hala’o hela projetu iha postu administrativu ne’ebé fazeadamente fó sai kuaze 35 ba tinan ne’e no hakarak aumenta tan númeru husi investimentu ne’e para ita hasa’e kobertura. Iha setór bee ne’e mak aliende halo kobertura, iha mós hanesan, Jestaun Rekursu Hídrikus, projetu oinsá mak atu konserva bee-matan ne’ebé sira tenke haree tanba ita halo tiha infraestrutura depois bee laiha ne’e hanesan de’it, kualidade bee-moos ba konsumu umanu nian, taun foin daudauk ne’e promove ona Polítika Nasionál Jestaun Rekursu Hídtrikus no mós Polítika Abastesimentu Bee no mós dekretu Lei Kualidade Bee ba Konsumu Umanu nian promulgadu ona, agora tenke implementa lei ne’e iha investimentu sira liuhosi autoridade ne’ebé mak iha”.

EZEKUSAUN OJE 2021 ATINJI ONA 49.7%

S. Exa, Ministru Obras Públikas (MOP), Arq. Salvador Eugénio Soares dos Reis Pires, informa durante reuniaun halo mós avaliasaun ba progressu ezekusaun OJE 2021 nian ne’ebé daudauk ne’e atinji ona pursentu 49.7 (49.7%).

“Progressu ezekusaun atuál no mós ita obliga ona ne’e kuaze pursentu 49.7 (49.7%), kuaze pursentu 50 (50%), ne’ebé ita halo ezekusaun sei iha segundu transferénsia kuaze reprezenta pursentu 40 (40%) resin ne’ebé ita tenke halo ba empreza públika rua (EDTL,E.P no BTL,E.P), see ida-ne’e ezekuta sei sa’e pursentu 80 (80%) resin iha fulan hirak tuir mai depois de segundu transferénsia ba empreza públika sira. Ezekusaun ba empreza públika rua ba sira-nia atividade ne’ebé sira hala’o no mós projetu manutensaun ba estrada rurais ne’ebé tenderizasaun ita fó sai tiha ona, balun tama ona iha kontratasaun, iha ne’ebé mobilizasaun komesa kompañia manán na’in sira husi prosesu aprovizionamentu hala’o hela,”Sr. Ministru akresenta.

Orsamentu ba MOP ho nia dotasaun atuál hamutuk millaun $234 resin ($234,511,942.00), ezekusaun aktuál $103.676.344 (44%); Obligasaun $12.300.676 (5%); Kompromisu $6.250.596 (3%); no Balansu $112.284.325.

Progressu Ezekusaun OJE 2021 no tetu fiskál 2022 nian ne’e aprezenta husi Diretór Jerál Administrasaun no Finansas (DJAF), Sr. Januário Aparício Barbosa, akompaña husi Diretór Nasionál Finanansas (DNA), Sr. João Amaral.

Sr. Ministru Obras Públikas no vise Ministru agradese ba funsionáriu tomak husi ajénsia tutela no ajénsia autónomu ne’ebé hala’o ona servisu durante ne’e.

Iha oportunidade ne’e, Sr. Ministru no Sr. Vise Ministru distribui tetu OJE 2022 ba Diresaun Jerál inklui Diresaun Nasionál ida-idak hodi halo preparasaun ba OJE tinan fiskál 2022 nian tuir tetu ne’ebé fahe ona.

Reuniaun avaliasaun ezekusaun OJE 2021 no distribuisaun tetu OJE 2022 ne’e partisipa husi Diretór Jerál Obras Públikas (DJOP), Sr. Rui Hernani, Diretór Jerál Habitasaun no Urbanízmu (DJHU), Sr. Roger Tertuliano Belo, Unidade Planeamentu, Inspetur Jerál, inklui akompaña husi diretór nasionál, xefe departamentu inklui tékniku sira husi diresaun ida-idak.

Partisipa mós husi Prezidente EDTL,E.P, Sr. Paulo da Silva, Prezidente BTL,E.P, Sr. Carlos Peloi dos Reis, Prezidente Institutu Jestaun Ekipamentu Institutu Públiku (IJE,I.P), Sra. Hermenegilda da Costa Laurentina, Prezidente Autoridade Nasionál Eletrisidade (ANE,I.P), Sr. Ruben Jerónimo Freitas, Prezidente Autoridade Nasionál Água no Saneamentu (ANAS,I.P), Sr. Domingos Pinto, inklui Vise Prezidente, vogál, Diretór no tékniku sira ne’ebé tutela ba ajénsia autónomu sira hodi aprezenta atividade no planu servisu antes distribui tetu fiskál OJE 2022 nian.

https://mop.gov.tl/index.php/public/news/detail/mop-distribui-tetu-fisk--l-oje------no-halo-avaliasaun-ba-ezekusaun-oje------ezekusaun-oje------atinji-ona------

#Media_MOP

Read More

PM TAUR MATAN RUAK ORIENTA MOP-IJE LOKE ESTRADA KONEKSAUN METIAUT- KAMEA

PM TAUR MATAN RUAK ORIENTA MOP-IJE LOKE ESTRADA KONEKSAUN METIAUT- KAMEA

DILI, 23 JULLU 2021: S. Exa, Primeiru Ministru (PM), Sr. Taur Matan Ruak, akompaña husi S. Exa, Ministru Obras Públikas (MOP), Arq. Salvador Eugénio Soares dos Reis Pires, no Prezidente Institutu Jestaun Ekipamentus (IJE), Sra. Hermenegilda da Costa Laurentina, observa direita tereñu ba koneksaun estrada husi suku Metiaut liga ba to’o Kamea iha área foho leten Kamea nian.

Xefe Governu hatete estrada refere iha tempu Governu anteriór nian Sekretáriu Estadu Formasaun Polítika no Empregu (SEFOPE) loke ona maibé to’o de’it iha foho klaran la konsege to’o iha foho leten kuaze kilometru 1 resin mak sei hela, tanba ne’e orienta MOP no IJE hodi hatutan no loke hodi halo koneksaun liga Metiaut ba Kamea.

“Estrada ida-ne’e uluk SEFOPE mak loke maibé falta kilómetru 1 liu, ha’u-nia hanoin ne’e imi loke liga tiha (halo koneksaun estrada husi Metiaut to’o Kemea iha foho leten),”S. Exa, Sr. Primeiru Ministru orienta MOP no IJE bainhira hala’o vizita ba tereñu iha suku Metiaut, postu administrativu Kristu Rei, Dili.

Iha oportunidade ne’e, Sr. Primeiru Ministru mós fó apresiasaun ba servisu MOP no IJE liuliu ekipa tékniku sira ne’ebé halo servisu maka’as hodi halo mudansa iha mandatu oitavu (VIII) Governu Konstitusionál nian, liuliu inisia loke estrada ba área rurál sira.

“Ha’u apresia imi-nia servisu, ha’u la’os dehan ha’u foin Primeiru Ministru ba Governu ida-ne’e mak apresia imi-nia servisu, ha’u uluk sei Prezidente ha’u haree tanba ne’e mak ha’u mai ne’e haree iha diferénsia ida i kontinua nafatin hanesan ne’e,”Xefe Governu apresia.

Iha fatin hanesan, S. Exa, Ministru Obras Públikas (MOP), Arq. Salvador Eugénio Soares dos Reis Pires, informa vizita tereñu ne’e hodi loke estrada foun iha área Metiaut nian liga ho Kamea.

“Ohin Sr. Primeiru Ministru konvida ha’u ho Sra. Prezidente IJE mai haree hela dalan ligasaun Metiaut ba Kemea ne’ebé uluk Governu anteriór loke balun ona, no iha posibilidade para atu halo abertura foun atu nune’e bele halo koneksaun ba estrada ne’ebé ejiste ona iha Kamea, nune’e ligasaun Kamea ho Metiaut bele iha dalan korta (dalan liuhosi foho leten husi Metiaut to’o Kamea nian). Ida-ne’e mak ohin ita lori ho Sra. Prezidente ho nia ekipa no mós Diresaun Nasionál Estrada, Sr. Diretór ho nia ekipa, xefe departamentu no tékniku sira para atu haree posibilidade, horsida sira sei koordena ho nai Liurai atu identifika pontu de abertura ne’e husi ne’ebé,”Sr. Ministru Obras Públikas informa ba jornalista sira hafoin observa tereñu.

Sr. Ministru hatutan, normalmente kona-ba loke estrada foun IJE hanesan Institutu Públiku iha prosedimentu ka prosesu administrativa sira antes loke estrada foin mak hanesan presiza rekolla dadus, halo avaliasaun kustu no mós planu ba ekipamentus ne’ebé tenke uza, tipu ekipamentus hodi nune’e bele loke estrada foun halo koneksaun husi Metiaut ba Kamea.

Nune’e mós Prezidente IJE, Sra. Hermenegilda da Costa Laurentina, ekipa IJE sei ba fali iha tereñu hodi foti dadus antes mobiliza ekipamentu pezadus ba tereñu hodi halo servisu.

“Ohin S. Exa, Sr. Primeiru Ministru no Sr. Ministru Obras Públikas ami mai hamutuk haree estrada diresaun Metiaut ba Kamea, no ha’u hanoin ohin ekipa husi obras públikas nian, inklui parte IJE ho nia ekipa haree tiha ona no ami mós rona orientasaun husi S. Exa, Sr. Primeiru Ministru no Sr. Ministru iha posibilidade tempu badak ekipa husi IJE ho enjinéiru sira sei foti dadus depois de foti dadus mak ita foin hatene, relata fila-fali relatóriu survey para ita bele hatene katak servisu refere presiza tempu hira, presiza mákina tipu saida-saida, ami sei prepara sira-nia osan han, no seluk tan, bainhira ekipa sira preparadu ona administrativu kompletu ona ami bele mai ona halo servisu,”Sra. Prezidente IJE, informa.

Observasaun tereñu ne’e, akompaña mós husi Diretór Nasionál Estrada, Ponte no Kontrolu i Seias (DNEPCC), Sr. Nene Lobato, ho ekipa tékniku sira, ekipa tékniku husi Gabinete MOP no IJE nian.

https://mop.gov.tl/index.php/public/news/detail/pm-taur-matan-ruak-orienta-mop-ije-loke-estrada-koneksaun--metiaut--kamea

#Media_MOP

  

Read More

DJAF APREZENTA PREPARASAUN OJE TINAN FISKÁL 2022 BA MOP

DJAF APREZENTA PREPARASAUN OJE TINAN FISKÁL 2022 BA MOP

DILI, 23 JULLU 2021: Diretór Jerál Administrasaun no Finansas (DJAF), Sr. Januário Patrício Barbosa, akompaña husi Diretór Nasionál Finansas (DNF), Sr. João Amaral, aprezenta no diskusaun ba preparasaun Orsamentu Jerál Estadu (OJE) tinan fiskál 2022 nian ba S. Exa, Ministru Obras Públikas (MOP), Arq. Salvador Eugénio Soares dos Reis Pires, iha edifísiu MOP, Kaikoli, Dili.

Iha aprezentasaun ne’e halo mós komparasaun kona-ba OJE tinan fiskál 2020 no 2021 ho preparasaun OJE ba fiskál 2022 nian.

Enkontru ne’e partisipa husi, Xefe Gabinete MOP, Sr. Zeferino Gusmão Rangel Cachola, Diretór Nasionál Aprovizionamentu (DNA), Sr. Quintiliano Belo, assesór no tékniku.

https://mop.gov.tl/index.php/public/news/detail/djaf-aprezenta-preparasaun-oje-tinan-fisk--l------ba-mop

#Media_MOP

 

Read More

MOP VIZITA UPF BATUGADE, IJE SEI LOKE ESTRADA FASILITA KONTROLU MOVIMENTU ILEGÁL IHA FRONTEIRA

MOP VIZITA UPF BATUGADE, IJE SEI LOKE ESTRADA FASILITA KONTROLU MOVIMENTU ILEGÁL IHA FRONTEIRA

BATUGADE, 16 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Diretór Jerál Administrasaun no Finansas (DJAF), Sr. Januário Aparício Barbosa, Prezidente Institutu Jestaun Ekipamentus (IJE), Sra. Hermenegilda da Costa Laurentina, hala’o vizita traballu hodi hasoru malu ho Komandante Unidade Patrullamentu Fronteira (UPF), Superintendente Polísia, Euclides Belo, iha Kuartel Jerál Komandu UPF, Batugade, postu administrativu Balibo, munisípiu Bobonaro.

Iha enkontru ne’e ko’alia liu kona-ba apoiu MOP nian liuhosi IJE atu loke estrada iha fronteira hodi fasilita patrullamentu Polísia Nasionál Timor-Leste (PNTL) liuhosi Unidade Patrullamentu Fronteira (UPF) no FALINTIL Forsa Defeza Timor-Leste (F-FDTL) ne’ebé hala’o hela patrullamentu hodi kontrola movimentu ilegál iha fronteira.

Iha oportunidade ne’e, Sr. Ministru Obras Públikas mós parabeniza Superintendente Polísia, Euclides Belo hanesan Komandante UPF ne’ebé antes ne’e asumi kna’ar hanesan Segundu Komandante iha Komandu PNTL munisípiu Dili nian.

Antes ne’e, iha loron 15 fulan-Jullu, Sr. Ministru akompaña husi ekipa hala’o vizita traballu ba suku Kova, postu administrativu Batugade, munisípiu Bobonaro nian hodi rona preokupasaun husi parte F-FDTL no UPF iha postu Aibesi, suku Manehat, suku Kova katak estrada mak defikulta tebes atividade patrullamentu F-FDTL no UPF nian hodi kontrola movimentu ilegál iha fronteira.

Ho nune’e, Sr. Ministru Obras Públikas no Sra. Prezidente IJE informa katak ekipa IJE daudauk ne’e destakadu ona iha área refere suku Kova nian, tanba ne’e sei kontinua loke estrada hodi fasilita patrullamentu iha fronteira.

https://mop.gov.tl/index.php/public/news/detail/posibilidade-suku-kova-asesu-en--rjia-eletrisidade-iha-fim------ou-in--siu-----

#Media_MOP

  

Read More

MOP HUSU KOMUNIDADE KOVA LABELE HAKAT LIU FORNTEIRA HO ILEGÁL, PREVENE KOVID-19 VARIANTE DELTA

MOP HUSU KOMUNIDADE KOVA LABELE HAKAT LIU FORNTEIRA HO ILEGÁL, PREVENE KOVID-19 VARIANTE DELTA

BALIBO, 15 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, husu ba komunidade suku Kova, postu administrativu Balibo, munisípiu Bobonaro, atu labele hakat liu fronteira ho ilegalmente, tanba daudauk ne’e moras att surtu Kovid-19 variante foun ho naran Delta tama ona iha teritóriu Indonézia nian ne’ebé fó ameasa maka’as ba saúde públika.

“Ha’u husu ita-boot sira labele hakat ilegalmente ba iha ne’eba (teritóriu Indonézia-red) tanba agora variante foun Delta, ida-ne’e perigu tebes ba ita-nia komunidade, ne’ebé ha’u husu ba ita-boot sira atu koopera ho ita-nia autoridade lokál, autoridade militár no seguransa para bele haree saúde públiku iha Kova, ita tenke kuidadu-an nafatin,” Sr. Ministru Obras Públikas, informa ba komunidade iha sede suku Kova liuhosi vizita traballu Sr. Ministru nian hodi haree direita servisu ekipa Institutu Jestaun Ekipamentus (IJE) ba melloramentu no loke estrada foun iha suku refere.

Iha oportunidade ne’e, Sr. Ministru mós hala’o vizita traballu ba iha fronteira Aibesi, aldeia Manehat, suku Kova nian no simu preokupasaun husi autoridade Seguransa no Defeza iha postu Aibesi mak estrada ne’ebé defikulta patrullamentu iha fronteira hodi kontrola movimentu ilegál.

https://mop.gov.tl/

#Media_MOP

 

Read More

POSIBILIDADE SUKU KOVA ASESU ENÉRJIA ELETRISIDADE IHA FIM 2021 OU INÍSIU 2022

POSIBILIDADE SUKU KOVA ASESU ENÉRJIA ELETRISIDADE IHA FIM 2021 OU INÍSIU 2022

BALIBO, 15 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, informa katak dezeñu ba dada enérjia eletrisidade ba suku Kova, postu administrativu Balibo, munisípiu Bobonaro nian daudauk ne’e ekipa tékniku Enérjia Eletrisidade Timor-Leste Empreza Públika (EDTl,E.P) hala’o hela, nune'e, iha fulan-Agostu sei realiza tenderizasaun ba suku sira ne’ebé daudauk ne’e seidauk asesu enérjia eletrisidade inklui Kova, nune’e posibilidade iha fim tinan 2021 ou inísiu tinan 2022, suku sira inklui Kova bele asesu ona enérjia eletrisidade.

“Kona-ba eletrisidade hanesan ohin na’i Liurai suku Kova nian hatete liu ona tinan 20 suku Kova sei hela iha nakukun laran, ha’u ohin mai hakarak lori mós novidades di’ak ba ita-boot sira katak Governu Timor-Leste husi Ministériu Obras Públikas liuhosi EDTL,E.P sira fó sai ona tenderizasaun ba suku 30 iha fulan kotuk liubá, ami lansa tiha ona iha Rairobo-Atabae, agora iha faze hela kompañia sira hatama dokumentu ba tenderizasaun ida-ne’e, ne’ebé sira semana ida-ne’e kontinua halo avaliasaun. Aliende ne’e, ba faze segundu, ba restantes suku tanba ita iha totál hamutuk suku 76 mak seidauk hetan liña distribuisaun enérjia eletrisidade, 30 mak ita lannsa ona, 4 EDTL rasik mak halo, no 42 ne’e tuir ita-nia planu atu lansa iha fulan-Agostus nia-laran, fim de Agostu ou inísiu husi fulan-Outubru ne’e inklui mós Kova nian, signifika katak see Maromak tulun prosesu administrativa sira, loke konkursu públiku ba kompañia sira, ita halo prosesu avaliasaun depois anúnsiu tender tama kontratu, lori fulan ida ka rua no depois fulan ida ka rua ita bele hahú ona lansamentu priméira pedra ba nia instalasaun liña eletrisidade iha Kova, ha’u espera katak iha Novembru nia-laran sira ne’e ita bele halo ida-ne’e, kuandu laiha impedimentu, buat hotu la’o di’ak. Liña distribuisaun husi Balibo mai Kova tama iha faze segundu ne’ebé ita foin anúnsia iha fim de Agostu ka inísiu Outubru signifika katak ita f’o tempu fulan ida ba prosesu administrative hanesan avaliasaun tenderizasaun, fó sai manán na’in ou kontratasaun, entaun it abele dehan depois ida-ne’e iha meiadu Novembru ou Fim Novembru ou inísiu Dezembru, buat ida ahi ne’e lalais de’it, see lais liu instala mai tau besi-riin dada eletrisidade molok Natál ita simu ona ahi selae inísiu iha Janéiru,”Sr. Ministru Obras Públikas, informa ba komunidade iha sede suku Kova liuhosi vizita traballu Sr. Ministru nian hodi haree direita servisu ekipa Institutu Jestaun Ekipamentus (IJE) ba melloramentu no loke estrada foun iha suku Kova.

“Sr. Ministru hatutan, “Saida mak ha’u hakarak husu ba na’i liurai ho autoridade lokál sira, apa – ama sira tenke halo mak ne’e bainhira ita-nia ekipa kuandu mai, kompañia manán na’in ruma mak mai iha prosesu nia-laran ha’u husu ba ita-boot sira hamutuk labele halo fali impedimentu ba obra ne’e rasik, tanba ne’e instalasaun ne’e ba suku Kova, ne’ebé projetu Governu nian ba komunidade sira sei la susesu kuandu laiha suporta ka kontribuisaun husi ita-nia komunidade, ne’ebé husu ba na’i liurai sira na’i xefe aldeia sira, lia-na’in no autoridade lokál hotu, militár sivíl atu hamutuk asegura katak bainhira obra ne’e tama iha ne’e, ita-boot sira fó kontribuisaun ka suporta másimu para obra ne’e to’o nia rohan servisu ho kualidade depois fornese duni enérjia eletrisidade ba ita-nia komunidade, ba uma-kain ida-idak hanesan ita-boot sira mehi depois indepenénsia to’o agora ne’ebé ida-ne’e mak ita-nia hakartak”.

Iha oportunidade ne’e, Sr. Ministru hato’o agradese wain ba komunidade Kova no kontente reprezenta Governu Konstitusionál daualu (VIII) halo vizita traballu hodi haree kondisaun infraestrutura bázika iha suku Kova.

Iha fatin hanesan xefe suku Kova, Sr. Jeferino de Araujo, informa katak, komunidade suku Kova durante tinan naruk moris iha nakukun laran, tanba ne’e husu Governu atu tau-matan ba preokupasaun komunidade nian.

“Komunidade hein kleur liu ona mak ita ukun-an durante tinan 20 rein ona moris iha nakukun laran, to’o ohin susar duni ho estadu emerjénsia mina-rai mós susar, ema hotu-hotu moris susar, han no hemu susar, ne’ebé karik bele halo netik buat ruma,”xefe suku Kova informa.

Komunidade suku Kova preokupa liu mak estrada no eletrisidade tanba suku Kova ligasaun rai-maran direita ho parte Atambua-Indonézia nian maibé iha tempu kalan hateke ba teritóriu Indonézia nian ai-lakan naroman maibé suku Kova sei tuur iha nakukun laran, tanba ne’e, komunidade husu ba Governu dada eletrisidade para iha tempu kalan komunidade hetan mós naroman.

Suku Kova hanesan suku ne’ebé iha fronteira rai-maran direita ho teritóriu Atambua-Indonézia, iha uma-kain hamutuk 600 ho totál populasaun 2480 resin.

https://mop.gov.tl/

#Media_MOP 

Read More

DJHU REAPREZENTA PROGRESU DEZEÑU ESPASU VERDE NO LIÑA BISIKLETA HUSI METIAUT TO’O KRISTU REI BA MOP

DJHU REAPREZENTA PROGRESU DEZEÑU ESPASU VERDE NO LIÑA BISIKLETA HUSI METIAUT TO’O KRISTU REI BA MOP

DILI, 22 JULLU 2021: Diretór Jerál Habitasaun no Urbanízmu (DJHU), Sr. Roger Tertuliano Belo, akompaña husi Diretór Nasionál no tékniku sira reaprezenta dezeñu progressu dezeñu Espasu Verde ba lokalizasaun husi jardím 2006, edifísiu Ministériu Justisa oin to’o kruzamentu Eletrisidade Timor-Leste (EDTL,E.P) nian no Planu konstrusaun foun ba liña Bisikleta lokaliza hahú husi Metiaut to’o Kristu Rei ba S. Exa, Ministru Obras Públikas (MOP), Arq. Salvador Eugénio Soares dos Reis Pires, iha edifísiu MOP, Kaikoli, Dili.

Iha aprezentasaun ne’e, ekipa tékniku husi DJHU informa katak dezeñu sira ne’e haruka ona ba Ajénsia Dezenvolvimentu Nasionál (ADN) verifika no iha ona sujestaun hodi halo melloramentu di’ak liután ba dezeñu, nune’e DJHU liuhosi Diresaun Nasionál Urbanízmu halo ona mudansa no sei haruka hikas ba ADN hodi hetan verifikasaun antes ba implementasaun projetu hirak ne’e.

Ekipa tékniku sira mós aprezenta kona-ba Konsetu projetu pilotu Pedestrianiza área Komérsiu Kolmera.

Iha aprezentasaun ne’e, Sr. Ministru Obras Públikas husu ba DJHU liuliu ekipa tékniku sira, halo dezeñu tenke integradu, espasu verde ho aihoris sira, inklui iha mós espasu ba ema ho defisiete.

Aprezentasaun ne’e partisipa husi Xefe Gabinete MOP, no Diretór DJHU akompaña husi Diretór Nasionál Urbanízmu, Sr. Manuel da Costa Xavier, Xefe Departamentu Rejistu, Informasaun, Jeográfika no Infraestrutura (DRIJI), Sr. Belmiro Moisés, Xefe Departamentu Estudu no Urbanízmu, Sr. Antolicio F. Guterres, akompaña husi assessor no tékniku sira.

https://mop.gov.tl/

#Media_MOP

 

Read More

MOP OBSERVA SERVISU IJE BA MELLORAMENTU NO LOKE ESTRADA FOUN KILOMETRU 12 IHA SUKU KOVA

MOP OBSERVA SERVISU IJE BA MELLORAMENTU NO LOKE ESTRADA FOUN KILOMETRU 12 IHA SUKU KOVA

BALIBO, 15 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Diretór Jerál Administrasaun no Finansas (DJAF), Sr. Januário Aparício Barbosa, Prezidente Institutu Jestaun Ekipamentus (IJE), Sra. Hermenegilda da Costa Laurentina, iha Kinta-feira ne’e hala’o vizita traballu ba suku Kova, postu administrativu Balibo, munisípiu Bobonaro hodi haree direitamente servisu ekipa IJE nian ba melloramentu no loke estrada foun Kilometru 12 iha suku refere.

“Ahin ami halo vizita traballu mai iha Kova hodi haree atividade ne’ebé IJE hala’o hela, ita-boot sira hatene katak S. Exa, Sr. Primeiru Ministru Taur Matan Ruak, nia prioridade mak hakarak dezenvolve infraestruturas bázikas ba ita-nia povu, enkuantu hanesan ohin xefe suku dehan kata kami sei halo planifikasaun atu mobiliza rekursu atu atribui ba área sira la’os de’it Kova maibé teritóriu tomak, entaun ita iha Institutu Jestaun Ekipamentus ne’ebé hamahon-an iha Ministériu Obras Públikas ne’ebé sira-nia misaun mak, la’os de’it halo jestaun ba ekipamentu pezadu ne’ebé Governu nian iha Ministériu Obras Públikas maibé iha polítika VIII Governu Konstitusionál nian fó funsaun foun ba IJE para atu ajuda Governu fó tulun ba komunidade sira liuliu iha área rurál ne’ebé izoladu hela hanesan Kova ne’ebé besik mai fronteira,”Sr. Ministru Obras Públikas informa ba komunidade suku Kova liuhosi vizita traballu ne’e iha sede suku Kova.

Sr. Ministru esplika, prosesu normál ba atendimentu melloramentu no loke estrada foun mak komunidade hamutuk ho autoridade lokál sira hato’o pedidu ka proposta depois IJE halo avaliasaun, buka rekursu no mobiliza ekipamentu pezadu ba iha tereñu hodi ajuda halo servisu tuir nesesidade komunidade nian.

Ministériu Obras Públikas liuhosi programa Estrada Rurál ba Dezenvolvimentu (ERD) ne’ebé servisu hamutuk entre Governu Timor-Leste ho Governu Austrália kontinua halo manutensaun rutiña ba estrada rurál ne’ebé iha ona nune’e kontinua fasilita movimentasaun komunidade nian asesu ba merkadu.

“Kona-ba pedidu Xefe Suku no Komunidade nian, Sra. Prezidente IJE mak ne’e ha’u husu para kontinuasaun ajuda melloria estrada hanesan ohin xefe suku mensiona, ne’ebé Governu prometidu ajuda ita-boot sira, i ha’u fó hanoin mós ba ita-boot sira katak iha 2021 ne’e ita iha programa ida estrada rurál, ita-boot sira haree uluk ita tama husi merkadu Balibo nian mai to’o Kova ne’e iha projetu ida ERD ne’ebé Governu Timor-Leste mak tau osan, Governu Austrália mak selu ILO (International Labour Organization) atu ajuda halo planifikasaun, ita-nia Governu mak tau osan halo rehabilitasaun estrada rurál, entaun tinan ida-ne’e estrada husi merkadu Balibo mai to’o iha ne’e ita sei halo manutensaun rutiña, signifika katak hadi’a estrada ku’ak sira, tinan oin mai fali ita halo manutensaun rutiña extende mai to’o Kova laran, para nune’e kontinua melloria servisu ne’ebé mak IJE ho nia ekipa hala’o tiha ona”.

Iha oportunidade ne’e, Sr. Ministru fahe mós informasaun relasiona ho prosesu dada enérjia eletrisidade no bee-moos ba komunidade iha área Kova.

Prezidente IJE, Sra. Hermenegilda da Costa Laurentina, hatete IJE hanesan Institutu Públiku ida ne’ebé tutela ba iha Ministériu Obras Públikas ho ninia papél ka servisu mak halo normalizasaun mota, melloramentu estrada, halo nova abertura ba estrada foun, no mós apoiu ministériu sira seluk, Igreja no akademia sira.

“Pedidu Kova nian ha’u aprova ho situasaun emerjénsia ne’ebé mak iha, ho ita-nia komandante sira, ita-nia militár sira ne’ebé mak fó seguransa iha ne’e, sira mós informa dehan see tempu udan ami labele halo servisu i presiza tebes IJE nia tulun, entun iha momentu ne’eba foti desizaun ida katak Kova tenke apoiu ho karakter urjénsia i pedidu ne’ebé mak iha tuir informasaun husi ekipa katak kilometru 12 mak IJE halo melloramentu no kilometru 2.5 ne’e ba abertura foun, kilometru 9 ne’ebé atu halo melloramentu,”Prezidente IJE informa.

Sr. Prezidente IJE esplika katak servisu IJE nian tuir pedidu ne’ebé iha uluk finaliza ona maibé sei iha tan pedidu foun husi xefe-suku kilometru 9 no iha mós pedidu husi Komandante UPF, Sr. Euclides Belo, ba melloramentu estrada hodi fasilita operasaun Polísia Nasionál Timor-Leste (PNTL) liuhosi Unidade Polísia Fronteira (UPF) no FALINTIL Forsa Defeza Timor-Leste (F-FDTL) nian iha área fronteira.

“IJE prontu para apoiu ba komunidade sira iha área remotas liuliu iha suku Kova nian, ne’ebé ekipa ne’ebé iha ne’e, ha’u hanesan Prezidente IJE tutela ba Ministériu Obras Públikas katak ami sei apoiu komunidade sira iha ne’e liuliu ba pedidu ne’ebé tama ona iha kilometru 9. Ami sei kontinua enkontru ho ekipa oinsá bele finaliza servisu para bele fasilita komunidade iha vida ekonomia liuliu ba ita-nia forsa defeza ne’ebé halo seguransa iha ne’e kuandu estrada laiha sira mós labele halo servisu másimu, espera katak ho melloramentu no abertura foun ne’e bele tulun ona oituan ita-nia forsa sira, ita-nia komunidade para bele halo movimentu ba mai”.

Iha fatin hanesan xefe-suku Kova, Sr. Jeferino de Araujo, agradese ba Sr. Ministru Obras Públikas no IJE ne’ebé halo atendimentu emidiata ba kondisaun estrada iha Kova, hodi fasilita movimentasaun komunidade nian inklui parte Polísia Nasionál Timor-Leste (PNTL) liuhosi Unidade Polísia Fronteira (UPF) no FALINTIL Forsa Defeza Timor-Leste (F-FDTL) iha área fronteira nian.

“Ami apresia tebes tanba pedidu ne’ebé ami hatama ba Governu liuhosi IJE depois ba direita iha Sr. Ministru depois iha loron rua ka tolu iha ona despaxu husi Ministru no agora ekipamentu mai halo servisu to’o iha postu Hasnaruk ne’eba, ami-nia agradese wain ba Governu ida-ne’e, iha defikuldade barak liu maibé tenke halo netik buat ruma ba komunidade. Ami-nia preokupasaun mak kontinuasaun mak ohin ha’u hatete tenke iha kontinuasaun, kontinuasaun ba futuru ne’e tenke halo tamba selae tempu udan entaun atividade paradu totál, husi dezenvolvimentu iha suku laran depois parte seguransa nian UPF ho F-FDTL halo patrullamentu ne’e defikuldade boot,”Xefe Suku informa.

Progressu melloramentu no abertura estrada foun iha suku Kova hamutuk kilometru 12 hahú husi aldeia Bekrese to’o Manehat suku Kova finaliza ona tuir pedidu antes ne’e iha. Liuhosi vizita ne’e autoridade seguransa no autoridade lokál sira husu atu IJE kontinua halo servisu melloramentu ba estrada killometru 9 iha suku refere hodi fasilita movimentasaun komunidade no operasaun parte seguransa no defeza iha área fronteira.

https://mop.gov.tl/index.php/public/news/detail/mop-observa-servisu-ije-ba-melloramentu-no-loke-estrada-foun-kilometru---iha-suku-kova

#Media_MOP

 

Read More

MOP ENKONTRU HO REPREZENTANTE JICA IHA TIMOR-LESTE

MOP ENKONTRU HO REPREZENTANTE JICA IHA TIMOR-LESTE

DILI, 14 JULLU 2021: S. Exa. Ministru Obras Públikas (MOP), Arq. Salvador Eugénio Soares dos Reis Pires, hala’o enkontru traballu ho Reprenzentate Xefe Japan International Coorporate Agency (JICA) iha Timor-Leste, Sr. Goto Ko, akompaña husi Reprezentante Infrastruktura JICA nian iha Timor Leste, Sr. Shinji Yokohori, hodi ko’alia kona-ba apoiu Governu Japaun nian ba responde infraestrutura ne’ebé hetan estragus iha inundasaun 04 fulan-Abril tinan 2021.

Antes ne’e, hafoin inundasaun 04 Abril, Governu Timor-Leste husu Governu Japaun hodi fó apoiu tékniku ba melloramentu moru protesaun ka moru sustentasaun sira iha mota ne’ebé hetan estragus liuliu iha kapitál Dili.

https://mop.gov.tl/index.php/public/news/detail/mop-enkontru-ho-reprezentante-jica-iha-timor-leste

#Media_MOP

 

Read More

KONSELLU MINISTRU APROVA MANTEIN IMPOZISAUN SERKA SANITÁRIA IHA DILI BA LORON 14

KONSELLU MINISTRU APROVA MANTEIN IMPOZISAUN SERKA SANITÁRIA IHA DILI BA LORON 14

DILI, 14 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne'ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Konsellu Ministrus aprova ona, hafoin halo análize ba aprezentasaun kona-ba pontu situasaun epidemiolójika nasionál nian husi Sala Situasaun Sentru Integradu Jestaun Krize, Konsellu Ministrus delibera atu aprova projetu Rezolusaun Governu nian ne’ebé mantein impozisaun serka sanitária iha munisípiu Dili ba loron 14 tan, to’o oras 23:59 loron 29 fulan-jullu tinan 2021. Nune’e, bandu nafatin sirkulasaun ema sira iha munisípiu Dili no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. Proibisaun sirkulasaun ne’e la abranje ba ema sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik sira iha tinan neen mai-kraik ne’ebé akompaña inan-aman sira. Delibera mós katak oras ne’e sentru sira kontrolu integradu nian, atu tama no sai husi munisípiu Dili, sei funsiona durante oras 24 loron-loron.

Aprova ona projetu Dekretu-Lei, ne’ebé aprezenta husi S. Exa, Ministru Turizmu, Komérsiu no Indústria, Sr. José Lucas do Carmo da Silva, ba alterasaun dahuluk ba Dekretu-Lei nu. 10/2018, loron 9 fulan-abríl, ne’ebé aprova Estatutu husi Institutu ba Kualidade Timor-Leste, I.P. (IQTL). Proposta ida ne’e altera kompozisaun órgaun no rekizitu sira vinkulasaun IQTL nian, haluan númeru membru sira no konkretiza kompeténsia sira ne’ebé atribui ona ba kada órgaun IQTL. Ne’e hakarak mós atu armoniza kategoria membru órgaun IQTL nian ba kargu sira ne’ebé ekiparadu ho sira.

Konsellu Ministrus asiste ona aprezentasaun kona-ba preparasaun partisipasaun Timor-Leste iha Simeira kona-ba Sistema Aihan, Simeira ne’e sei realiza hamutuk ho Asembleia Jerál Nasoins Unidas da-76, iha fulan-setembru tuirmai, no sei iha pre-simeira ida durante loron tolu, ne’ebé organiza husi Itália husi loron 26 to’o 28 fulan-jullu tinan 2021, iha sede Organizasaun Nasoins Unidas ba Alimentasaun no Agrikultura (FAO) iha Roma. Objetivu husi Simeira Sistema Aihan atu halo lansamentu, iha kontestu ne’ebé luan Ajenda 2030 Nasoins Unidas ba Dezenvolvimentu Sustentavel, asaun brani ne’ebé atu muda mundu nia maneira hodi produz no konsumu hahan, atu garante kapasidade ne’ebé tahan ba tempu naruk hodi fó hahán ba populasaun mundiál ho forma ida ne’ebé sustentavel.

Membru Konsellu Ministrus asiste mós aprezentasaun kona-ba Planu Asaun Nasionál ba Konsolidasaun Seguransa Alimentár no Nutrisaun, ne’ebé pontu fokál sira Scalling Up Nutrition “Sun Movement” nian halo. Planu ne’e propoin konjuntu ida indikadór, meta no prioridade sira hodi alkansa objetivu boot halakon hamlaha, alkansa seguransa alimentár, hadia nutrisaun no promove agrikultura sustentavel, hodi garante asesu universál ba aihan ne’ebé seguru no nutritivu no mós halakon forma hotu-hotu malnutrisaun nian.

Aprova ona autorizasaun ba abertura husi prosedimentu aprovizionamentu konkursu públiku ba akizisaun roo peska industrial rua, ho kapasidade 250 GT kada roo, tuir projetu ne’ebé aprezenta husi Ministru Agrikultura no Peskas, Pedro dos Reis.

Konsellu Ministros delibera atu aprova estratéjia vasinasaun foun ida kontra COVID-19 ba kada munisípiu, ne’ebé liuhusi mobilizasaun rekursu másimu ba vasinasaun iha kada munisípiu, tuir kalendáriu ne’ebé defini ona, ho inísiu iha munisípiu ne’ebé ho risku boot, to’o ba munisipiu hotu-hotu iha nasaun ne’e.

Hodi garante vasinasaun ba populasaun tomak, liuliu ba foinsae ho idade husi tinan 12 to’o 17, Konsellu Ministrus orienta ona Ministériu Saúde hodi hahú prosesu akizisaun vasina Pfizer no garante kondisaun no ekipamentu sira ne’ebé presiza ba sira nia armazenamentu no transporte.

Konsellu Ministrus aprova ona tetu agregadu no dezagregadu ba Orsamentu Jerál Estadu (OJE) tinan 2022, ne’ebé aprezenta husi S. Exa, Vise-Ministra Finansas, Sra. Sara Lobo Brites. Konsellu Ministrus aprova mós konjuntu inisiativa adisionál ne’ebé fixa tetu agregadu ho montante millaun 1.571,6. Governu define ona prioridade nasionál neen ba OJE tinan 2022:

1) dezenvolvimentu kapitál umanu (edukasaun, formasaun profisionál no saúde);

2) abitasaun no inkluzaun sosiál;

3) setór produtivu sira (agrikultura no turizmu), ambiente no konektividade;

4) dezenvolvimentu setór privadu; 5) dezenvolvimentu rurál; no 6) boa governasaun.

Vise-Ministra Finasas halo mós aprezentasaun ida ba Konsellu Ministru kona-ba sorumutuk ho parseiru dezenvolvimentu sira tinan 2021 (Timor-Leste & Development Partners Meeting, TLDPM) ne’ebé sei hala’o iha Auditóriu Kay Rala Xanana Gusmão, iha loron 30 fulan-jullu tuirmai. TLDPM hahú uluk ho sorumutuk bilaterál iha loron 27 fulan-jullu, liuhusi sorumutk ida kona-ba integrasaun ekonómika rejionál iha loron 28 fulan-jullu no fórum ida Organizasaun Mundiál Komérsiu iha loron 29 fulan-jullu. Sorumutuk ida ne’e ho parseiru dezenvolvimentu sira organiza tinan-tinan husi Governu hodi fahe nia vizaun ba oin analiza prioridade ba médiu prazu no hodi haree ba progresu ne’ebé alkansa tiha ona iha dezenvolvimentu nasionál.

Ikusliu, Konsellu Ministru aprova nota pezar ida ba Camel Budiardjo ninia mate, ativista direitus umanus no defensora ba timoroan sira-nia ukun-rasik-an. Iha nota pezar ne’e Governu hateten katak Camel Budiardjo “Timor-Leste sei la haluha no sei hanoin nafatin ho domin boot, admirasaun no respeitu ba ninia kompromisu ho direitus umanus, justisa no solidariedade”

https://mop.gov.tl/index.php/public/news/detail/konsellu-ministru-aprova-mantein-impozisaun-serka-sanit--ria-iha-dili-ba-loron---

#Media_MOP

 

Read More