MOP Lansa Fatuk Dahuluk Ba Projetu Dada Eletrisidade Ba Suku Rairobo

MOP Lansa Fatuk Dahuluk Ba Projetu Dada Eletrisidade Ba Suku Rairobo

RAIROBO, 27 MAIU 2021: S. EXA, MINISTRU OBRAS PÚBLIKAS (MOP), Arq. Salvador Eugénio Soares dos Reis Pires, akompaña husi Prezidente Eletrisidade Timor-Leste (EDTL,E. P) lansa fatuk dahuluk ba projetu konstrusaun liña distribuisaun enérjia eletrisidade Baixa no Media Tensaun ba suku Rairobo, postu administrativu Atabae, munisípiu Bobonaro.

“Ha’u mai lori S. Exa, Sr. Primeiru Ministru (S. Exa, PM, Sr. Taur Matan Ruak) nia naran no Governu tomak ami mai iha loron di’ak ida-ne’e, iha biban ida-ne’e ita komesa lansa projetu eletrifikasaun nasionál ba suku sira seidauk asesu ba liña eletrisidade iha teritóriu tomak, 76 suku ne’ebé seidauk asesu eletrisidade. Grasa Maromak nian, Rairobo mak hanesan fatin primeiru hetan projetu ne’ebé ita lansa kedas iha 2019 liga mós tamba ho COVID-19, momentu ne’eba iha Konsellu Ministru iha diskusaun buka hela infraestrutura atu halo konfinamentu no izolamentu, ida mak ita-nia postu UPF nian 500 kama mak iha ne’e, maibé ha’u dehan ba S. Exa, Primeiru Ministru katak iha ne’eba eletrisidade laiha, see aban bainrua uza ida-ne’e ita tenke lori uluk eletrisidade ba uluk Rairobo, see ita uza jeradór de’it sei la sufisiente, nusa ita la buka meus para halo uluk projetu eletrifikasaun ba iha ne’eba, entaun ha’u ko’alia ho Sr. Ministru Defeza iha momentu ne’eba hanesan Ministru Interiór interinu, sira halo pedidu ida para lori ba aprezenta iha Konsellu Ministru no KAFI no hetan aprovasaun ita lansa tender no ohin ita mobiliza halo projetu eletrifikasaun ida-ne’e,”Sr. Ministru Obras Públikas informa ba komunidade Rairobo bainhira halo lansamentu fatuk dahuluk ba projetu konstrusaun liña distribuisaun enérjia eletrisidade ba suku Rairobo, iha suku Rairobo, postu Atabae, munisípiu Bobonaro.

Projetu konstrusaun ba liña eletrisidade ne’e hala’o husi kompañia Esmelia II Electric, Unip.Lda, hahú iha loron 2 fulan-Maiu tinan 2021 no sei remata iha loron 02 fulan-Dezembru tinan 2021, ho montante orsamentu US $411, 806. 78.

Sr. Ministru hatete, "Projetu ne’e sei la’o tan fulan rua ka fulan tolu para atu halo kompleta projetu ne’e. espera katak sira (kompañia-red) bele fó sira-nia abilidade tomak hala’o projetu ne’e ho kualidade tanba projetu ne’e projetu ba povu, utiliza osan povu nian hala’o ho kualidade nune’e bele lori fali retornu ekonómiku tuir ita-nia vizaun ne’ebé iha, sustentabilidade ekonómiku no dezenvolvimentu ekonómiku país nian".

Hanesan Atabae oan, iha oportunidade ne’e, Sr. Ministru Obras Públikas husu ba autoridade seguransa, autoridade lokál, veteranus no komunidade atu kontribui realizasaun projetu ida-ne’e ho di’ak, atu nune’e bele fó naromak ba komunidade Rairobo.

“Ha’u husu mós ba ita-nia autoridade lokál, komunidade, ita-nia aman veteranu sira, autoridade seguransa, atu servisu hamutuk suporta projetu eletrifikasaun ne’e,”Sr. Ministru husu.

Iha oportunidade ne’e, Sr. Ministru aprezenta ba komunidade kona-ba planu no programa Governu nian iha área estrada, eletrisidade no bee-moos ne’ebé planeadu ona iha Orsamentu Jerál Estadu tinan fiskál 2021 nian, inklui programa sira ne’ebé presiza halo iha futuru.

Governu kontinua halo esforsu dada eletrisidade ba komunidade, halo manutensaun no rehabilitasaun estrada no dada bee-moos ba komunidade inklui atendimentu Governu nian iha área sira seluk maibé servisu sira ne’e hotu realiza bainhira iha rekursu finanseiru, nune’e, ho limitasaun rekursu ne’ebé iha Governu sei esforsu atende preokupasaun sira ne’ebé nesesáriu no importante liu ida por ida to’o hotu.

Iha fatin hanesan, Prezidente EDTL,E.P, Sr. Paulo da Silva mós informa kona-ba polítika no programa EDTL nian hanesan Empreza Públika ba komunidade Rairobo iha área eletrifikasaun nasionál no liuliu oinsá EDTL bele buka osan rasik ba nia sustentabilidade iha futuru.

Prezidente Autoridade Munisipál munisípiu Bobonaro, Sr. Zeferino dos Santos, Administradór postu administrativu Atabae, Sr. Pedro Lakubuti, informa ba Sr. Ministru kona-ba preokupasaun komunidade munisípiu Bobonaro nian iha área oioin liuliu iha postu administrativu Atabae nian, nune’e Governu bele atende preokupasaun sira ne’e.

Serimonia Lansamentu ne'e, partisipa husi Prezidente Autoridade Munisipál munisípiu Bobonaro, Zeferino dos Santos, Administradór postu administrativu Atabae, Pedro Lakubuti, Autoridade Seguransa no Defeza iha munisípiu Bobonaro nian, inklui Autoridade Lokál no komunidade Rairobo.

Asiste mós husi Diretór Jerál Administrasaun no Finansas (DJAF), Sr. Januário Barbosa, Prezidente Institutu Jestaun Ekipamentus (IJE), Sra. Hermenegilda D C. Laurentina, Prezidente Autoridade Nasionál Eletrisidade (ANE), Sr. Ruben Jerónimo Freitas, no tékniku sira.

#Media_MOP

 

Read More

ANÚNSIU ONA TENDER BA PROJETU 34, MOP – EDTL, E.P ESFORSU FINALIZA ELETRIFIKASAUN NASIONÁL IHA TINAN IDA-NE'E

ANÚNSIU ONA TENDER BA PROJETU 34, MOP – EDTL, E.P ESFORSU FINALIZA ELETRIFIKASAUN NASIONÁL IHA TINAN IDA-NE'E

DILI, 25 MAIU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete Eletrisidade Timor-Leste (EDTL,E.P) liuhosi pájina ofisiál Facebook EDTL,E.P nian públika ona tenderizasaun ba projetu dada eletrisidade ba suku sira pakote 30 no 4 sei implementa rasik husi EDTL hanesan Empreza Públika.

“See ita-boot sira haree, EDTL,E.P liuhosi sira-nia pájina (Facebook) ohin anúnsia ona tender ba programa planeadu 34 sukus, ne’ebé 4 sira mak implementa rasik no 30 mak sira fó sai ohin, ida-ne’e ba prosesu aprovizionamentu, espera katak fulan ida ka rua ita bele konklui atu bele halo mobilizasaun ba iha suku sira komesa hahú ona projetu liña eletrifikasaun ba suku sira ne’ebé seidauk hetan. Projetu 34 sukus, 30 mak fó sai, 4 mak EDTL halo mesak,” Sr. Ministru Obras Públikas, informa ba jornalista sira iha Palásiu Governu, hafoin enkontru ho Sr. Primeiru Ministru (PM), Sr. Taur Matan Ruak, iha Palásiu Governu, Dili.

Sr. Ministru hatutan “Hanesan ita-boot sira hatene katak 76 ne’ebé seidauk asesu eletrisidade, see halo ona 34 restante sira (EDTL,E.P) sei prepara hela dezeñu, sira-nia ekipa iha rua ne’ebé iha progresu hela ba restante 42 ne’e no tuir planu, see dezeñu ka preparativu sira ne’e hotu ona ita bele fó sai iha Agustu ka Setembru, see sedu liu iha Jullu signifika katak esforsu sira halo ne’e ita sei promove projetu 76 suku ne’e dala ida de’it iha tinan ida-ne’e, ida-ne’e mak esforsu ita hala’o, klaru katak iha preparativu, iha koordenasaun servisu barak tenke hala’o para bele realiza ita-nia planu ida-ne’e, ne’ebé 34 ita fó sai ona, agora hein fali mak 42 ne’e, ne’ebé iha progresu hela, sira estabelese hela ninia dezeñu”.

Orsamentu ba eletrifikasaun nasionál liuliu ba projetu pakote 34, Ministériu Obras Públikas prevé ona iha Orsamentu Jerál Estadu (OJE) tinan fiskál 2021.

“Ita foin daudauk ne’e se la sala ita iha orsamentu 10 milloens resin, maibé projetu ne’e ita halo signifika katak ne’e multi-anuál, see implementa hotu ita selu maibé restante ne’ebé seidauk iha ha’u hanoin, ita haree ba tempu ne’ebé iha, see sira sei carryover maske sira hahú prosesu aprovizionamentu kontratasaun iha tinan ida-ne’e,”Sr. Ministru esplika.

Iha teritóriu timor laran tomak iha suku hamutuk 76 mak seidauk asesu ba enérjia eletrisidade, nune’e Governu sei halo esforsu iha mandatu VIII Governu Konstitusionál nian bele finaliza projetu eletrifikasaun nasionál. Ba área rurál ne’ebé dook husi liña distribuisaun enérjia eletrisidade, Governu liuhosi EDTL,E.P kontinua halo esforsu hodi fornese solar pánel ba komunidade sira.

#Media_MOP

Read More

FALSIFIKA KONTRATU KA AUTORIZASAUN SERVISU, MOP SEI PROSESA BA MP NO PSIK

FALSIFIKA KONTRATU KA AUTORIZASAUN SERVISU, MOP SEI PROSESA BA MP NO PSIK

DILI, 25 MAIU 2021: Ministériu Obras Públikas (MOP) hakarak klarifika ba públiku katak kontratu ka autorizasaun servisu ba kompañia CONSORCIO UNIDO DESENCOLVIMENTO.Lda (naran kompañia tuir karta falsu ne’e) atu hala’o projetu loke estrada alternativu husi suku Laku-Mesak, Uma Naruc, Uma Caduac, Estrada Laclo - Hatuconan munisípiu Manatuto ne’e falsu, tanba ne’e Ministériu Obras Públikas sei hato’o keixa ba autoridade kompetente liuliu Ministériu Públiku (MP) no Polísia Sientífiku Investigasaun Kriminál (PSIK) hodi prosesa autór ba falsifikasaun ne’e tuir dalan legál.

Karta ne'e lansa husi ema inresponsável ho karimbu no asinatura FALSU husi S. Exa, Ministru Obras Públikas (MOP), Arq. Salvador Eugénio Soares dos Reis Pires, ho data 21/06/2020.

Hakarak Informa ba públiku, seitór privadu nasionál no internasionál sira katak; Diresaun Nasionál Aprovizionamentu (DNA-MOP) núnka produz dokumentu sira ne’e sem prosesu administrasaun bazeia ba lei no regras sira ne’ebé vigora. Gabinete Ministru, liuliu Sr. Ministru rasik núnka autoriza kualker aktus ne’ebé la liuhosi prosesu legál, no sei la tolera hahalok sira ne’e.

Ministériu Obras Públikas husu kompañia ne’ebé naran mensiona iha dokumentu Falsu ne’e atu labele mobiliza ekipamentu ba prosesu konstrusaun loke estrada iha suku sira ne’ebé mensiona.

Husu nafatin ba kompañia Nasionál ka Internasionál sira katak, bainhira hetan ou simu dokumentu Falsu hanesan ne’e, halo favor informa autoridade kompetente no ba Ministériu kompetente hodi prosesa tuir autór ba falsifikasaun sira ne’e.

#Media_MOP

  

Read More

MOP HUSU KARGU SEFIA SIRA ATU DEKLARA RIKU-SOIN BA KAK

MOP HUSU KARGU SEFIA SIRA ATU DEKLARA RIKU-SOIN BA KAK

DILI, 21 MAIU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, husu ba kargu sefia sira iha Ministériu Obras Públikas hodi deklara riku-soin ba Komisaun Anti Korupsaun KAK tuir despaxu ne’ebé Sr. Ministru rasik haruka ona ba Diresaun sira.

“Lei ejiji kargu sefia hotu atu halo deklarasaun riku-soin ita-boot sira-nia bens no interese pesoál, iha Konsellu Ministru anunsia katak tarde liu fulan-Jullu ne’e tenke hatama ona, ita-boot sira-nia deklarasaun interese pesoál sira,” Sr. Ministru Obras Públikas informa iha enkontru ho kargu sefia sira hanesan Diretór Jerál, Inspetur Jerál, Diretór Nasionál sira, Xefe departamentu, xefe Seksaun no Assesór sira kona-ba Ezekusaun OJE 2021 2021, iha Novu Turizmu, Dili.

Despaxu Sr. Ministru nian haruka ona ba kargu sefia sira ho formuláriu husi Komisaun Anti Korupsaun (KAK) atu priense, maibé karik iha defikuldade ruma bele kria enkontru ruma ho parte KAK nian hodi esklarese oinsá priense formuláriu refere.

Sr. Ministru rasik, hafoin simu toma posse iha fulan-Junnu tinan 2018, deklara uluk ona riku-soin ba Tribunál Rekursu.

Tuir lei Anti Korupsaun Nú 7/2020 de 26 de Agusto kona-ba Medida Prevensaun no Kombate Korupsaun, iha artigu 29 katak ema ne’ebé iha obrigasaun atu deklara rendimentu, bens no interese mak hanesan, Prezidente Repúblika; deputadu Parlamentu Nasionál; Membrru Governu; Kargu Eleitu Poder Lokál; Majistradu Judisiál; Majistradu Ministériu Públiku; Provedór Direitus Umanus no Justisa ho nia Adjuntu sira; membru Komisaun Nasionál Eleisaun; Defensór Públiku; Embaixadór, konsúl no responsável ba finansas reprezentasaun diplomátiku nian; Retór no dekanu husi universidade públiku sira; Dirijente másimu husi órgaun administrative indireita, autónoma no entidade administrativa independente.

Xefe Kaza Sivíl Prezidente Repúblika nian; Sekretáriu Jerál no Sekretáriu Jerál adjuntu Parlamentu Nasionál; Komisáriu husi Komisaun Anti Korupsaun ho ninia Adjuntu sira; Xefe Gabinete Membru Governu nian; Administradór munisipál no prezidente autoridade munisipál; Prezidente no Sekretáriu Autoridade Rejiaun Administrativa Espesiál Oekusi Ambeno; Diretór Jerál, Diretór no Xefe Departamentu husi Administrasaun Públika direita, indireita no auónoma, inklui ho servisu sira iha Prezidente Repúblika, Parlamentu Nasionál no Tribunál sira, nune’e mós entidade administrativa independente.

Diretór Jerál, diretór no xefe departamentu husi administrasaun autarkia lokál nian; Dirijente no funsionáriu sira ne’ebé ligadu ho aprovizionamentu no kontratasaun públika; Dirijente no funsionáriu sira ne’ebé ligadu ho likidasaun no kobransa impostu; Dirijente no funsionáriu sira ne’ebé ligadu ho likidasaun no kobransa ba direitu aduanéiru; Dirijente no funsionáriu sira ne’ebé ligadu ho jestaun ba rai, propriedade imobiliária no patrimóniu Estadu nian hirak seluk no mós autarkia lokál nian; Dirijente no funsionáriu sira ne’ebé ligadu ho inspesaun, supervizaun no auditoria; Ofisiál justisa iha Tribunál sira, Ministériu Públiku no Defensoria Públika; Membru sira husi polísia investigasaun kriminál no Servisu Migrasaun; no Asesór husi gabinete membru Governu nian.

Iha artigu 30 husi lei ne’e kona-ba Deklarante nia agregadu família maka; Deklarate fó informasaun kona-ba rendimentu, bens no interese, obrigasaun no despeza husi ninia membru agregadu família nian. Membru agregadu família deklarante nian mak feen-laen ka ema ne’ebé nia moris hamutuk hanesan kaben-nain, oan menór ka iha dependénsia ekonomia ba nia no ema sira ne’ebé iha dependénsia ekonomia ba nia.

#Media_MOP 

Read More

TÉKNIKU MOP PARTISIPA IHA APREZENTASAUN TELEKONFERÉNSIA BA PROGRESU SERVISU HUSI KONSULTANTE (IFC) BA FAZE INÍSIU

TÉKNIKU MOP PARTISIPA IHA APREZENTASAUN TELEKONFERÉNSIA BA PROGRESU SERVISU HUSI KONSULTANTE (IFC) BA FAZE INÍSIU ESTUDU VIABILIDADE BA PROJETU AFFORDABLE HOUSING/ HABITASAUN HO PRESU AKSESÍVEL ATRAVEZ HUSI MODALIDADE PPP

DILI, 14 MAIU 2021: Ekipa tékniku Ministériu Obras Publikas (MOP) kompostu husi Diresaun Jerál Habitasaun no Urbanismo (DGHU), Diresaun Nasionál Edifikasaun (DNE), asesór Gabinete Ministru no Vise-Ministru, tékniku Planeamentu Urbanu no Habitasaun no ekipa tékniku husi Unidade Parseria Publico-Privada (PPP) Ministériu Finansas ne’ebé hamutuk hamahon-an iha Project Evaluation Team (PET) ba projetu Estudu Viabillidade Habitasaun ho Presu Aksesivel, partisipa iha enkontru telekonferénsia ho ekipa Banco Mundial liu-husi International Finance Coorporation (IFC) iha Timor-Leste no rai-liur.

Enkontru ne'e halo ho objetivu atu trasa servisu konsultante IFC nian ba faze inisiu projetu, ne’ebé hahuu ho estudu viabilidade ba iha area designadu ba habitasaun iha Hali-Dolar, Hera. Koalia mos kona-ba akontesimentu inundasaun iha inisiu fulan Abril ne’ebé fo risku ba populasaun sira-nia seguransa moris, propriedade no meius hodi sustenta moris. Iha mos diskusaun kona-ba projetu sira ne’ebé la'o ona iha passadu inklui ninia jestaun no rezultadu estudu iha area refere hodi bele fo hanoin kona-ba planu estratejiku inklui mos ho meius hodi halo mitigasaun ba risku sira liu-liu liga ho fator ambiente. Iha enkontru ida ne'e ekipa mos identifika lakunas no obstakulu sira inklui pandemia COVID-19 ne’ebé aprezenta difikuldade no prejudika ba timeline servisu ne’ebé hatuur ona iha agreamentu Financial Advisory Service Agreement (FASA).

Haktuir akordu ne’ebé asina ona entre Governu Timor-Leste reprezenta husi Ministériu Obras Publikas (MOP) no Ministériu Finansas (MF) ho IFC iha loron 22 fulan-Dezembru 2020 liubá foka ba inisiasaun estudu viabilidade hodi harii uma ka habitasaun foun hamutuk unidade 2,000 iha área Halidolar-Hera no iha futuru sei implementa iha eis Merkadu Komoro ne’ebé identifikadu ona husi Ministériu Justisa liuhosi Diresaun Jeral Teras no Propriedade iha tinan 2019 liubá.

Orsamentu ba estudu harii habitasaun ne’e aprova ona iha reuniaun Konsellu Administrasaun Fundu Infraestrutura (KAFI) bainhira aprezenta husi S. Exa, Vise Ministru Obras Públikas (V-MOP), Eng. Nicolau Lino Freitas Belo, iha reuniaun KAFI, tinan 2020.

Faze estudu, avaliasaun, no prosesu aprovisionamentu ba harii habitasaun foun iha Hera, sei hala’o durante tinan ida ho balun (fulan 18) no ho orsamentu hamutuk USD $550,000.00. Faze inisiu husi estudu viabilidade ne'e rasik sei haan tempu fulan sia (9), no sei tuir kedas ho faze seluk no tuir jestaun PPP nian.

Planu no polítika Governu Konstitusionál daualu (VIII) nian iha área habitasaun no urbanizmu mak oinsá organiza di’ak liután kapitál Dili, nune’e Governu esforsu aan atu harii uma ba komunidade ho organizadu ho tipu presu asesível no resiliente ba mudansa klimátika, no iha ne'ebé populasaun ho rendimentu ki’ik sira bele asesu ba.

#Media_MOP 

Read More

EKONSTRUKSAUN ESTRADA IHA EMBAISADA JAPAUN NIA OIN ATINJI 100%.

 EKONSTRUKSAUN ESTRADA IHA EMBAISADA JAPAUN NIA OIN ATINJI 100%.

DILI, 18 Maiu 2021 : S.Exa Ministru Obras Públikas Arq Salvador Eugénio Soares dos Reis Pires Akompaña S.Exa. Primeiru Ministru, Sr. Taur Matan Ruak hodi observa rekonstruksaun estrada iha Embaisada Japaun oin.

Estrada refere rekonstroi husi kompañia Nasionál Montaña Diak Unipesoal Lda no atinji ona pursentu 100 (100%).

#Media_MOP

Read More

MOP ORIENTA DIRETÓR SIRA BA PROSESU REKOPERASAUN ESTRAGUS 04 ABRIL 2021

MOP ORIENTA DIRETÓR SIRA BA PROSESU REKOPERASAUN ESTRAGUS 04 ABRIL 2021

DILI, 18 MAIU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, realiza enkontru ho Diretór Jerál Administrasaun no Finansas (DJAF), Sr. Januário Barbosa, Diretór Jerál Obras Públikas (DJOP), Sr. Rui Hernani, no Jerente Unidade Manajementu Projetu (PMU) estrada, Sr. Sidónio da Costa Freiras, hodi fó orientasaun kona-ba prosesu rekoperasaun estragus estrada no ponte kauza husi inundasaun 04 Abril 2021.

Sr. Ministru orienta diresaun sira atu kolabora másimu ho Koordenadór Ekipa Tarefa Infraestrutura, Sr. Benjamin de Oliveira Hopfer Silva Martíns, ba prosesu preparasaun no rekoperasaun estragus iha kalamidade 04 Abril.

Aliende ne’e, koordenasaun no fó mós orientasaun servisu ba Diretór Nasionál no Xefe Departamentu foun sira hodi hala’o servisu ho di’ak liután.

Iha enkontru ne’ebé partisipa mós husi Xefe Gabinete MOP, Sr. Eduardro Magno Moisés, no tékniku sira.

#Media_MOP 

Read More

PROGRESU REKONSTRUSAUN ESTRADA EMBAIXADA JAPAUN OIN ATINJI ONA 96%

PROGRESU REKONSTRUSAUN ESTRADA EMBAIXADA JAPAUN OIN ATINJI ONA 96%

DILI, 16 MAIU 2021: S. Exa, Ministru Obras Pùblikas (MOP), Arq. Salvador Eugénio Soares dos Reis Pires, kontinua orienta tékniku sira hodi akompaña projetu emerjénsia ba rekonstrusaun estrada protokolu iha embaixada Japaun oin, no daudauk tau ona hampar aspalting, ho persentajen atinji ona 96%.

Rekonstrusaun permanente ba estrada protokolu ne'e hala'o ho emerjénsia husi kompañia Montana Diak, daudauk ne'e atinji ona pursentu 96 (96%) no kompañia kontinua halo esforsu hodi finaliza iha tempu badak.

Rekonstrusaun ba estrada refere hala'o hahu iha loron 20 fulan-Abril 2021, hafoin hetan desizaun husi Konsellu Administrasaun Fundu Infraestrutra (KAFI) no realizasaun kontratu ba kompañia konstrutór hodi konstrui estrada ne'e ho emerjénsia.

#Media_MOP

Read More

E.P no I.P TUTELA RELATA PROGRESSU SERVISU, EZEKUSAUN OJE 2021 INKLUI DEZAFIU SIRA IHA I TRIMESTRE BA MOP

E.P no I.P TUTELA RELATA PROGRESSU SERVISU, EZEKUSAUN OJE 2021 INKLUI DEZAFIU SIRA IHA I TRIMESTRE BA MOP

DILI, 10 MAIU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, realiza enkontru ho instituisaun tutela hanesan Eletrisidade Timor-Leste Empreza Públika (EDTL,E.P), ho Autoridade Nasionál Eletrisidade Institutu Públiku (ANE,I.P), Bee Timor-Leste (BTL,E.P) ho Autoridade Nasionál Água no Saneamentu (ANAS,I.P), Institutu Jestaun Ekipamentu (IJE,I.P) hamutuk ho Diresaun Jerál Administrasaun no Finansas (DJAF) aprezenta no relata dezafiu, progressu servisu, ezekusaun planu no programa iha Orsamentu Jerál Estadu (OJE) 2021, atendimentu ba kalamidade 04 Abril 2021, inklui planu no programa ne’ebé sei implementa iha futuru.

“Ohin ami enkontru primeira véz ho instituisaun Empreza Públikas no mós Institutu Públikas ne’ebé rezulta husi reforma institusionál ne’ebé ita halo iha tinan kotuk (2020), foin tinan ida-ne’e sira operasionaliza ofisialmente hanesan empreza, ohin ha’u konvoka reuniaun ho dirijente sira atu haree sira-nia atividade estabelesimentu no mós ezekusaun orsamentál kada instituisaun no dezafiu sira ne’ebé instituisaun sira hasoru, ne’e mak ohin ami halo enkontru,” S. Exa, Ministru Obras Públikas, Arq. Salvador Eugénio Soares dos Reis Pires, informa ba jornalista sira iha Novu Turizmu, hafoin enkontru ho dirijente sira.

Durante enkontru ne’e dirijente Empreza Públika no Institutu Públika ne’ebé tutela ba MOP relata dejafiu sira hafoin EDTL, E.P no BTL,E.P operasionaliza hanesan Empreza Públiku inklui nia autoridade nasionál sira ne’ebé hahú hala’o servisu iha inísiu tinan ida-ne’e.

EDTL no BTL hanesan empreza públika iha inísiu tinan ne’e kedas hamutuk ho Komisaun Funsaun Públikas (KFP) halo transferénsia funsionáriu públika sira ne’ebé foti lisensa sein vensimentu ba tinan ida hodi servisu ba empreza no rekrutamentu rekursu umanu ba tarefa sira, Aliende rekrutamentu simultañamente EDTL no BTL mós tenke prepara ba ezekusaun atividade husi orsamentu ne’ebé orsamenta ona iha tinan fiskál 2021 nian para ezekuta. No hanesan empreza públika independentemente haree mós servisu korporativu interna, prosesu administrativu no sistema finanseiru sira, nune’e iha enkontru ne’e ko’alia liu kona-ba prosesu dezenvolvimentu, estabelesimentu interna no mós preparativus ba ezekusaun atividade sira.

“Programa eletrifikasaun nasionál ne’ebé sira foin finaliza iha prosesu dokumentasaun, iha tempu badak atu halo tenderizasaun ba sosa materiál no hahú halo instalasaun ba 34 sukus uluk, no tenderizasaun kombustível aranjementu ne’ebé sira tenke halo hanesan ho Timor Gap, CNA (Komisaun Nasionál Aprovizionamentu) haree tenderizasaun prosesu sira ne’ebé la’o hela, nia dezafiu saida, ohin sira relata ida-ne’e. Daudauk ne’e sira prepara hela projetu ba atu liberta postu administrativu 35 ne’ebé mak ita orsamenta ba atividade normál tinan ida-ne’e,”Sr. Ministru informa.

Sr. Ministru hatutan “Ba EDTL iha orsamentu ba tinan ida-ne’e millaun 157, no pursentu 90 liu ne’e ita halo akizasaun ba kombustível, iha mós osan oituan iha kapitál dezenvolvimentu hodi dada liña distribuisaun ba suku sira ne’ebé seidauk hetan liña distribuisaun eletrisidade no BTL mós hanesan sira iha 36 milloens, klaru ke primeiru transferénsia husi Ministériu Finansas pursentu 50. Projetu atu liberta postu administrativu 35 ne’ebé mak ita orsamenta ba atividade normál tinan ida-ne’e”.

Aliende ne’e, akontese kalamidade 04 Abril 2021 estragus infraestrutura, liuliu sistema bee-moos no estraga riin eletrisidade balun iha kapitál Dili. Kona-ba bee-moos daudauk ne’e BTL kontinua halo reparasaun, rekonstrusaun ba sistema intake Benamauk ne’ebé fornese bee-moos mai kapitál Dili, espera katak iha tempu badak bele hadi’ak hikas sistema fornesimentu bee ba komunidade, liuliu ba komunidade sira ne’ebé hela iha área sira hanesan Kakaulidun, Bairru-Pité, Manleuanna no mós Palpasu, inklui área seluk ne’ebé asesu bee husi bee-moos Menlauanna nian, no sistema intake bee-moos seluk kuaze rekoperadu hotu ona no husi bomba 26 iha kapitál Dili, hela ida, iha Kamea mak seidauk normaliza maibé ekipa tékniku kontinua halo esforsu hodi normaliza iha tempu badak.

Enkontru ne’e, Diretór Jerál Administrasaun no Finansas (DJAF), Sr. Januário Barbosa, ho Diretór Nasionál sira, Prezidente EDTL, E.P, Sr. Paulo da Silva, ho Vise, Prezidente BTL,E.P, Sr. Carlos Peloi dos Reis, vo Vise, Prezidente IJE,I.P, Sra. Hermenegilda da C. Laurentina, Prezidente ANE,I.P, Sr. Ruben Jerónimo Freitas, ho vogál, Prezidente ANAS,I.P, Sr. Domingos Pinto, ho vogál sira aprezenta servisu, planu no dezafiu sira ba Sr. Ministru oinsá bele hadi’ak iha futuru.

Ikus liu, Sr. Ministru agradese no kontente ho servisu sira ne’ebé instituisaun ida-idak hala’o ona iha I trimester no orienta kontinua halo servisu maka’as ho di’ak liután hodi halo ezekusaun ba planu no programa ne’ebé programadu ona iha OJE tinan fiskál 2021 nian.

Iha enkontru ne’e, partisipa mós husi Xefe Gabinete MOP, Sr. Eduardo C. M. Magno Moisés, inklui tékniku sira.

#Media_MOP

 

Read More

Tékniku MOP Partisipa Iha Aprezentasaun Telekonferénsia Ba Progresu Relatóriu Esbosu Final Ba Projetu Estudu Viabilidade No DED Ba Sidade Universitaria, Aileu

Tékniku MOP Partisipa Iha Aprezentasaun Telekonferénsia Ba Progresu Relatóriu Esbosu Final Ba Projetu Estudu Viabilidade No DED Ba Sidade Universitaria, Aileu

DILI, 06 ABRIL 2021: Ekipa tékniku Ministériu Obras Publikas (MOP) kompostu husi Diresaun Jerál Habitasaun no Urbanismo (DGHU), Diresaun Nasionál Edifikasaun (DNE), asesór Gabinete Ministru, tékniku Planeamentu Urbanu no Habitasaun no ekipa tékniku husi Ministériu Ensinu Superior, Siensia no Kultura (MESSK) ne’ebé hamutuk hamahon-an iha Project Steering Committee (PSC) ba projetu Estudu Viabillidade no Dezenu Enjineiru Detalladu (DED), partisipa iha enkontru telekonferénsia ho team leader no péritu sira husi konsultant internasionál BERNABAD ARQUITETURA, SLP iha Timor-Leste no Espana.

Enkontru ne'e halo husi maneira online no husi salaun enkontru iha MESSK iha Dili ho objetivu atu trasa servisu konsultan nian ho rigór, tuir timeline servisu ne’ebé válidu ba projetu Sidade Universitaria, Aileu ne'ebé mak daudaun to'o ona iha faze aprezentasaun Draft Final Report ba Estudu Viabilidade nian tuir rekerimentu termu da referencia no konsiderasaun tekniku sira. Wainhira relatorio final hetan ona aprovasaun husi PSC mak konsultor sei aprezenta faze tuir mai, relatoriu inisiu DED.

Espesífiku liu, enkontru iha Quinta-feira liu ba (06/05/2021) foka ba aprezentasaun sira iha area hirak tuir mai ne'e:

1) Dezenvolvimentu Estudu Viabilidade ne’ebe kabe ba aspetu fiziku (konsultan akresenta survey topografia no geotekniku liga ba kondisaun no karateristika rai iha area estudo hodi harii universidade no area risku sira), sosial no ekonomiku no transporte, no iha faze DED sei iha analize ba aspetu merkadu no finanseiru;

2) Dezenvolvimento ba dezenu preliminariu no aprosimasaun arquitetural ba area refere kompletu ho fasilidade essensiais universidade nian. Sei iha mos sesaun aprezentasaun ketak ba PSC hodi hatuur opsaun no alternativa ba dezenu nian;

Iha biban ne'eba, konsultant mos identifika obstakulu sira inclui pandémia globál COVID-19 ne'ebe konsegue halo atraza iha parte planu servisu no implementasaun sira iha terrenu tuir timeline ne'ebe mak iha ona.

Husi parte PSC ne’ebé lidera husi Diretór Gerál, Sr. Roger Tertuliano Belo, halo esforsu atu revé no avalia servisu konsultan nian, hodi fó rekomendasaun pertinente atu bele asegura kualidade estudu.

Hamahon-an iha PSC mós inklui donu de projetu rasik - Ministériu Ensinu Superior, Siensia no Kultura - no fasilitadór Ministériu Obras Públikas, hamutuk ho Ministériu Planu no Ordenamentu (MPO), Ajénsia Dezenvolvimentu Nasionál (ADN).

#Media_MOP 

Read More

PROGRESU SERVISU REKONSTRUSAUN ESTRADA PROTOKOLU EMBAIXADA JAPAUN OIN

Progresu Servisu Rekonstrusaun Estrada Protokolu Embaixada Japaun Oin

DILI, 06 MAIU 2021: S. Exa, Ministru Obras Publikas (MOP), Arq. Salvador Eugénio Soares dos Reis Pires, kontinua orienta ekipa tékniku akompaña progressu servisu rekonstrusaun estrada protokolu iha embaixada Japaun oin, hodi garante projetu emerjénsia ne'e bele iha kualidade ne'ebé di'ak.

Progresu rekonstrusaun to'o ohin loron mak:

1. Preparasaun ba kontinuasaun ateru sub base course no kompaksaun.

2. Kontinuasan ba servisu ateru RIPRAP hodi proteze tasi-been baku / tama direita ba moru retensaun.

3. Preparasaun mós ba fase kontinuasaun base course no aspalting.

4. Installasaun  pipa 2inci no 5inci, hodi kria sirkulasaun bee ne'ebé konsentra iha estrutura estrada nia okos hodi sai ho di'ak no sei la prejudika estrada nia estrutura.

Rekonstrusaun permanente ba estrada protokolu ne'e hala'o ho emerjénsia husi kompañia Montana Diak, daudauk ne'e atinji ona pursentu 70 (70%) no kompañia kontinua halo esforsu no sei finaliza tempu badak.

#Media_MOP

 

Read More