DILI, 22 JUNNU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha 'Konsellu Interministerial ba Protesaun Xívil no Jestaun ba Dezastre Naturais' hodi halo análiza ba responde dezastre naturais, ne'ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.
 |
Iha konsellu interministeriál ne'e, Sr. Ministru Obras Públikas aprezenta dadus sobre intervensaun ba estragus ne'ebé realiza ona, faze dezenvolvimentu ba projetu emerjénsia hotu tuir prosesu aprovizionamentu nian para responde ka rekoperasaun estragus husi inundasaun iha loron 13 fulan-Marsu 2020 iha kapitál Dili.
Aliende ne'e, kontinua garante fornesimentu eletrisidade ho seguru, melloramentu ba sistema kanalizasaun bee-moos, inklui servisu emerjénsia ba limpeza drenajen, normalizasaun mota no konstrusaun ba moru protesaun sira.
Sr. Ministru mós aprezenta dadus sira kona-ba manutensaun no rehabilitasaun estrada no ponte iha Kosta Súl, ne'ebé hetan estragus afeita husi inundasaun iha fulan-Maiu 2020 nia-laran.
Durante enkontru, Ministériu sira aprezenta kona-ba servisu no atendimentu públiku durante periódu Estadu Emerjénsia.
Ikus liu, S. Exa, Primeiru Ministru (PM), Sr. Taur Matan Ruak, kongratula esforsu tomak husi ministériu sira-nian ne'ebé rápidamente responde ba estragus afeita husi dezastre naturais. Sr. Primeiru Ministru mós salienta katak karik iha nesesidade bele halo estudu integradu hodi mellora planeamentu no ezekusaun ba projetu infraestrutura nasionál, nune'e bele iha kualidade no augenta ho eklima ne'ebé iha.
Konsellu Interministeriál ba Protesaun Xívil no Jestaun ba Dezastre Naturais ne'e partisipa husi Vise Primeira-Ministra Asuntu Sosial no Ministra Solidariedade Sosial & Inkluzaun, (Vise-PM no MSSI), Ministru Koordenador ba Assuntus Ekonómikus (MKAE), Ministru Defeza no Ministru Interior Interinu (MDI), Ministru Finansas MF), Sr. Fernando Hanjam, Ministru Negósius Estrajeirus no Kooperasaun, Ministru Administrasaun Estatal, Ministra Saúde, Ministru Obras Públikas, Ministru Transportes & Komunikasõens, Ministru Agrikultura & Peskas.
Aliende ne'e partisipa mós husi membru Unidades husi Missaun ba Protesaun Xívil no Jestaun ba Dezastres Naturais hanesan, Sekreráriu Estadu ba Protesaun Xívil, Sekretáriu Estadu ba Komunikasaun Sosial, Xefe Estadu-Maior Jeneral Forsas Armadas, Komandante-Jeral Polísia Nasional Timor-Leste (PNTL), Diretor ba Sentru Integradu Jestaun ba Krize, Diretor Naional hosi Diresaun Nasional ba Jestaun Riskus hosi Dezastres, inklui entidade seluk mak hanesan Koordenadór ba Sala Situasaun husi Sentru Integradu Jestaun ba Krize no Membrus husi Grupus Servisu Téknikus ba Identifikasaun Infraestruturas no Ekipamentus Públikus.
