KONSTRUSAUN ESTRADA BAUKAU-VIKEKE BA LOT I HAHÚ HIKAS SERVISU

BAUKAU, 30 MAIU 2020: Konatrusaun estrada nasionál husi munisípiu Baukau ba Vikeke liuliu iha Lot I husi kapitál munisípiu Baukau to'o postu administrativu Venilale ohin loron 30 fulan-Maiu tinan 2020 hahú hikas konstrusaun hafoin Timor-Leste livre husi moras COVID-19, maibé traballadór sira mós sei kumpri nafatin regra Estadu Emerjénsia nian liuliu mantein distánsia sosiál ba prevensaun KOVID-19.

Projetu estrada nasionál ne'e kontrui husi kompañia Internasionál CRIG-COVEC.

Lansamentu fatuk dahuluk ba konstrusaun estrada Baukau-Vikeke hala'o husi S. Exa, Ministru Obras Públikas (MOP), Arq. Salvador Eugénio Soares dos Reis Pires, iha loron 09 fulan-Agostu tinan 2019.

Projetu estrada ne'e iha Lot 2, Lot primeiru mak husi Baukau to'o Venilale no Lot segundu mak husi Venilale to'o Vikeke. Hafoin lansamentu kompañia konstrutór no superizór mobiliza kedas ekipamentu pezadu no halo levantamentu dadus ba resentelmente ka indiminizasaun ba komunidade nia ai-horis ne'ebé afeitadu husi konstrusaun ne'e rasik.

Konstrusaun estrada nasionál trosu Baukau-Venilale no Venilale-Vikeke ne’e ho distánsia Kiloemetru 58 resin, ho orsamentu millaun 44 dollar Amerikanu, fundu impréstimu husi Banku Dezenvolvimentu Aziátiku (ADB).

Konstrusaun projetu ne'e sei hala'o durante tinan tolu (3) nia-laran, hahú husi fulan-Agostu tinan 2019 no sei termina iha fulan-Fevereiru tinan 2022.

#Media_MOP

Read More

KONSELLU MINISTRU APROVA MEDIDA EZEKUSAUN BA RENOVASAUN DEKLARASAUN ESTADU EMERJÉNSIA

DILI, 29 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru extraordinária ne'ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Reuniaun Konsellu Ministru ne'e hahú sesaun dahuluk ho mensajen boas-vindas husi Primeiru Ministru ba membru Governu foun sira no mós agradese ba membru Governu sesante sira no membru sira ne’ebé substitui membru sira ne’ebé la simu posse tan sira-nia esforsu no dedikasaun durante ezerse sira-nia funsaun iha VIII Governu Konstitusionál.

Konsellu Ministrus aprova tiha projetu Dekretu Governu ne’ebé aprezenta husi S. Exa, Primeiru-Ministru, Sr. Taur Matan Ruak, kona-ba medidda ezekusaun renovasaun deklarasaun Estadu emerjénsia ne’ebé efetua husi Dekretu Prezidente Repúblika nian Nº. 35/2020 loron-27 fulan-Maiu nian, hodi hatán ba Pandémia KOVID-19. Estadu emerjénsia ne’e abranje ba territóriu nasionál tomak no vigora entre oras 00.00 iha loron-28 fulan-maiu 2020 (kinta-feira) no sei ramata iha oras 23.59 iha loron-26 fulan-juñu 2020 (sesta-feira).

Konjuntu medida ne’ebé Governu adopta ne’e ho objetivu halo prevensaun no kontrolu ba surtu husi KOVID-19 ruma ne’ebé bele mosu karik iha Timor-Leste no medida hirak-ne’e bele kontribui atu labele eziste infetadu ho vírus SARS-Cov-2 iha territóriu nasionál. Maske nune’e, importante tebes atu bele kuidadu didi’ak hodi la hamosu risku no hatama fali koronavirus foun.

Tan ne’e, kona-ba Dekretu Governu nº. 8/2020 loron-30 fulan-abril nian, sei mantein medida hirak kona-ba sirkulasaun internasionál no Primeiru-Ministru mós bele fó autorizasaun esesionál atu ema estranjeiru bele tama mai território nasionál, ba kazu ruma ne’ebé tenke fundamenta duni, kona-ba laborasaun ba empreza sira.

Sei mantein medida hotu-hotu ne’ebé uluk ba hatuur ona liuliu, kona-ba oinsá halo kontrolu sanitáriu ba ema sira ne’ebé tama no sai iha territóriu nasionál no sirkulasaun iha territóriu nasionál no fiksasaun rezidénsia. Liuhosi despasu, Ministru Interiór bele determina atu temporariamente taka lai postu fronteira sira.

Kona fali ba medida ba administrasaun públika, iha Dekretu Governu hateten katak servisu públiku tenke funsiona normál no atu halo ida-ne’e tenke asegura katak halo distánsia mínimu metro ida ho balu entre indivídu no tenke uza máskara protesaun no fase-liman molok tama ba espasu públiku sira.

Estabelesimentu ensiñu pré-eskolár, ensiñu báziku, ensiñu sekundáriu, ensiñu superior no formasaun profisionál ka tékniku-vokasionál bele realiza fila-fali ona atividade letiva sira liuhosi rejime prezensiál, naran katak kumpri norma téknika ne’ebé sei aprova husi Ministériu Saúde, Ministériu Edukasaun, Juventude no Desportu no Ministériu Ensiñu Superiór, Siénsia no Kultura.

Ho Dekretu-Lei ne’e sei mantein regra hotu atu halo asesu no permanénsia iha resintu sira merkadu nian no sei hasai limitasaun hirak ne’ebé relasiona ho atividade ekonómika privada. Sei la limita tan ona atividade relijioza, desportivu no direitu atu halo greve ka manifestasaun.

Durante Estadu emerjénsia vigora sei mantein válidu lisensa, autorizasaun sira no aktu administrativu no dokumentu seluktan, la haree ba prazu validade ne’ebé iha.

Sekretáriu Estadu protesaun Sivil, Alexandrino de Araújo, halo aprezentasaun ida ba Konsellu Ministrus kona-ba planu atu halo rekuperasaun, apoiu ne’ebé fornese ona no nesesidade atu halo intervensaun hodi hatán ba estragu ne’ebé hamosu ona no hodi fó apoiu ba populasaun sira afetadu husi inundasaun ne’ebé akontese iha seman hirak ikus ne’e iha zona leste no kosta súl nasaun ne’e nian.

#Media_MOP

Read More

MOP PARTISIPA SERIMÓNIA TOMADA DE POSSE BA MEMBRU GOVERNU NA'IN 8 IHA PALÁSIU PR

DILI, 29 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, Sesta-feira ne'e partisipa Serimónia Tomada de Posse husi Prezidente Repúblika (PR), Sr. Francisco Guterres 'Lu-Olo' ba membru Governu na'in 8 hodi kompleta oitavu (VIII) Governu Konstitusionál iha Palásiu Prezidensiál Nicolau Lobato, Bairru Pité, Dili.

Membru Governu na'in 8 ne'ebé simu posse husi Xefe Estadu mak hanesan Vise Primeira Ministra, Sra. Armanda Berta dos Santos, Ministru ba Prezidénsia Konsellu Ministru, Sr. Fidelis Leite Magalhães, Ministru ba Assuntu Parlamentares no Komunikasaun Sosiál, Sr. Francisco Martins da Costa Perreira Jerónimo, Ministru Finansas, Sr. Fernando Hanjam, Ministru Administrasaun Estatal, Sr. Miguel Pereira de Carvalho, Ministra Saúde, Sr. Odete Maria Freitas Belo, Ministru ba Assuntu Kombatentes Libertasaun Nasionál, Sr. Júlio Sarmento da Costa ‘Meta Mali’, Ministru Agrikultura no Peskas, Sr. Pedro dos Reis.

Serimonia tomada de posse ne'e partisipa husi S. Exa, Prezidente Parlamentu Nasionál (PN), Sr. Aniceto Guterres, S. Exa, Primeiru Ministru (PM), Sr. Taur Matan Ruak, no S. Exa, Prezidente Tribunál Rekursu (TR), Sr. Deolindo dos Santos, Xefe Estadu Maior Jenerál das F-FDTL, Maijór Jenerál, Lere Anan Timur, Komandante husi PNTL.

Aliende ne'e partisipa mós husi eis Primeiru Ministru (PM), Ar. Mari Alkatiri, membru Governu, membru Parlamentu, reprezentante korpu diplomátiku, reprezentante Ajénsia Internasionál, reprezentante Sosiedade Sivíl inklui eis titulár sira.

#Media_MOP

Read More

MOP REALIZA ENKONTRU HO DIRETÓR SIRA, KORDENA PREPARASAUN BA OJE 2020 NO AVALIASAUN BA SERVISU

DILI, 28 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, realiza enkontru ho Diretór Jerál no Nasionál sira hodi orienta halo preparasaun ba proposta Orsamentu Jerál Estadu (OJE) 2020 nian husi kada diresaun no hanoin kedas ona halo preparasaun ba OJE 2021 nian.

Iha enkontru ne'e halo mós avaliasaun ba servisu kada diresaun nian liuliu relasaun ho projetu emerjénsia ba atendimentu no rekoperasaun estragus sira iha área estrada, ponte, eletrisidade no kanalizasaun bee sira durante akontesimentu inundasaun iha Timor laran tomak.

Sr. Ministru mós orienta Diretór sira atu hahú estudu no dezeñu detalladu ba projetu ne'ebé sei implementa iha tinan ida-ne'e no iha tinan oin, liuliu projetu estrada no ponte no eletrisidade no kanalizasaun bee-moos bainhira OJE aprovadu no promulgadu.

Enkontru ne'e partisipa husi Diretór Jerál Administrasaun Finansas (DGAF) ho nia diretór nasionál sira, Diretór Jerál Obras Públikas (DGOP) ho nia diretór nasionál sira, Diretora Jerál Eletrisidade (DGE) ho nia diretór nasionál sira, Diretór Jerál Água no Saneamentu (DGAS) ho nia diretór nasionál sira, inklui husi Diresaun Nasionál Habitasaun no Planeamentu Urbanu (DGHPU).

#Media_MOP

Read More

MOP ATUALIZA BA PM KONA-BA ATUASAUN BA INUNDASAUN IHA KOSTA SÚL NO PARTE LESTE

DILI, 25 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, Segunda-loraik ne'e hala'o enkontru ho S. Exa, Primeiru Ministru (PM), Sr. Taur Matan Ruak, hodi atualiza kona-ba atuasaun MOP nian ba estragus sira iha Kosta Súl no parte Leste kauza husi inundasaun ne'ebé akontese iha semana kotuk, liuliu iha loron 22 fulan-Maiu tinan ida-ne'e.

Ministru Obras Públikas (MOP), Arq. Salvador Eugénio Soares dos Reis Pires, aprezenta hela relatoriu ba Primeiru Ministru (PM), Sr. Taur Matan Ruak.

Iha atualizasaun ne'e, Sr. Ministru informa katak estragus iha área Obras Públikas nian hanesan rede bee-moos, eletrisidade no estrada no ponte nian iha Kosta Súl no parte Leste hamutuk 28 lokalizasaun. Maske nune'e, MOP liuhosi diresaun sira liuliu Diresaun Jerál Obras Públikas (DGOP) daudauk ne'e kontinua foti dadus ba estragus ne'ebé iha no sei define mós gravidade estragus sira.

Daudauk ne'e ekipamentu pezadu husi Institutu Jestaun Ekipamentus (IGE) destaka iha parte Leste no Súl hodi halo atendimentu normalizasaun iha área refere.

Tuir mai, Intervista kompletu husi jornalista ho Sr. Ministru Obras Públikas hafoin enkontru ho Sr. Primeiru Ministru;

JORNALISTA: Sr. Ministru asuntu ohin enkontru ho Primeiru Ministru?

Sr. MINISTRU: Ohin, ha'u mai hasoru S. Exa, Sr. Primeiru Ministru atu informa de'it kona-ba ita-nia atuasaun ba inundasaun ne'ebé mak akontese tanba udan dezde loron 15 to'o 22 fulan-Maiu ne'e afeita iha parte Leste no mós Kosta Súl no ha'u informa ba S. Exa Sr. Primeiru Ministru katak iha kalan ne'e kedas iha Sesta-kalan, estrada kotu hanesan iha ponte molok Hapikuru (iha Lautém, munisípiu Lautém) no mós Mane-Haat Natarbora-Mantuto nian ita atende kedas tanba ita-nia empreza ne'ebé mak kaer estrada nasionál ne'e CBMI, sira halo hela servisu. Liuhosi Diresaun Jerál Obras Públikas no PMU (Unidade Manajementu Projetu) fó kedas orientasaun ba sira para atu halo rekoperasaun, hanesan mós iha Natarbora-Mantuto nian, ida-ne'e ita fó orientasaun ba sira no sira ba halo kedas atuasaun.

Aliende ne'e, ita mobiliza mós ita-nia rekursu hotu hanesan IGE (Institutu Jestaun Ekipamentus) ou ekipamentu pezadu sira ba ona iha parte Súl no mós parte Leste atu normaliza situasaun iha ne'eba, aumezmu tempu iha Sesta-kalan, ha'u ko'alia ho S. Exa, Sr. Primeiru Ministru no ha'u simu orientasaun katak ami tenke aprezenta dadus ohin, no iha Konsellu Ministru ohin ami aprezenta, no ita-nia ekipa DGOP no mós ekipa Obras Públikas iha munisípiu sira kordena direitamenta ba iha fatin lokalizasaun iha parte Leste no parte Súl. Agora daudauk sira nafatin iha ne'eba, ami kontinua foti dadus kona-ba estragus.

Totál estragus tomak husi área tolu hanesan rede bee nian, eletrisidade no estrada no ponte iha totál 28 lokalizasaun mak agora ita identifika ona no sira kontinua identifika nafatin, ne'ebé ita sei haree hela ida-ne'e, horsida ita sei haree depende ba orsamentu, 5 milloens mai kraik ita lori ba KAFI (Konsellu Administrasaun Fundu Infraestrutura) depois foti desizaun no sei involve husi parte legál sira atu haree, karik projetu sira ne'e balun ne'ebé mak presiza duni emerjénsia tuir rejime jurídiku aprovizionamentu para nia elezibilidade ba ajustus direitu ita halo ida-ne'e, daudauk ne'e ami-nia ekipa sei servisu hela, ita espera katak ita sei halo rekoperasan depois de normalizasaun sira hotu.

JORNALISTA: Iha 28 ne'e karik hira mak konsidera hanesan gráve liu?

Sr. MINISTRU: Ha'u hanoin gráve liu ne'e mak iha parte áreas Obras Públikas nian, ne'e mak Mane-Hat ho ida iha Hapikuru no iha seluk tan ne'ebé téknikamente sira sei halo levantamentu dadus, agora ha'u labele ko'alia detallu lai tanba sei prosesu levantamentu dadus hela.

Ohin ne'e ami aprezenta de'it nia lokalizasaun, nia mapamentu no mós fotografia balun, atu nune'e ita kontinua verifika dadus sira ne'e atu kuantifika, atu ita bele avansa ho rekoperasaun iha tempu badak.

JORNALISTA: Orsamentu iha ona ga lae para halo normalizasaun?

Sr. MINISTRU: Iha orsamentu, sira (tékniku) sei halo hela estimasaun, haree hela nia grau estragus ne'ebé impaktu husi inundasaun ne'ebé foin daudauk akontese ne'e.

JORNALISTA: Ne'e hein orsamentu foun ga oinsa?

Sr. MINISTRU: Horsida ita sei ba iha KAFI mak ita deside kona-ba ida-ne'e.

#Media_MOP

Read More

MOP APREZENTA ATENDIMENTU INUNDASAUN KOSTA SÚL IHA KONSELLU MINISTRU

DILI, 25 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, no Sekretáriu Estadu Protesaun Sivíl (SEPS), Sr. Alezandrino de Araújo, halo aprezentasaun ba reuniaun Konsellu Ministru (KM) ne'ebé lidera husi S. Exa, Primeiru Ministru (PM), Sr. Taur Matan Ruak, kona-ba pontu situasaun intervensaun ba apoiu afeitadu sira no rekoperasaun ba estragus husi inundasaun ne'ebé akontese iha semana kotuk, iha munisípiu sira liuliu Kosta Súl nian ne'ebé estraga habitasaun, edifísiu públiku, estrada no ponte sira.

Iha reuniaun Konsellu Ministru ne'e mós, Governu deside solisita S. Exa, Prezidente Repúblika ba extensaun datoluk Estadu Emerjénsia ba loron 30 tan, ne'ebé Estadu Emerjénsia daruak sei termina iha loron 27 fulan-Maiu tinan ida-ne'e.

Nesesidade extensaun Estadu Emerjénsia tanba iha evolusaun no preokupasaun ba situasaun epidemiolójika no proliferasaun ba kazu COVID-19 ne'ebé kontinua rezistu makaas iha nasaun viziñu Indonesia liuliu iha Timor Osidentál ne'ebé ejiji para kontinua aplika medida extraordinária balun hodi trava pandémia no evita transmisaun infesaun kazu foun husi Coronavirus foun iha teritóriu nasionál.

#Media_MOP

Read More

MOP REALIZA TELE-KONFERÉNSIA HO ADB DISKUTI PROSESU KONSTRUSAUN ESTRADA ROTUNDA TO'O TASI-TOLU

DILI, 22 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Sesta-feira loron 22 fulan Maiu tinan 2020 realiza enkontru Virtuál ou tele-konferénsia ho Country Director Banku Dezenvolvimento Aziátiku (ADB) Mr. Sunil Mitra ho ekipa ADB iha Kuartél Jeráll iha Manila-Filipina.

Iha Inkontru ne’e Sr. Ministru Obras Públikas ko'alia kona-ba preparasaun Governu Timor-Leste nian liuhosi MOP no servisu hamutuk ho Ministériu Finansas atu aselera prosesu preparasaun ba konstrusaun estrada trosu rotunda Presidente Nicolau Lobato ba to'o iha inter-seksaun Tibar nian (Section 1, naruk hamutuk 1,9 KM), Prosesu preparasaun dokumentasaun ba projeitu refere tuir rekizitus ADB nian iha faze revisaun no halo technical due diligence.

MOP Husu ADB nia apoiu atu utiliza balansu (Saldo) husi fundus impréstimu ba projetu sira ne’ebé iha hodi finansia ba estrada refere ne’ebé estratéjiku tebes ba Timor-Leste tamba fasilita no sei hasa'e mobilidade ema no sasán liuliu relasiona ho operasionalizasaun Portu Baya Tibar nian iha Tinan 2021.

ADB sei haree dokumentus sira ne’ebé governu Timor-Leste submete ona, no sei haruka sira-nia péritu mai vizita Dili hodi analiza no avalia prosesu preparasaun, ADB sira mós konsiente katak projetu refere ne'e importante tebes, maibé tamba de'it pandémia Covid-19 sei dada tempu oituan atu avalia didi'ak ba pedidu Governu Timor-Leste nian.

Ministério Obras Públicas mós fó hanoin katak Governo Timor-Leste iha mós akordu ho kompañia ne’ebé agora daudaun halo konstrusaun ba Portu Baya Tibar, katak Estrada refere tenke finaliza iha fulan-Agustu 2021, se lae, tuir akordu, Governu Timor-Leste sei hetan multa no selu osan lubuk ida ba kompañia ne’ebé halo konstrusaun ba Portu Tibar.

Iha Inkontru refere, MOP hetan akompañamentu husi Diretór Jerál Obras Públikas (DGAS) Eng. Rui Hernani Freitas, no Diretór Jerál, Sr. António Freitas, husi Ministériu Finansas (MF).

#Media_MOP

Read More

MOP PROVIZÓRIAMENTE NORMALIZA ONA PONTE KOTU DIRESAUN LAUTÉM-LOSPALOS INKLUI IHA KOSTA SÚL

LAUTÉM, 23 MAIU 2020: Ministériu Obras Públikas (MOP) liuhosi Diresaun Jerál Obras Públikas (DGOP) no Unidade Manajementu Projetu (PMU) orienta kompañia CBMI mak provizoriamente halo normalizasaun ba ponte Ponte Verukoco ne'ebé kotu ou tohar iha postu administrativu Lautém, munisípiu Lautém, tanba kompañia ne'e, daudauk ne'e kaer hela projetu estrada Baukau-Lautém.

Servisu normalizasaun ne'e hala'o iha horikalan tomak no ohin kontinua halo servisu normaliza hodi garante movimentasaun iha fatin refere.

Ponte Verukoco ne'e liga ba postu administrativu Lospalos Villa, tanba ne'e liuhosi normalizasaun ne'e bele ona fasilita movimentasaun komunidade no transporte públiku no privadu iha fatin refere.

Hafoin udan-boot no hamosu inundasaun iha Kosta Súl no iha munisípiu Lautém, S. Exa, Ministru Obras Públikas (MOP), Arq. Salvador Eugénio Soares dos Reis Pires, orienta kedas Diresaun Jerál Obras Públikas (DGOP) no Intitutu Jestaun Ekipamentus (IGE) hodi halo atendimentu emerjénsia.

Tanba ne'e, ekipamentu pezadu IGE nian daudauk ne'e destaka iha Kosta Súl hodi halo atendimentu emerjénsia hodi normaliza konektividade ba movimentasaun komunidade nian no transporte públiku no privadu sira.

#Media_MOP

Read More

MOP ORIENTA EKIPA TÉKNIKU DGOP NO IGE DESTAKA HALO ATENDIMENTU IHA KOSTA SUL INKLUI LAUTÉM

DILI, 22 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hafoin simu informasaun orienta kedas ekipa tékniku Diresaun Jerál Obras Públikas (DGOP) no Institutu Jestaun Ekipamentus (IGE) hodi destaka ba Kosta Sul inklui munisípiu Lautém hodi halo atendimentu emerjénsia no halo levantamentu dadus ba inundasaun no estragus iha munisípiu sira.

Hafoin udan boot iha loron rua hahú husi 21 no 22 fulan-Maiu nian, Kosta Sul munisípiu Kovalima, Manufahi, Natarbora munisípiu Manatuto, Vikeke inklui Lautém iha estragus barak ba estrada no ponte sira inklui komunidade nia rezidénsia no sasán barak tanba inundasaun.

Tanba ne'e, Sr. Ministru Obras Públikas orienta ekipa DGOP no IGE hodi halo atendimentu emerjénsia oinsa normaliza hikas movimentasaun komunidade nian inklui movimentu transporte públiku no privadu.

Hafoin simu orientasaun, IGE sei destaka ekipamentu pezadu sira ba Kosta Sul inklui Lautém hodi halo atendimentu. Ekipamentu pezadu IGE nian antes ne'e destaka ona iha postus balun Kosta Sul nian inklui Lautém hodi halo atendimentus situasaun emerjénsia.

#Media_MOP

Read More

KONSELLU MINISTRU APROVA KALENDÁRIU BA PREPARASAUN OJE 2020

DILI, 21 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, Kinta-feira ne'e partisipa iha reuniaun Konsellu Ministru extraordinária ne'ebé lidera husi S. Exa, Primeiru Ministru (PM), Sr. Taur Matan Ruak, iha auditóriu Kay Rala Xanana Gusmão, iha Ministériu Finansas, Dili.

Iha reuniaun Konsellu Ministru ne'e aprova kalendáriu ba preparasaun Orsamentu Jerál Estadu (OJE) ba tinan fiskál 2020. Tuir kalendáriu ne'ebé aprova proposta Lei sei analiza iha reuniaun Konsellu Ministru iha loron 22 fulan-jullu tinan 2020 no sei submete ba Parlamentu Nasionál até loron 30 fulan-jullu tinan 2020.

Konsellu Ministru mós aprova ona projetu deliberasaun, ne'ebé aprezenta husi S. Exa, Ministru Justisa (MJ), Sr. Manuel Cárceres da Costa, kona-ba autorizasaun exsesionál utilizasaun verba kapitál menor iha rejime duodesimál. Deliberasaun ida-ne’e atu fó dalan ba pagamentu servisu prestadu fornesimentu ekuipamentus informátiku no mobiliáriu ba Ministériu Justisa.

S. Exa, Ministra Finansas (MF) iha ezersísiu, Sra. Sara Lobo Brites, aprezenta mós projetu deliberasaun, ne'ebé hetan aprovasaun husi Konsellu Ministrus, kona-ba autorizasaun selebrasaun akordu ida, entre Governu Timor-Leste no Organizasaun Internasionál Traballu (OIT) kona-ba subvensaun iha âmbitu programa "Leaving no one behind in Timor-Leste’s COVID-19 response Finantial Support for the Implementation of the cash transfer scheme for low-income households" ("Labele husik ema ida iha kotuk hodi hatan ba COVID-19 iha Timor-Leste - Apoiu finanseiru implementasaun ba sistema transferênsia husi apoiu ba família ho rendimentu ne'ebé kiik").

Tuir akordu ne'e rasik, OIT sei entrega ba Governu Timor-Leste kuantia 748 mil dólar amerikanu hodi finansia kustu operasionais implementasaun apoiu ba agregadu familia timoroan sira, ne'ebé hetan aprovasaun husi Dekretu-Lei n.° 15/2020, loron 30 fulan-abril.

Sra. Ministra Finansas iha ezersísiu simu poder tomak atu hala'o assinatura ba akordu ne'e rasik.

Konsellu Ministrus aprova autorizasaun selebrasaun kontratu atu hola 30 mil toneladas fos husi Repúblika Sosialista Vietnam, ne'ebé mak aprezentada husi Komisaun Nasional Aprovizionamentu Timor-Leste, husi Ministériu Planeamentu no Investimentu Estratéjiku no husi Ministériu Turizmu, Komérsiu no Indústria hodi reforsa stock fós iha rai-laran no hodi resolve karik mosu kazu menus fós durante pandemia COVID-19.

Konsellu Ministru delega Administradór Sentru Nasional Lojistiku (CNL), hanesan representasaun Governu Timor-Leste, kompetênsia atu hala'o asinatura ba kontratu refere.

Konsellu Ministrus aprova Orgânika VIII Governu Konstitusional nian, hato'o alterasaun rua, kona-ba diploma ne'ebé aprovadu iha reuniaun ikus husi Ezekutivu sira. Alterasaun dahuluk kona-ba ordem prozedênsia husi membru Governu sira.

Nune'e, Primeiru-Ministru antesede Vise-Ministru nain rua, tuir kedan Ministru da Presidência Konsellu Ministrus, ne'ebé presede iha Ministru Koordenadór Assuntus Ekonómikus, tuir mai mak ministrus sira seluk tuir akordu iha estrutura ne'ebé mak aprova ona iha semana kotuk.

Dekretu-Lei ne'ebé hetan aprovasaun prevê mós alterasaun iha atribuísaun kompetênsia ba Ministru Negósius Estranjeirus no Kooperasaun, hanesan responsável atu organiza, dinamiza ka partisipa iha kualker tipu atividade ne'ebé mak presiza estabelesimentu no funsionamentu plataforma kooperasaun ida no dezenvolvimentu ekonómiku integradu sub-rejional entre Timor-Leste, Indonézia no Austrália.

Tuir alterasaun ne'ebé introduz iha orgânika, Konsellu Ministrus aprova mós projetu Dekretu-Lei kona-ba extinsaun unidade misaun ad hoc ba dezenvolvimentu ekonómiku sub-rejional integradu no kada estrutura orgânika. Ho diploma ida ne'e revogadu Dekretu-Lei n.° 17/2014, loron 16 fulan-jullu no atribuisaun unidade no tuir mai sei pasa ba Ministériu Negósius Estranjeirus no Kooperasaun.

#Media_MOP

Read More

PM TAUR ORIENTA MOP NO CIGC REHABILITA HOSPITÁL LAHANE, AKOMODA TRATAMENTU PASIENTE COVID-19

DILI, 12 MAIU 2020: S. Exa, Primeiru Ministru (PM), Sr. Taur Matan Ruak, orienta S. Exa, Ministru Obras Públikas (MOP), Arq. Salvador Eugénio Soares dos Reis Pires, hodi koordena ho Sentru Integradu Jestaun Krize (CIGC) hodi kombina planu estudu ne’ebé realiza ona iha tinan 2019 ho parte CIGC hodi halo rehabilitasaun ba Hospitál Dr. António Carvalho Lahane hodi akomoda pasiente no halo tratamentu ba pasiente surtu COVID-19.

Tuir mai esplikasaun Sr. Ministru Obras Públikas, Arq. Salvador Eugénio Soares dos Reis Pires, ba jornalista sira, hafoin enkontru ho S. Exa, Primeiru Ministru (PM), Sr. Taur Matan Ruak, iha palásiu Governu, Dili.

JORNALISTA: Sr. Ministeru bele esplika ohin enkontru ho S. Exa Primeiru Ministru ne’e?

Sr. MINISTRU: Ohin S. Exa, Sr. Primeiru Ministru bolu ha’u, ne’e liga ho kestaun rehabilitasaun ba hospitál Lahane ne’ebé mak Sentru Integradu Jestaun Krize propoin halo rehabilitasaun para sai hanesan fatin tratamentu ba pasiente surtu COVID-19 nian. no aumezmu tempu informa iha 2019, Orsamentu Jerál Estadu (OJE) 2019 nian ita tau tiha ona planu ida ba Longu prazu nian, rehabilita hospitál Lahane ne’e, no husi rezultadu tenderizasaun ne’ebé mak ita fó sai iha 2019 ba estudu para halo rehabilitasaun no hasa’e kapasidade akomodasaun hospitál Lahane nian. Ita iha tiha ona rezultadu pre-lemináriu husi konsultan ne’ebé manán tender, nia fornese mai ita, ne’ebé iha kestaun mak oinsá atu fó kaben ka kombinasaun ba planu longu prazu ne’e ho planu emerjénsia nian ne’ebé ita presiza halo duni para atu bele akomoda nesesidades akomodasaun ba tratamentu surtu COVID-19 nian.

Ne’e mak S. Exa, Primeiru Ministru ohin orienta hela Ministru Obras Públikas ho Sentru Integradu Jestaun Krize atu servisu hamutuk, fahe asuntu ne’e lalais para oinsá akomoda ita-nia nesesidade ida kurtu prazu ne’e ho longu prazu ne’e, nune’e ita bele realiza rehabilitasaun iha tempu badak, aumezmu tempu iha rehabilitasaun ne’e sei la prezudika fali planu ida longu prazu ne’ebé mak iha 2019 Ministériu Obras Públikas tau orsamentu, hasai tender no halo estudu liuhosi tenderizasaun ba konsultór.

JORNALISTA: S. Exa, Ministru, Orsamentu rasik ne’ebé Ministériu Obras Públikas prevé ne’e nia montante hira?

Sr. MINISTRU: Osan ida 2019 ne’e pruvolta rihun $300 resin, ida-ne’e ba estudu longu prazu nian ba rehabilitasaun Longu Prazu nian, ne’e foin faze estudu iha tempu ne’eba. S. Exa, Primeiru Ministru hanoin katak importante mak ita haree nesesidade rua ne’e, oinsá mak bele rehabilita lalais para bele akomoda, ou providénsia fatin ba izolamentu no tratamentu ba pasiente sira COVID-19 nian, aumezmu tempu planu longu prazu ne’e labele prezudikadu, ita kombina planu rua ne’e hamutuk.

JORNALISTA: Sr. Ministru, karik bele hatene, konkursu ne’e husi kompañia ida ne’ebé, depois ami haree katak abitante barak mak sei hela iha ne’eba?

Sr. MINISTRU: Konsultór nia naran see la sala , Vigor, sira tuir tender iha 2019, no liuhosi prosesu tenderizasaun iha aprovizionamentu, sira mak sai hanesan vensedór, sira hatama ona relatóriu pre-lemináriu no ha’u hanoin katak nia maneira dezenvolvimentu ba longu prazu ne’e depende ba estudu ne’ebé sira halo, horsida dezeñu detalladu sira aprezenta mai, planu sira hanesan planu ambientál, planu hodi haree risku sosiál sira hanesan ohin ita-boot sira temi, oinsá mak ita bele haree risku sira ne’e tomak, impaktu sosiál sira ne’e ita prevé iha planu rasik no ita fó solusaun ida liuhosi dezeñu detalladu ne’ebé mak konsultór ne’e sei fornese mai Ministériu Obras Públikas.

JORNALISTA: Karik MOP verifika ona, totál populasaun hira mak sei hela nafatin iha fatin ne’eba?

Sr. MINISTRU: Ne’e depende ba estudu ne’e.

#Media_MOP

Read More

MOP HO OPERADÓR 3 ASINA NOTA INTENDIMENTU NO LANSAMENTU DARUAK BA FORNESE SUBSÍDIU PULSA EDTL BA KLIENTE DURANTE ESTADU EMERJÉNSIA II

DILI, 08 MAIU 2020: S. Exa, Ministru Obras Públikaa (MOP), Arq. Salvador Eugénio Soares dos Reis Pires, ho operadór Telekomunikasaun 3 hanesan Timor-Telekom, Telemor no Telekomsel asina Nota de Ingtendimentu (MoU-sigla Inglés) no Lansamentu hodi fornese subsídiu pulsa Eletrisidade Timor-Leste (EDTL) ba kliente sira iha Timor laran tomak ba periodu Estadu Emerjénsia fulan-Maiu nian.

Tuir mai nota informativa kona-ba serimonia Assinatura Nota Intendimentu no Lansamentu ba distribuisaun Subsídiu enérjia elétrika ba fase daruak durante Estadu de Emergência.

● Iha âmbitu implementasaun Decreto do Governo No.08/2020 de 30 de Abril konaba Medidas de Execução da Declaração do Estado de Emergência Efetuado pelo Decreto do Presidente da República No.32/2020, de 27 de Abril, ne’ebé temi iha artigo 26, alínea 1) konaba área asensial sira, inklui área eletrisidade no alínea 2) ne’ebe fo kompeténsia ba membro do Governo hodi hasai Despacho. Tamba ne’e,

● Ministro das Obras Públicas liu-hosi despacho nú ref.a: 804/MOP/V/2020 konaba medida de apoio à população durante o Estado de Emergência no âmbitu da energia elétrica e abastecimento de água. Nune’e MOP – EDTL atribui-tan valor US$15 (ekivalenti 125 kWh) ba kada kliente pré-pago, ho total kliente pré-pago mak 160,555.

Iha sigunda fase ida ne’e, MOP konsidera sei atribuí mós subsidiu pagamento 50% husi tarifas referentes ba konsumedores de eletricidade iha regime pós-pago iha períodu atual de estado de emergência de 28 de abril a 27 de maio de 2020, ho total kliente pós-pago mak 1,614.

● Ohin MOP assina Nota de Entendimento ba Daruak ho operador tolu hanesan Timor Telecom, Telemor no Telkomcel hodi fasilita distribuisaun subsidiu refere liu-hosi númeru Hotline úniku (12150) hahu loron ohin, dia 8 too 27 de Maio, para kada kliente bele haruka SMS ba númeru Hotline refere no fó sira nia Númeru Kontador no autamaticamente, operador sira ne’e, sei haruka TOKEN equivalente US$15 diretamente ba kada kliente nia telemóvel.

● Objetivu fó subsidiu pulsa liu husi hotline operador sira ne’e atu kontinua kontribui ba prevensaun Covid-19 atu hadaet ba komunidade, ho maneira lalika mai konsentra sosa pulsa iha fatin sira bain-bain durante estadu de emergência nia laran.

Hanesan informasaun ba ita hotu, MOP-EDTL rejista katak iha fase atribuisaun premeiro de implementasaun, total kliente ne’ebé mak hetan ou ativa hamutuk 128,657 (ekivalente 80%) husi total klientes 160.555.

● Ikus liu hato’o mos agradese wain ba parseiro sira MOP nian operador tolu mensiona iha leten, Itron Indonesia, no Ministério do Transportes e Telecomunicações ne’ebe fasilita no fo licença número hotline refere hodi apoio MOP-EDTL ba serbisu ida ne’e.

Hato’o mós agradecimento ba Diresaun Geral EDTL neébé serbisu maka'as hodi halo ida-ne’e akontese.

Maneira hodi hetan subsídiu pulsa EDTL nafatin hanesan ho etapa dahuluk hakerek EDTL#(Númeru Kontadór) haruka ba númeru Hotline 12150.

Obrigado!

#Media_MOP

Read More

GOVERNU APROVA VALÓR SUPLEMENTU REMUNERATÓRIU HO VALÓR $5 TO'O $25

DILI, 05 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Tersa-feira ne'e partisipa iha sorumutuk Konsellu Ministru extraordinária ne'ebé lidera husi S. Exa, Primeiru Ministru (PM), Sr. Taur Matan Ruak, realiza iha sala Auditória Kay Rala Xanana Gusmão, iha Minsitériu Finansas, Dili, hodi aprova valór suplementu remuneratóriu ho valór enter $5 to'o $25 dollares Amerikanu.

Iha Konsellu Ministru aprova projetu Rezolusaun Governu nian, ne'ebé aprezenta husi S. Exa, Ministra Finansas (MF) iha ezersísiu, Sra. Sara Lobo Brites, kona-ba valór suplementu remuneratóriu, ne'ebé kria ona husi Dekretu-Lei n" 17/2020, ba funsionáriu, ajentes no traballadór sira husi administrasaun publika ne'ebé presta nia atividade iha servisu prevensaun no kontrolu COVID-19, durante vijênsia estadu emerjênsia.

Suplementu remuneratóriu ida-ne'e varia entre 5 no 25 dólares amerikanu, ba kada loron trabalhu husi benefisiáriu sira, durante vijénsia estadu emerjênsia, tuir grau risku ne'ebé funsionáriu ida-idak hetan.

Pagamentu ne'e sei realiza fulan-fulan,

hamutuk ho remunerasaun mensál nian. Rezolusaun Governu ne'e rasik produs efeitus iha foron 28 fulan-marsu tinan 2020, data ne'ebé hahú estadu emerjênsia. Montante suplementu ida-ne'e kona-ba periodu entre loron 28 fulan-marsu no tama vigór husi diploma ne'e rasik sei selu hamutuk ho salária ba fiulan-Maiu. Kada Ministériu mak sei halo identifikasaun ba

benefisiáriu sira, halo kontabilizasaun ba númeru husi kada Ioron, no sei selu mós husi ida-idak nia ministériu.

Konsellu Ministru ne'e mós aprova projetu Deliberasaun ne'ebé aprezenta husi S. Exa, Ministra Finansas iha ezersísiu, Sra. Sara Lobo Brites, kona-ba limité másimuu ba dotasaun orsamentais termporária ba fulan-maiu tinan 2020 ho valór 122.228.000 dólares amerikanu (inklui pagamentu ba empréstima).

#Media_MOP

Read More

MOP SEI AVALIA, ANTES FÓ SUBSÍDIU PULSA EDTL BA DARUAK, SUBSÍDIU BA TÉKNIKU DGAS NO EDTL

DILI, 29 ABRIL 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, informa katak Ministériu Obras Públikas sei halo avaliasaun ba fornesimentu subsídiu pulsa EDTL ba etapa dahuluk fulan-Abril nian antes implementa iha etapa daruak iha periodu Estadu Emerjénsia nian.

Tuir mai esplikasaun Sr. Ministru Obras Públikas ba jornalista sira iha edifísiu Ministériu Finansas (MF) hafoin partisipa iha reuniaun Konsellu Ministru:

Sr. MINISTRU: Relatóriu finál ba implementasaun primeiru ne'e, ha'u avalia lai depois mak ha'u informa see karik iha subsídiu.

JORNALISTA: Karik iha posibilidade para fó subsìdiu ba ita-nia kliente?

Sr. MINISTRU: Bele, bele iha posibilidade, iha dekretu Goveenu hatete, iha artigu 26 nafatin mantein, ita bele fó ezensaun de tarefas ba komunidade sira maibé ami sei haree ida-nee lai, ami sei haree hela, ha'u seidauk bele pronunsia, ami sei prepara lai sasán hotu see posivél ona ami anunsia.

JORNALISTA: Maibé ida-ne'e sei nafatim ho US $ 15 dollares?

Sr. MINISTRU: Ne'e mak ami seidauk iha desizaun.

JORNALISTA: Totál kliente ne'ebé asesu ba subsídiu pre-pagu ida primeiru ne'e hira?

Sr. MINISTRU: Ha'u seidauk hetan fali númeru finál, hanesan horbainhirak ha'u hatete ba ita-boot sira 111 mill resin (111.558) ne'e mak semana kotuk ne'e, agora sira kompila hela relatóriu finál kona-ba hira mak asesu ona.

FÓ SUBSÍDIU BA TÉKNIKU DGAS NO EDTL MOP HEIN KOMISAUN JESTAUN BA FUNDU COVID-19

S. Exa, Ministru Obras Públikas (MOP), Arq. Salvador Eugénio Soares dos Reis Pires, mós informa kona-ba proposta husi MOP hodi fó apoiu subsídiu ba tékniku esensiál husi Diresaun Jerál Água no Saneamentu (DGAS) no Diresaun Jerál Eletrisidade Timor-Leste (DG-EDTL) ne'ebé durante ne'e présta ona sira-nia servisu iha periódu Estadu Emerjénsia.

Tuir mai Esplikadaun Sr. Ministru ba Jornalista sira:

JORNALISTA: Oinsá subsídiu ba ita-nia tekniku EDTL rasik ne'ebé halo servisu makaas iha Estadu Emerjensia ne'e oinza MOP nia haree?

Sr. MINISTRU: Subsídiu, foin daudauk dekretu ba implementasaun subsídiu ba ita-nia funsionáriu sira iha área téknikas esensiais ne'e aprovadu ona, ha'u hanoin, hetan ona promulgasaun ona karik, iha fali faze tuir mai mak ami deskuti tarefa kada ema ida hira, ne'e para atu iha nominál ida ne'ebé armonizadu ba hotu kedas staff hotu-hotu, ne'e mak depende ba komisaun ne'ebé halo jestaun ba fundu COVID-19 nian ne'e mak Sra Ministra Finansas bele haree ida-ne'e. Ami ministériu sira ida-idak hanesan benefisiáriu ami hato'o ami-nia proposta depois horsida sira mak sei lori fali ba Konsellu Ministru aprezenta hodi hetan aprovasaun, atu nune'e ita atribui tanba fundu ne'e mai husi sira

JORNALISTA: Husi proposta MOP nian ba fundu ne'e rasik montante hira?

Sr. MINISTRU: Montante ba fundu ami nian ne'e la to'o US $100.000 resik karik, hanesan ha'u hatete ona 340 pesoál EDTL, 140 Água no Saneamentu. Agora subsídiu ne'e sira-nia kritéria ida prinaipál mak ba iha liña frente sira ne'ebé mak servisu presta nafatin sira-nia responsabilidade para atu asegura katak servisu esensiais ne'e la'o nafatin durante Eatadu Emerjénsia no halo prevensaun ba propagasaun surtu COVID-19 ne'e, entaun ida-ne'e mak liuliu husi ami-nia parte ajénsia rua ne'ebé kontribui maka'as hanesan DGAS-DNSA no mós EDTL ne'ebé halo hela servisu esensiál sira, ami hato'o ami-nia proposta, mas ami sei informa hela, iha tempu badak komisaun ne'e disponibiliza ona relatóriu ga desizaun ruma ba Konsellu Ministru, ita-boot sira sei hatene.

#Media_MOP

Read More

MOP PARTISIPA REUNIAUN KM HODI APROVA MEDIDAS EXTENSAUN BA RENOVASAUN ESTADU EMERJÉNSIA

DILI, 29 ABRIL 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne'e partisipa iha reuniaun Konsellu Ministru (KM) iha sala auditoria Kat Rala Xanana Gusmão, Ministériu Finansas (MF), Dili hodi aprova dekretu Governu kona-ba Medidas Extensaun ba Renovasaun Estadu Emerjénsia ne'ebé aprezenta husi S. Exa, Primeiru Ministru (PM), Sr. Taur Matan Ruak.

Iha reuniaun Konsellu Ministru ne'e aprova projetu Dekretu-Lei, ne'ebé aprezenta husi S. Exa, Ministru Koordenadór Assuntus Económikus, Sr. Fidelis Manuel Leite Magalhães, no husi Governadór husi Banku Sentral Timor-Leste (BCTL), Sr. Abraão de Vasconselos, kona-ba alterasaun dahuluk ba Dekreto-Lei n.° 23/2017, loron 12 fulan-Jullu, kona-ba Sistema Garantia Kréditu. Ho alterasaun ida-ne'e haluan liutan asesu SGK ba mikroempreza sira atu hasa"e tipu ba atividade ekonómika sira ne'ebé tenke elejíveis ba programa ne'e rasik.

Sistema garantia Kréditu (SGK), hanesan mekanizmu ida husi apoiu ba mikro, no ba empreza ki'ik no empreza médiu sira (MPME), ho nune'e Estadu fahe risku husi konsesaun Kréditu ho banku komersiál sira, atu fó garantia ho montante máximu 70% husi empréstimu ne'ebé hetan no kumpre rekizitu legál sira ne'ebé mak estabelese ona. Objetivu prinsipál husi SGK mak atu fó kontribuisaun ba grupu emprezáriu sira atu sólido no viável, ho nune'e bele favorese ba empreendedór sira, ba kriasaun postu traballu no kressimentu ekonomia nasionál.

S. Exa, Primeiru-Ministru (PM), Sr. Taur Matan Ruak, aprezenta projetu Dekretu Governu, ne'ebé hetan aprovasaun iha Konsellu Ministru, kona-ba medidas extensaun ba Renovasaun Estadu Emerjénzia, kona-ba Medidas Ezekusaun ba Renovasaun Deklarasaun Estadu Emerjénsia ne'ebé fó-sai liuhosi Dekretu Prezidente Repúblika n.29/2020, loron 27 fulan-marsu tinan 2020, hodi hatán ba ameasa husi surtu COVID-19 nian.

Ho hanoin ba renovasaun deklarasaun estadu emerjénsia ne'e, Governu liuhosi Dekretu ida-ne'e atu asegura ba ezekusuan adotasaun ba medidas sira ne'ebé presiza hodi prevene moras ne'ebé mak konteña ho pandemia ne'e, salva vida no hodi assegura subsisténsia ba kadeia abastesimentu sasán no servisu essensiais ba ita-nia populasaun, maske sira limita direitus no liberdades fundamentais balun.

Kona-ba Dekretu Governu N.° 3/2020 loron 28 fulan-marsu, sei mantein nafatin proibisaun ba entrada estranjeiros iha territóriu nasionál, ho exsesaun sira ne'ebé prevista anteriormente no ho exsesaun ba estranjeirus hotu-hotu ne'ebé presta kada atividade profissionál iha setór petrolíferu. Regras kontrolu sanitáriu ba entrada no saídas iha territóriou nasionál sira sei mantein hanesan.

Kona-ba regras distansiamentu sosiál, Diploma ne'e refere liubá ajentes sira husi forsa seguransa tenke sensibiliza ba ema hotu-hotu hodi kumpri ba regras sira ne'ebé mak define tiha ona, no tenke bandu ema atu labele hamriik hamutuk ka hamriik iha grupu ho ema barak, no ba ema sira ne'ebé la kumpri orden kumprimentu ida-ne'e sei konsidera katak konstitui krime desobediénsia, no sei identifika ema sira ne'ebé mak la respeita regras ka la kumpre regras, no sei bele lori sira ba Ministériu Públiku.

Dekretu Governu ida-ne'e fó dalan ba atividade transporte públiku sira, bainhira veíkulu sira ne'e tenke fase no amós loron-loron iha karreta laran antes hahú atividade no mós motorista, tripulasaun no passajeiru sira tenke uza máskara protesaun no evita kualkér kontaktu fíziku.

Kona-ba regras ba estabelesimentu komersiál sira no prestasaun serviso, sei asessu mantein nafatin regras sira kona-ba utilizasaun obrigatóriu máskara ba klientes no funsionáriu sira, no fase-liman beibeik antes tama ba servisu fatin no respeitu ba distânsia fizika pelu menus metru ida. Forsa husi seguransa sira no inspetór husi autoridade seguransa ai-han nian no ekonómika bele organiza ema sira ne'ebé tama no sai iha estabelesimentu ba indivídu ka ema ne'ebé mak la kumpri regras sira ne'e, bele halo identifiksaun ba indivídu ne'e no bele lori ba aprezenta iha Ministériu Públiku.

Regras sira ne'e sei aplika mós ba merkadu sira hotu, ho disponibilizasaun husi parte autoridade sira no administrasaun munisipais ho kondisaun ne'ebé nesesária no husi kontrolu kumprimentu ba regras sira ne'ebé estabelese tiha ona. Vendedór ambulantes sira hotu tenke uza permanente máskara protesaun no tenke mantein distánsia pelu menus metro ida entre vendedór ambulantes sira seluk.

Sei mantem medidas ne'ebé estabelese tiha ona kona-ba funsionamentu administrasaun

públika no asesu ba iha kada instalasaun, no aumenta mós lista husi servisu públiku ne'ebé sei konsidera esensiais no define lista atividade ne'ebé suspende direitu ba greve.

Dekretu Governu ne’ebé aprova ona refere mós ba membru do Governu ne'ebé responsável husi saúde, bele determina, kuandu haree katak ne'e nesessáriu atu fó protesaun ba saúde públika, iha rekizasaun temporária ba espasu no estabelesimentu partikulár sira. Kuandu iha kazu balun ne’ebé mak devidamente justifika, Konsellu Ministru bele rekizita sasán imóveis ka móveis husi partikulár.

Konsellu Ministros aprova projetu Dekretu Governu, ne'ebé mak aprezenta husi S. Exa, Ministru Negósius Estranjeirus no kooperasaun (MNEK), Sr. Dionísio da Costa Babo Soares, kona ba regulamentu subsídiu ba sidadaun timoroan ne'ebé mak hela ka temporariamente iha estranjeiru no mós sidadaun seluk ne'ebé mak labele sai husi ne'ebá tamba situasaun epidemiolójika Koronavírus foun. Montante husi subsídiu sei selu fulan-fulan no depende ba kustu husi nasaun ida-ida. Benefisiáriu sira mak hanesan estudantes timoroan mak la hetan bolsa no depende de'it ba apoiu finanséiru husi família ne'ebé hela iha Timor-Leste no sidadaun sira ne'ebé labele fila tamba fronteira sira taka.

Ikus liu, Konsellu Ministrus aprova projetu Dekretu-Lei, kona ba alterasaun Da-2 ba

Estatutu Militár sira husi FALINTIL-Forsa Defeza Timor-Leste nian (F-FDTL), aprova

husi Dekretu-Lei n.° 7/2014, loron 12, fulan-marsu. Alterasaun ida-ne'e atu kompatibiliza Estatutu F-FDTL ho konjuntu husi dokumentus estruturantes iha área Defeza nian ho atuál kontextu legál, liuliu, Lei Defeza Nasionál, Konseitu Estratéjiku Defeza Nasionál, Konseitu Estratéjiku Militár, Sistema Forsa Nasionál, Misaun Forsa Armada sira no Dispositivu F-FDTL nian.

#Media_MOP

Read More

KONSELLU MINISTRU APROVA PROJETU DELIBERASAUN 3 HUSI MOP

DILI, 06 MAIU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne'e partisipa Reuniaun Konsellu Ministru lideradu husi S. Exa, Primeiru Ministru (PM), Sr. Taur Matan Ruak, iha sala Auditóriu Kay Rala Xanana Gusmão, Minstériu Finansas, Díli, hodi aprezenta projetu deliberasaun 3 no hetan aprovasaun iha Konsellu Ministru.

Projetu Deliberasaun tolu, ne'ebé mak kona-ba Memorandu Entendimentu ida no Protokolu Kooperasaun rua ho entidades públika husi Portugál.

Projetu aprovadu dahuluk ne'e refere ba Memorandu Entendimentu entre Ministériu Ekonomia no Empregu Repúblika Portugueza no Ministériu Obras Públikas hamutuk mos ho Ministériu Petróleu no Rekursu Mina-rai iha Repúblika Demokrátika Timor-Leste iha domíniu Enerjia (Eletrisidade no Kombustíveis), Geolojia no Mina nian.

Konsellu Ministrus mós halo aprovasaun kona-ba Protokolu Kooperasaun entre Ministériu Ambiente, husi Ordenamentu Territóriu no Enerjia Repúblika Portugueza no Ministériu Obras Públikas Repúblika Demokrátika Timor-Leste, iha matéria ba Bee, Saneamentu, Drenajen no Jestaun Rezídus Sólidus.

Ikus liu membrus Governu aprova Protokolu entre IP Enjenñaria, S.A. Ministériu Obras Públikas, Transporte no Comunikasoins Repúblika Demokrátika Timor-Leste, iha âmbitu Organizasaun no Jestaun Rede Rodoviária Timor-Leste.

Durante reuniaun Konsellu Ministru ne'e haree mós aprezentasaun kona-ba projetu Dekretu-Lei ne'ebé aprezentadu husi S. Exa, Ministru Koordenadór Asuntus Ekonómikus, Sr. Fidelis Manuel Leite Magalhães, kona-ba moratória iha kumprimentu husi obrigasoins emerjentes kontratu konsesaun kréditu iha âmbitu polítika ekonómika hatan ba COVID-19. Dekretu-Lei ida-ne'e sei analiza fila-fali iha sorumutuk Konsellu Ministru tuir mai.

Konsellu Ministrus mós aprova nomeasaun ba Timóteo de Deus hodi sai Reprezentante Governu nian hanesan Konsellu Superior no ho ninia suplemente Ana Paula Marçal iha Ministériu Públiku, proposta ida ne'e husi S. Exa, Ministru Justisa (MJ), Sr. Manuel Cárceres da Costa.

#Media_MOP

Read More

PN APROVA PEDIDU EXTENSAUN ESTADU EMERJÉNSIA

DILI, 27 ABRIL 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha loraik ne'e asiste debate ba pedidu extensaun Estadu Emerjénsia iha Parlamentu Nasionál (PN), Dili.

Pedidu extensaun Estadu Emerjénsia ne'e hetan aprovasaun husi deputadu sira ho votus afavór 37, kontra 23 no abstensaun 4.

Hafoin aprova, S. Exa, Prezidente Parlamentu Nasionál, Sr. Arão Noe de Jesus, deklara lori kedas ba S. Exa, Prezidente Repúblika (PR), Sr. Francisco Guterres Lu-Olo, hodi deklera extende Estadu Emerjénsia ba loron 30 hahú husi loron 28 fulan-Abril óras 00:00 to'o loron 27 fulan-Maiu tinan 2020 óras 12:59.

Xefe Estadu husu autorizasaun ba PN hodi aprova extensaun Estadu Emerjénsia atu kontinua limita direitus balun sidadaun sira nian ba prevensaun surtu COVID-19 iha Timor-Leste.

Proposta extensaun Estadu Emerjénsia ne'e aprezenta direita husi S. Exa, Primeiru Ministru (PM), Ar. Taur Matan Ruak, akompaña husi membru Governu sira.

#Média_MOP

Read More