INTERVISTA JORNALISTA HO SR. MINISTRU OBRAS PÚBLIKAS KONA-BA ATUASAUN MOP BA INUNDASAUN IHA KAPITÁL DILI

DILI, 16 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete daudauk ne’e MOP liuhosi ekipa Diresaun Jerál Obras Públikas (DGOP), Diresaun Jerál Água no Saneamentu (DGAS) inklui ekipamentu pezadu husi Institutu Jestaun Ekipamentus (IGE) daudauk ne’e destaka iha área inundasaun liuliu mota siara no ponte My Friend, ponte Bekussi no ponte Maufelu-Bekora hodi hasai sedimentasaun iha fatin refere, inklui hetan apoiu husi kompañia sira ne’ebé daudauk ne’e ezekuta hela projetu iha kapitál Dili.

Tuir mai intervista husi jornalista sira ho Sr. Ministru MOP iha Palásiu Governu hafoin reuniaun Konsellu Ministru, kona-ba atuasaun MOP nian ba inundasaun iha kapitál Dili ne’ebé akontese iha loron Sesta, 13 fulan-Marsu 2020 liubá mak hanesan tuir mai:

Jornalista TATOLI: Exelénsia bele relata lai dadus no observasaun husi MOP nian relasiona ho inundasaun iha Sesta-feira liuba, no saida mak MOP halo ona?

Ministru MOP: Iha Sesta loraik depois udan ami iha hela eskritóriu para observa volume udan-been, depois ami alerta kedas ba ajénsia sira inklui mós Institutu Jestaun Ekipamentus (IGE) atu nune’e akontese inundasaun karik prontu para atende, infelizmente akontese duni no rona katak att liu mak iha ponte My Friend, mas iha kalan ne’e Sekretáriu Estadu Protesaun Sivíl tuun ba, ha’u mós ba haree katak mota ne’e pasa liu tiha bareira, depois tama iha eskola EPD (Eskola Portugues Dili) nian, depois halo mós vizita ba fatin seluk hanesan mota Bekussi, iha momentu ne’eba la konsege tama tanba tahu, depois impede tráfiku, no mós iha ponte Maufelu, tanba ha’u simu informasaun fatin tolu ne’e mak afeitadu liu, tanba ne’e, iha kalan ne’e ami koordena no konsege mobiliza ekipamentus pezadu ne’ebé mak iha ba halo atendimentu, depois kontinua kedas fali iha loron tuir mai.

Ita-boot sira hatene ami-nia atendimentu liuliu husi Intitutu Jestaun Ekipamentus espalla no fahe ekipamentus kuaze teritóriu tomak, ita la espera katak akontesimentu ne’e bele akontese iha Sesta-kalan ne’e, no ami iha ekipamentus ne’ebé oituan iha área besik iha Dili, ita mobiliza no horseik (Domingu, 16/02/2020) ko’alia mós ho Diresaun Jerál Obras Públikas (DGOP) ho kompañia sira ne’ebé mak iha kontratu ho MOP atu sira tulun sira-nia ekipamentus, no horseik sira halo servisu ne’e, balun ida ka rua ajuda ami atu normaliza tiha sedimentasaun ne’ebé mak nakonu hela iha mota Bemori, Bekussi no Bekora.

Aliende ne’e, esforsu ne’ebé Governu halo ita-boot sira haree katak iha tinan 2019 no iha inísiu 2020 ita halo hela normalizasaun hanesan iha ponte My Friend iha dia 5 de Feveréiru 2020 ami halo, ba mota Maloa, Bekora, iha Janériu 2020 ne’e ita halo hela normalizasaun, felizmente udan mai boot duni akontese no hamosu inundasaun.

Obras Públikas iha tereñu hela kontinua fó asisténsia, hasai sedimentasaun, asegura katak kuandu udan-boot fali iha loron ida ka rua mai karik sedimentasaun ita hasai tiha no labele halo fali inundasaun tuir ne’ebé bele lori estragus barak liután, entaun prioridades agora mak mota sira ne’ebé boot no luan sira ne’e hanesan Bekussi depois tuun ba Maufelu no seluk tan, iha Ponte Maloa no seluk ne’e ita kontinua fó asisténsia hodi halo normalizasaun, ne’ebé ami foka hela iha ne’eba.

DGAS KONTINUA NORMALIZASAUN BEE-MOOS IHA TEREÑU

Aliende ne’e ita-boot sira hatene katak inundasaun ne’e halo mós estragus ba sistema kanalizasaun bee, tanba ne’e, ami nia Diresaun Jerál Água no Saneamentu (DGAS) ha’u fó orientasaun ba sira iha kedas Sesta-kalan (13/03) ne’e no iha Sabadu dader sira tuun ba terenu no hahú horseik hahú halo ona reparasaun ba kanu sira ne’ebé mak hetan estragus, ita-boot sira haree iha Ailok-Laran mós hanesan Mota Boot mai lori tiha, ami iha enkursu, progresu hela, halo fali rehabilitasaun ba sistema kanalizasaun ne’ebé mak hetan estragus.

DGE KONTINUA HALO ESFORSU GARANTE NO NORMALIZASAUN ENÉRJIA ELETRISIDADE

Aliende ne’e afeita mós ba eletrisidade (Diresaun Jerál Eletrisidade-DGE), iha distribuisaun nian, ahi balun monu tuun no hanesan iha Hera ne’ebé iha mós tore eletrisidade ne’e besik mota, ita foin halo normalizasaun, no ami halo esforsu makaas loos ho ekipa para ita bele normaliza situasaun ne’e ita infrenta hela.

Jornalista TATOLI; Exelénsia, iha komunidade balun preokupa tanba to’o oras ne’e seidauk hetan asisténsia husi MOP atu dudu rai ne’ebé iha sira nian uma, aliende ne’e iha fatin públiku, iha Bekussi rasik, iha uma sorin-sorin, nune’e mós iha Bekora, to’o agora sira sei nafatin hein prezensa husi parte MOP nian, ita-nia intervensaun oinsá?

Ministru MOP: Hanesan ohin ha’u hatete katak ita-nia prioridade agora mak hasai sedimentasaun husi mota, ita ta’uk karik udan-boot, tanba ita haree ponte no mota balun blokeiadu, no bele akontese fali inundasaun segundu ne’ebé bele lori estragus barak liu, sira afeitadu tiha ona, mais afeitadu liután, ida-ne’e mak ami haree uluk, depois ida-ne’e, horseik (Domingu, 16/03/2020) ami-nia ekipa Diresaun Nasionál Servisu Água (DNSA) komesa iha Taibesi sorin hodi ajuda suru tahu-nurak oan sira ne’e, ami ajuda ho ami-nia ekipamentus ne’ebé iha, normalmente obras nia ekipamentus ne’e ekipamentus boot, pezadu.

Jornalista TATOLI: Ekipamentus ne’e, mais ou menus sofisiente ga lae, hodi halo atendimentu?

Ministru MOP: Ekipamentu ne’ebé iha ita tenta halo, ita-nia ekipamentus pezadu iha Dili limitadu tanba espalla iha teritóriu timor laran tomak, ita iha lima ka neen mak atende hela no ajuda mós husi kompañia sira ne’ebé mak hala’o hela projetu para tenta halo normalizasaun ba situasaun ne’ebé daudauk ne’e akontese.

Ami halo esforsu nafatin, ita prioritiza uluk mak sedimentasaun ita hamoos tiha, depois ita haree fali sira seluk. Ohin ami ko’alia iha Konsellu Ministru mós ho ministériu sira seluk hanesan MAE (Ministériu Administrasaun Estatál), atu nune’e munisípiu Dili, xefe suku sira, organiza-an bele kontribui hamoos mós rai-rahun ne’ebé rezulta husi inundasaun ne’e.

Ministériu Obras Públikas nia foka liu ba iha estragus ne’ebé boot, maiór, ministériu seluk bele ajuda solusiona hanesan lixu no rai-rahun ne’ebé rezulta husi inundasaun ne’e rasik.

Agradese mós ba ita-nia SEPS no BOMBEIROS, tanba sira mós halo esforsu hela ne’ebé iha Konsellu Ministru ami ko’alia oituan kona-ba ida-ne’e, nune’e bele koopera no organiza liután ita-nia atendimentu atu solusiona inundasaun ne’ebé mak akontese.

Jornalista TATOLI: Exelénsia, pontu importante ida hudi hamosu inundasaun iha Bekusisi rasik mak iha mota ulun, ema halo projetu tesi ai soe arbiru iha ne’eba, MOP iha ona hanoin monta ekipamentu pezadu iha ne’eba para normaliza uluk ai sira iha ne’eba antes mai iha ponte Bekussi?

Ministru MOP: Ita-boot sira haree iha Sábadu kedas ami-nia ekipamentus pezadu kalan ba halo kedas atendimentu, depois ekipamentus ne’ebé ba ne’e la konsege halo servisu, depois dader ne’e ami mobiliza tan tanba estragus ho sedimentasaun, ai boboot de’it, presiza ekipamentus hanesan Exsa ne’ebé forsa liu atu hasai sedimentasaun, ita-boot sira haree felizmente iha progresu ona, ita hamoos tiha ona ai sira ne’e no ita kontinua nafatin fó atendimentu, normaliza no ami hanoin katak mota Bekora nian, Bekussi to’o Bekora ami kontinua halo normalizasaun.

Normalizasaun ne’e ita halo hela husi tinan kotuk (2019) to’o agora maibé felizmente udan foin daudauk mai ne’e boot ho volume ka intensidade boot, forsa natureza, ami tenta servisu nafatin ho ami-nia abilidade tomak, ho ekipamentus no rekursu ne’ebé iha para rezolve.

Jornalista INDEPENDENT: Sr. Ministru, Orsamentu Sufisinte ga lae?

Ministru MOP: Ita-boot sira hatene situasaun, ita iha rejime duo-desimál, labele iha administrativa foun. Foun daudauk novidades di’ak mak Ministériu Finansas (MF) aprejenta ona mudansa ba Lei Jestaun Finanséira, para iha tempu badak Siñora Ministra ba aprezenta iha Parlamentu Nasionál, espera katak ho desizaun sira ne’e bele fasilita liután atividade Governu nian ba atendimentu situasaun emerjénsia sira ne’e.

Tuir dadus husi Sekretáriu Estadu Protesaun Sivíl (SEPS) katak inundasaun ne’ebé akontese iha loron 13 fulan-Marsu 2020 ne’e rezulta vítima populasaun hamutuk rihun 6 ka uma kain 1,105 inklui husi parte Hera nian.

Maske nune’e, númeru ne’e sei bele aumenta tanba Ekipa Dezastre Naturais daudauk ne’e kontinua rekolla dadus iha tereñu ba família sira ne’ebé sai vítima ba inundasaun foin daudauk ne’e.

#Media_MOP

Read More

MOP PARTISIPA REUNIAUN KONSELLU MINISTRU 11 MARSU 2020

DILI, 11 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne'ebé lidera husi S. Exa, Primeiru Ministru (PM), Sr. Taur Matan Ruak, iha palásiu Governu.

Iha reuniaun Konsellu Ministru ne'e aprova proposta lei ne'ebé aprezenta husi S. Exa, Ministra Finansa (MF), Sra. Sara Lobo Brites, kona-ba aprovasaun ba 3 alterasaun ba Lei n° 13/2009, 21 outubru nian kona-ba Orsamentu no jestaun Finanseira. Nune'e, altera tiha artigu 31° relativu ba Rejime duodesimál no prevee esesaun no regra fleksibilizasaun lubuk ida hodi permiti kumpre tomak no didi'ak obrigasaun sira Estadu nian.

Konsellu Ministru aprova projetu Rezolusaun Governu ne'ebé aprezenta husi S. Exa, Ministru Negósiu Estranejiru no Koperasaun (MNEK), Sr. Dionisio da Costa Babo Soares, hodi estende aplikasaun no ezekusaun medida temporáriu hodi halo interdisaun no restrisaun ba ema estranjeiru sira ne'ebé atu tama mai rai-laran, iha semana haat ikus ne'e sai ka halo tránzitu liuhosi Republika Popular Xina, Repúblika Koreia, Repúblika Italiana no Repúblika Islamika Irao.

Konsidera katak propagasaun ba virus koroña la'o lais tebes nune'e, medida kona-ba
interdisaun ne'ebé define iha termu Rezolusaun ida-ne'e, sei reapresia fila-fali kuinzenalmente hodi haree ba ninia manutensaun ka eliminasaun. Liuhosi Rezolusaun Governu ida-ne'e. fó tiha ona orden ba Ministra saúde en ezersísiu atu fó fila-fali orientasaun servisu kompetente
Ministeriu saúde nian hodi koordena ho liña ministeriál relevante sira, aktua haktuir ba
protokolu ne'ebé estabelese ona husi organizasaun Mundiál saúde.

S. Exa, Ministru Obras Publika, Ara. Salvador Eugénio Soares dos Reis Pires, aprezenta projetu dekretu-lei, ne'ebé Konsellu Ministru aprova hodi kria Autoridade Nasionál ba Eletrisidade no aprova ninia Estatutu rasik. Nune'e, sei kria institutu públiku ida ne'ebé ho funsaun prinsipál maka hasa'e kualidade ba servisu públiku hodi fornese enerjia elétrika liuhosi ninia fiskalizasaun no monitorizasaun hodi disponibiliza nafatin ba públiku kona-ba kualidade ne'ebé sei presta husi servisu públiku. Bainhira regula ona setór ne'e maka sei hadi'ak liután kualidade operasaun, estabelese regra instaladora no norma téknika ne-ebé permiti asegura seguransa ba ema no sasán.

Ministru Obras Publika mos aprezenta projetu dekretu-lei ne'ebe kria Empreza Publika Eletrisidade Timor-Leste, E. P. (EDTL, EP) no aprova nia Estatutu rasik. EDTL. EP nia funsaun prinsipál maka hasa'e kualidade husi servisu ne'ebé sei presta bainhira fornese enérjia elétrika. Liuhosi empreza públika ida ne'ebé espesializada iha setór eletrisidade sei halo planu ida di'ak liután no jere ho lalais, hodi hadi'ak ka substitui infraestrutura ne'ebé eziste hela, haluan rede fornesimentu no aplika prátika di'ak ba operasaun komersiál ho objetivu atu hetan liután reseita ho aplika prinsípiu ba utilizadór ne'ebé selu.

Hadiak mós komunikasaun ho konsumidór sira, sensibiliza atu bele hadi'ak no utiliza didi'ak servisu ne'e, estabelese fiskalizasaun ida efetivu ba konesaun ilegál sira no konekta ho sistema kontajen automátiku ka prepagu ba konsumidór hotu.

S. Exa, Ministru koordenadór ba Asuntu Ekonomiku en ezersísiu. Sr. Fidelis Manuel Leite Magalhães, halo aprezentasaun ida ba Konsellu Ministru kona-ba prosesu adezaun Timor-Leste nian ba organizasaun Mundiál Komérsiu (OMK) - pergunta no resposta relativa ba Memorandu kona-ba Rejime Komérsiu Esternu Timor-Leste nian (MFTR). Aprezentasaun ba Konsellu Ministru ne'e ho objetivu partilla kestaun prinsipál sira ne'ebé nasaun membru hosi OMK balu foti, no mós informasaun kona-ba primeira ronda negosiasaun. Resposta hotu sei bazeia ba polítika no testu legál ne'ebé vigora iha Timor-Leste.

Konsellu Ministru autoriza Ministru koordenadór ba Asuntu Ekonomiku enkuantu Negosiadór Xefe ba prosesu adezaun ba OMK ne'ebé sei submete formalmente ba Sekretariadu OMK nian, dokumentu kona-ba pergunta no resposta kona-ba MFRT no enkoraja mós Negosiador Xefe kona-ba Adezaun ba OMK ne'ebé sei tuir ho asaun preparatória nesesáriu sira hodi tama ba primeira ronda negosiasaun ba adezaun iha grupu traballu.

Ikus liu, membru Konsellu Ministru asisti aprezentasaun hosi S. Exa, Ministra saude en ezersisiu, Sra. Elia Antonio de Ararujo dos Reis Amaral, hodi halo analize ba pontu situasaun husi medida prevensaun no kontrolu ba Koronavirus (COVIÐ-19} foun. Diresaun Jerál kona-ba prestasaun Saúde (DGPS) husi Ministériu saude akompaña hela situasaun epidemolojia liuhosi orientasaun téknika Organizasaun Mundiál Saúde (OMS) nian no servisu hamutuk ho kolaborasaun di'ak ho Laboratóriu Nasionál Saúde, Hospitál Nasionál Guido Valadares, autoridade responsável sira ba kontrolu no jestaun ba Portu entrada no mós estrutura seluk hodi fó apoiu kona-ba jestaun medida prevensaun no kontrolu ba surtu iha Timor-Leste.

Ministra Saude en ezersisiu aprezenta planu kontijensia ne'ebé defini nível resposta no asaun hodi minimiza risku transmisaun husi COVID-19 iha Timor-Leste. Ministra Saúde en ezersisiu mós halo aprezentasaun kona-ba atividade hirak ne'ebé realiza ona hahú kedas janeiru no planu kontijénsia ne'ebé defini nível resposta no asaun hodi minimiza risku transmisaun husi COVID-19 iha Timor-Leste. Aprezenta tiha mós pontu situasaun kona-ba preparasaun fatin tolu ba izolamentu, kuarantena no tratamentu, protokolu hodi haruka amonstra husi pasiente sira ne'ebé suspeita ona COVID-19 ba Austrália, protokolu kona-ba intervensaun medika ne'ebé sei realiza bainhira hetan kazu pozitivu ruma.

#Media_MOP

Read More

KONSELLU MINISTRU APROVA TRANSFORMASAUN EDTL BA EMPREZA PÚBLIKA

DILI, 11 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne'e aprezenta dekretu lei rua ba Konsellu Ministru (KM) kona-ba Transformasaun Diresaun Jerál Eletrisidade (DGE) ba Empreza Públiku no harii Autoridade Nasionál Eletrisidade (ANE) ne'ebé hetan ona aprovasaun husi reuniaun KM.

Durante ne'e Eletrisidade Timor-Leste (EDTL) hanesan diresaun jerál ida ne'ebé tutela ba MOP nune'e atendimentu EDTL nian tenke tuir birokrasia iha ministériu sira, maibé, bainhira muda ona ba Empreza Públika mak EDTL iha ona autonomia fiananseiru hodi halo atendimentu ho efetivu liután.

"Ohin (11/03) ami aprezenta dekretu lei rua, ida ba estabelese EDTL sai hanesan empreza públika no ida fali ba harii entidade reguladór iha setór eletrisidade (Autoridade Nasionál de Eletrisidade) ne’e ohin aprezenta no aprova ona ho intensaun katak, ita-boot sira hatene EDTL durante ne’e hanesan departamentu governamentál ida, ne'ebé mak ita atu halo atendimentu ne’ebé di’ak, kualidade no sustentável iha birokrasia barbarak. Ne’ebé ha’u hanoin ita bele eleva prestasaun servisu ho kualidade EDTL nian hanesan empreza, para atu lalais liu haree investimentu iha setór eletrisidade no mós prestasaun servisu no fornesimentu enérjia eletrisidade ba ita-nia povu sira," Sr. Ministru Obras Públikas, informa hafoin partisipa reuniaun KM iha Palásiu Governu, Dili.

Aliende ne'e, ANE mak sei haree no asegura katak Empreza Públiku no privadu ne'ebé investe iha área enérjia eletrisidade bele fornese ho di'ak.

"Autroridade Nasionál de Eletrisidade atu haree no asegura katak empreza públika ne’e no entidade privadu sira seluk ne’ebé mak hakarak investe iha setór eletrisidade, sira presta duni servisu ho kualidade no fó protesaun ba konsumidores sira, ita-boot sira hatene katak ahi-mate, sasan balun estraga, buat sira ne’e kuandu iha ona ita-nia entidade reguladora eletrisidade ne’e iha, sira bele haree ida-ne’e tuir regulamentu ne’ebé iha hodi mellora liután, atu asegura katak EDTL no mós entidade sira seluk ne’ebé mak hakarak investe iha setór eletrisidade hanesan enérjia renováveis sira tuir duni kualidade ne’ebé mak entidade ne’e haruka,"Sr. Ministru esplika.

Tuir proposta iha dekretu lei ne'e katak efetivamente komesa iha loron 1 Janéiru 2021, tanba ne'e Ministériu Obras Públikas estabelese Komisaun Instaladora hamutuk ho Komisaun Funsaun Públika (KFP) hodi haree funsionáriu sira ne'ebé servisu iha EDTL, kria regulamentu sira.

Funsionáriu públiku ne'ebé servisu iha EDTL sei hili mantein funsionáriu públiku ou muda ba empreza públiku.

"Iha empreza públika iha artigu 18, iha Komisaun Instaladora ne’ebé nia servisu tinan ida-ne’e inklui mós kria regulamentasaun EDTL hanesan empreza públika no mós haree ba rekrutamentu pesoál sira ba iha empreza foun ne’e, klaru iha ne’eba Komisaun Instaladora ne’e iha mós husi Komisaun Funsaun Públika ne’ebé sira servisu hamutuk ho gabinete Ministériu nian no mós Diresaun Jerál Administrasaun no Finansas MOP nian hodi haree oinsá mak rekruta pesoál sira no halo transferénsia husi Funsionáriu Públiku iha EDTL ba iha empreza públika, ida-ne’e ita sei halo levantamentu dadus no mós sosializasaun ba sira no haree meus sira see mak hakarak hela no hili funsionáriu públiku sira sei nafatin hanesan funsionáriu públiku tanba servisu hamutuk ho KFP, sira ne’ebé mak hakarak muda ba empreza ita muda sira ba empreza públiku," Sr. Ministru hatutan.

Nune'e, Komisaun Instaladora nia servisu mak sei haree ba aspetu hotu ne'ebé durante prosesu tranzisaun, no importante mak Governu aprova ona estatutu EDTL sai hanesan empreza públika, no espera katak sai empreza públika bele hamenus birokrasia. EDTL bele iha independénsia para foti desizaun no halo atendimentu ba avariasaun sira ne’e lais liután no sustentável liután, nune’e konsumidores sira labele lamenta barak kona-ba ita-nia fornesimentu enérjia eletrisidade.

#Media_MOP

Read More

KONSELLU MINISTRU APROVA ORSAMENTU DUO-DESIMÁL BA FULAN-MARSU

DILI, 04 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, Kuarta-feira ne’e partisipa iha reuniaun Konsellu Ministru ne’ebé lidera husi S. Exa, Primeiru Ministru (PM), Sr. Taur Matan Ruak, hodi aprova orsamentu duo-desimál ba fulan-Marsu nian ho valór total USD $ 116 449 057.

Projetu deliberasaun husi Governu kona-ba tetu orsamentu ba fulan-Marsu iha ámbitu rejime duo-desimál ho valór totál USD $116 449 057, ne’e aprezenta husi S. Exa, Ministra Finansa (MF) iha ezersísiu, Sra. Sara Lobo Brites.

Konsellu Ministru mós aprova projetu Dekretu-Lei ne’ebé aprezenta husi S. Exa, Sekretáriu Estadu Ambiente (SEA), Sr. Demetrio Amaral de Carvalho, kona-ba alienasaun, importasaun no produsaun saku, embalajen no objetu plástiku seluk tan. Diploma ida-ne'e buka atu prevene no reduz impaktu husi rezíduu sira ba ambiente, liuliu rezídu sira hanesan produtu plástiku ne’ebé ho utilizasaun únika. Nune'e, Dekretu-Lei prevé hodi bandu halo alienasaun, importasaun no produsaun produtu plástiku naunresiklavel no bandu atu halo akizasaun, distribuisaun, importasaun no produsaun ba objetu plástiku ruma. Diploma ida-ne'e prevé mós atu oinsá estabelese prinsípiu fundamentaá hirak tuirmai: prekausaun, prevensaun, dezenvolvimentu sustentável, seguransa ambientál globál, poluidor-pagador, reutilizasaun no resiklajen no valorizasaun enerjétika.

S. Exa, Ministra da Saude (MS) iha ezersísiu, Sra. Elia Antonio de Araujo dos Reis Amaral, aprezenta projetu Dekretu-Lei, ne’ebé Konsellu Ministrus aprova ona, kona-ba harii Servisu Nasionál Ambulánsia no Emerjénsia Médika, I.P. Projetu aktu normativu ida-ne'e buka atu hasa’e nível funsionamentu no hatán ba servisu médiku sira nian atu bele garante kuidadu urjénsia ida di'akliu ka emerjénsia médika ba territóriu nasionál tomak inklui transporte ba vítima sira ne’ebé hetan asidente ka vítima sira ne’ebé hetan moras derrepente, hodi lori lalais ba instituisaun sira ne’ebé presta kuidadu saúde apropriadu. Servisu Nasionál Ambulánsia no Emerjénsia Médika sei kria bainhira hamriik nu’udar ema koletiva públika, liuhosi institutu públiku, ne’ebé ho autónomia administrativa, finanseira no patrimoniál no liuhosi tutela no superintendénsia membru Governu responsável ba área saúde hodi bele hatán lalais liu no ho autonomia ba nesesidade koletiva sira populasaun nian.

Konsellu Ministru aprova projetu Dekretu-Lei ne’ebé aprezenta husi S. Exa, Ministru ba Asuntu Kombatente Libertasaun Nasionál iha ezersísiu, Sr. Gil da Costa Monteiro Oan Soru", kona-ba alterasaun ba Dekretu-Lei n°. 15/2008, 4 juñu nian, ne’ebé regulamenta pensaun ba kombatente no martir sira libertasaun nasionál nian. Ho alterasaun ne'e sei halo retensaun sorin balu husi pensaun ba kombatente no martir libertasaun nasionál sira nian, bainhira mosu karik opozisaun espresa ruma bainhira aplika retensaun ne'e. Montante sira ne’ebé hetan retensaun husi Estadu sei fila ba depózitu iha konta bankária titulár husi Konsellu Kombatente Libertasaun Nasionál no sira duni maka administra.

S. Exa, Ministru Administrasaun Estatal (MAE) iha ezersísiu, Sr. Abilio Jose caetano, simu plenus poderes husi Konsellu Ministrus atu halo asinatura ba Memorandu Entendimentu entre Ajénsia Kooperasaun Internasionál husi Koreia (KOICA, Korea International Cooperation Agency) Programa Nasoes Unidas ba Dezenvolvimentu (PNUD) no Governu sira husi Repúblika Indonézia no Timor-Leste. Kooperasaun institusionál ne’ebé prevé iha memorandu entendimentu ne'e permiti atu hadi'ak kondisaun hodi populasaun sira iha área remota iha munisípiu sira hanesan: Baukau, Bobonaro, Dili no Manantutu hetan asesu ba eletrisidade no bee-moos.

#Media_MOP

Read More

KM APROVA PROPOSTA DELIBERASAUN BA KONTRATU FORNESIMENTU KOMBUSTÍVEL BA SENTRÁL ELÉTRIKA HERA

DILI, 28 FEVERÉIRU 2020 : S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Sesta-feira ne'e aprezenta proposta deliberasaun ba ajudikasaun kontratu fornesimentu kombustível ba sentrál elétrika Hera lot-1, ba Konsellu Ministru (KM) lidera husi S. Exa, Priméiru Ministru (PM), Sr. Taur Matan Ruak, iha Palásiu Governu.

Dileberasaun ba kontratu nee aprova husi reuniaun Komsellu Ministru hodi garantia fornesimentu konbustível ba produsaun hodi garante fornesimentu enérjia eletrisidade ba teritóriu Timor laran tomak, esesaun Região Administrativa Especial de Oe-Cusse Ambeno (RAEOA) no Ataúro. Ho nune'e, Governu aprova ajudikasaun ba kontratu ne'e bazeia ba proposta no relatóriu tékniku husi Komisaun Nasionál Aprovizionamentu (CNA) no sei haruka ba atu hetan vistu préviu husi Kámara de Kontas tuir lei ne'ebé iha.

Iha reuniaun KM ne'e deside kompañia MATO Unip. Lda, mak sei fornese kombustível ba sentrál elétrika Hera Lot-1 hamutuk kompañia ETO, Unip. Lda.

Aliende ne'e, Konsellu Ministru mós analiza projetu dekretu Governu ne'ebé aprezenta husi S. Exa, Ministra Edukasaun, Juventude no Desportu (MEJD), Sra. Dulce de Jesus Soares, ho objetivu atu estabelese suplementu remuneratóriu ida ba ezersísiu temporáriu ba kargu diretór ou xefia sira atribuisaun ba profesór sira atu ezerse funsaun iha estabelesimentu ensiñu sekundáriu tékniku vokasionál públiku sira.

#Media_MOP

Read More

MOP PARTISIPA KONSELLU MINISTRU EXTRAORDINÁRIA LORON 27 FEVERÉIRU 2020

DILI, 27 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, Kinta-feira ne'e partisipa reuniaun Konsellu Ministru extraordinária ne'ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Iha reuniaun Konsellu Ministru ne'e aprova projetu Rezolusaun Governu, ne'ebé aprezenta husi S. Exa, Ministra Finansas iha

ezersísiu, Sra. Sara Lobo Brites, kona-ba Rejime Tarifáriu Asosiadu ba utilizasaun husi Portu Tibar no Servisu Asosiadus.

Governu mai ho forma ida ne'ebé prosede ba aprovasaun ba lista tarifas suplementares no akordu ba montante entre Estadu no konsensionáriu, no atu bele publika iha Jornál Repúblika kona-ba lista integrál husi tarifas prinsipais no suplementares, ho forma atu bele prosede kobransa ba tarifas hahú husi inísiu ba periodu iha operasaun Portu Baia Tibar.

Sra. Ministra Finansas iha ezersísiu ne'e mós aprezenta projetu Deliberasaun, aprova husi Konsellu Ministru, kona-ba Utilizasaun husi Emprestimu Konsensionál IDA 18 husi Banku Mundiál, sei utiliza iha projetu ba bee no saneamentu iha munisípiu Baukau no fortalesimentu ba Ensiñu Báziku iha Timor-Leste.

#Media_MOP 

Read More