MOP ENTREGA KARTA ASEITASAUN BA KONSULTÓR NASIONÁL NO INTERNASIONÁL BA PROJETU 17

DILI, 24 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, asiste serimonia asinatura no entrega karta aseitasaun ba empreza konsultoria nasionál no internasionál sira hodi halo dezeñu detalladu enjinaria ba projetu 17 ne’ebé sei hala’o iha teritóriu timor laran tomak.

Ministru Obras Publikas (MOP), Arq. Salvador Eugénio Soares dos Reis Pires, akompaña husi vise Ministru MOP, Eng. Nicolau Lino Freitas Belo, hasai foto hamutuk ho Diretór Jerák no Nasionál sira inklui konsultór Nasionál Internasionál sira hafoin entrega karta aseitasaun ba konsultór sira.  (24/02/2019). Foto: Media_MOP

Sr. Ministru esplika, projetu 17 ne’ebé asina ona karta aseitasaun hodi halo dezeñu detalladu ne’e tama iha pakote projetu Orsamentu Jerál Estadu 2019, ne’ebé prevé pakote ponte 10, estrada 12, inklui estudu ba rehabilitasaun habitasaun Aitarak-Laran, estudu viabilidade ba planu mestri ba Hospitál Nasionál Guidu Valadares, Hospitál António Carvalho Lahane, inklui sidade Universitáriu Aileu.

“Ida-ne’e projetu konkursu ne’ebé mak husi Orsamentu Jerál Estadu 2019 ba halo pakote ponte 10, depois trosu estrada 12, no mós estudu sira hanesan rehabilitasaun habitasaun Aitarak-Laran nian, Master Plan estudu viabilidade ba planu mestri ita-nia Hospitál Guido Valadares, depois mós Hospitál António Carvalho Lahane, inklui sidade Universitáriu Aileu. Ne’e konkursu ba projetu, nia rezultadu mak ita fó sai daudauk ne’e, importante mak ita tenke halo nia inisiasaun projetu ho di’ak, faze estudu ne’e faze ida importante para ita bele investiga risku sira ne’e depois ita metiga liuhosi ita-nia dezeñu sira ne’e ba investimentu infraestrutura ne’ebé mak ita sei presiza investe kapitál barak, entaun faze ne’e faze importante atu nune’e bele atinji kualidade husi projetu ne’e rasik,” Sr. Ministru afirma ba jornalista sira, hafoin asiste serimonia asinatura no entrega karta aseitasaun ba empreza konsultoria nasionál no internasionál sira, iha edifísiu DNEPCC, Rai-Kotu, Dili.

Sr. Ministru esplika, atu realiza projetu ita presiza halo dezenu detalladu ne’ebè di’ak tanba kustu dezenu ladi’ak ne’e karun liu duke halo investimentu ho dezenu ne’ebè mak di’ak. Ho dezenu ne’ebè di’ak bele prevene kustu adisionàl sira, tanba ne’e Governu liuhosi MOP hakarak liuhosi konkursu pùbliku ba konsultòr sira atu fornese konsultoria ba iha projetu ne’ebè mensiona.

Projetu hirak ne’ebé asina ona karta aseitasaun inklui mós projetu ba Kumoro mota ulun Manleuanna nian, tanba iha tinan 2018 laiha dezeñu inisiasaun hodi implementa, tanba ne’e iha tinan 2019 Governu tau iha planu hodi implementa.

Ministru Obras Publikas (MOP), Arq. Salvador Eugénio Soares dos Reis Pires, entrega karta aseitasasun ba konsultór Nasionál Internasionál sira.  (24/02/2019). Foto: Media_MOP

 “Projetu ne’e inklui mós Kumoro mota-ulun Manleuanna nian tanba momentu 2018 ita laiha dezeñu, inisiativa para tau insentiva, 2019 ne’e ami tau planu depois halo kedas tanba ponte ne’e ponte boot, ita tenke halo estudu profundu ba bee nia velosidade, depois rai nia estrutura, buat sira ne’e tenke liuhosi faze ida rigurozu, nune’e ita tau osan ita hatene katak ita-nia dezeñu ka konstrusaun ita halo ne’e kontekstualizadu duni ho kondisaun tereñu iha ne’eba atu nunne’e dura ba tempu naruk, benefísiu ba dezenvolvimentu sósiu ekonómiku povu nian,”Sr. Ministru esplika.

Iha diskursu Sr. Ministru agradese ba servisu makaas husi Diresaun Jerál Administrasaun no Finansas (DGAF) liuliu Diresaun Nasionál Aprovizionamentu (DNA) ne’ebé aselera prosesu tomak to’o hetan asinatura ba karta aseitasaun ho kompañia sira.

Nune’e, Sr. Ministru husu ba kompañia sira atu halo servisu ho di’ak, liuliu halo identifikasaun tereñu ho didi’ak nune’e projetu ne’e implement abele iha kualidade ne’ebé di’ak.

Iha fatin hanesan Diretòr Jeràl Administrasaun no Finansas (DGAF), Sr. Januàrio Aparicio Barbosa, hatete durante loke prosesu tenderizasaun ba projetu sira ne’e iha kompañia 48 mak kompete maibé to’o selesaun hotu iha kompañia 18 mak sai hanesan vensedór ba obra ne’ebé loke husi Diresaun Nasionál Aprovizionamentu (DNA).

Ministru Obras Publikas (MOP), Arq. Salvador Eugénio Soares dos Reis Pires, entrega karta aseitasasun ba konsultór Nasionál Internasionál sira.  (24/02/2019). Foto: Media_MOP

Diretór ne’e esplika, iha projetu ne’e iha projetu ba ponte iha 10 iha teritóriu Timor laran tomak ne’ebé fahe ba pakote rua (2), kada pakote iha projetu ba ponte 5 mak iha laran, tanba ne’e dezeñu detalladu ba ponte iha kompañia konsultór rua mak manán no kada kompaña sei halo deñu detalladu ba ponte 5.

Hafoin asina karta aseitasaun, kompañia konsultór sira sei halo banku garantia, depois mak lori ba DNA hodi asina kontratu para mobiliza ekipamentus para hahú halo estudu ba dezeñu detalladu.

Orsamentu ba projetu sira ne’e hamutuk millaun $ 9,754 ne’ebé prevé iha Orsamentu Jerál Estadu (OJE) 2019 nian.

Karta aseitasaun ne’e entrega direita husi S. Exa, Ministru MOP, Arq. Salvador Eughènio Soares dos Reis Pires, ba konsultòr nasionàl no internasionàl ne’ebè asina husi Diretòr Jeràl Administrasaun no Finansas (DGAF), Sr. Januàrio Aparicio Barbosa, ho kompañia sira.

Serimonia ne’e asiste direita husi S. Exa, Vise Ministru MOP, Eng. Nicolau Lino Freitas Belo, Prezidente IGE, Sr. Josè Luis de Carvalho, Diretòr Jeràl no Nasionàl husi MOP no ministèriu relevante, inklui diretòr kompañia sira.

#Media_MOP

Read More

PROJETU 143, GOVERNU SELU ONA 97, 45 HEIN INVESTIGASAUN HUSI MP

DILI, 24 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete esforsu Governu Konstitusionál daualu (VIII) nian ba projetu 143 ne’e mak selu ona projetu 97 ne’ebé iha kontratu no realiza konstrusaun fíziku iha tereñu.

Ba projetu 45 laiha kontratu ne’ebé Governu seidauk selu daudauk ne’e iha ona Ministériu Públiku (MP) hodi prosesa.

“Projetu 143, ami selu ona 97 projetu ne’ebé mak iha kontratu maibé bazeia ba prestasaun servisu iha tereñu, oinsá instalasaun fíziku no faktura ne’ebé sira hatama ita halo pagamentu. Agora 45 seidauk iha ne’e ita-boot sira tuir hela katak sei iha prosesu Tribunál, prokuradoria sira, sira halo hela investigasaun ba sira ne’ebé mak kontratu laiha, see Tribunál haruka selu ha’u hanoin Governu dasia sei realiza,”Sr. Ministru informa ba jornalista sira, hafoin asiste serimonia asinatura no entrega karta aseitasaun ba empreza konsultoria nasionál no internasionál sira, iha edifísiu DNEPCC, Rai-Kotu, Dili.

Sr. Ministru Obras Públikas esplika, MOP halo pagamentu ba projetu 97 tanba projetu sira ne’e iha kontratu no realizasaun servisu iha tereñu, depois kompañia sira hatama faktura ba MOP hodi halo pagamentu.

Aliened ne’e, antes Governu atu selu tékniku Obras Públikas no Ajénsia Dezenvolvimentu Nasionál (AND) halo uluk verifikasaun ba realizasaun físiku projetu nian iha tereñu, depois mak Ministru aprova hodi halo pagamentu.

Montante orsamentu ne’ebé prevé ba selu projetu 143 mak hamutuk millaun $200 resin, daudauk ne’e ezekuta ona orsamentu millaun 105 resin ba projetu 97.

Sr. Ministru afirma, ho situasaun polítika atuál karik iha mudansa Governasaun, espera katak Governu tuir mai bele realiza rekomendasaun ba projetu 45 husi MP.

#Media_MOP

Read More

ESPLIKASAUN TÉKNIKA KONA-BA IMPLEMENTASAUN PROJETU ESTRADA URBANA IHA MUNISÍPIU BAUKAU

DILI, 18 FEVERÉIRU 2020: Ministériu Obras Públikas (MOP) hakarak klarifika katak konstrusaun Estrada urbana iha munisípiu Baukau ne’ebé daudauk ne’e implementa husi kompañia Jomarjo Unip. Lda ho montante orsamentu hamutuk US $137,495.42.

Atu hatán ba preokupasaun públiku liuliu komunidade munisípiu Baukau nian katak téknikamente tipu konstrusaun ba Estrada iha tolu, hanesan tuir mai:

1. Estrada aspal ( flexible pavement )

2. Estrada concreto ( beton - rigid pavement )

3. Estrada pavimentu

Konstrusaun estrada urbana iha munisípiu Baukau ne’ebé daudauk ne’e la’o hela uza tipu konstrusaun ka sistema Estrada Konkretu (beton-rigid pavement), tanba ne’e fui ho simenti. Maske nune’e, Governu deside implementa sistema Estrada konkretu iha munisípiu Baukau tanba bazeia ba levantamentu dadus ne’ebé fornese husi tékniku Obras Públikas rejionál munisípiu Baukau nian, no haree mós ba orsamentu ne’ebé iha, hodi atende emidiata kurtu prazu nian.

Implementasaun projetu ne’e atu responde ba preokupasaun komunidade munisípiu Baukau nian relasiona ho kondisaun estrada urbana, liuliu iha Baukau vila ne’ebé kondisaun grave tebes, bainhira udan, bee sempre nalihun iha estrada klaran tanba estrada ku'ak boot-boot ne’ebé iha, tanba ne'e projetu ne’e implementa atu atende nesesidade ka preokupasaun komunidade iha kurtu prazu nia-laran.

Téknikamente konstrusaun ho sistema Estrada konkretu ne’e mós iha kualidade ne’ebé di’ak no evita bee nalihun iha Estrada klaran.

Vantajen husi konstrusaun Estrada konkretu mak hanesan:

1. Tipu konstrusaun ne'e klasifikadu ne’ebé forte no iha forsa ne’ebé aas hanesan modulus elasticidades. Modulus elasticidades signifika, númeru ne’ebé uza sai sasukat hodi determina rezisténsia kualidade estrada nian bainhira akontese deformasaun elasticidade bainhira estrada refere simu peiju liuhosi tráfiku karreta no motorizada ne’ebé ho todan pruvolta másimu 10 tonelada.

2. Impermiável bainhira bee nalihun iha estrada leten.

Durasaun kontratu ba projetu ne’e hahú husi loron 24 fulan-Outubru 2019 no sei remata iha loron 30 fulan-Abril 2020.

Polítika no programa Governu Konstitusionál daualu (VIII) nian liuhosi MOP nian ba tinan 2020 atu implementa projeu rehabilitasaun Estrada urbana hamutuk 25KM iha munisípiu Baukau vila ho kategoria Hotmiks Aspalt ka uza Aspalt maibé tanba impase polítika nune’e la konsege implementa projetu ne’e iha tinan ida-ne’e nia-laran.

#Media_MOP

Read More

GOVERNU REVOGA REZOLUSAUN GOVERNU 16/2013, REATIVA GAM

DILI, 19 FEVERÉIRU 2020: Governu liuhosi reuniaun Konsellu Ministru (KM) iha Kuarta-feira ne’e aprova revogasaun ona rezolusaun Governu númeru 16/2013, loron 10 fulan-Jullu, kona-ba bandu ba Grupu Arte Marsiál (GAM) ne’ebé aprezenta S. Exa, Primeiru Ministru (PM), Sr. Taur Matan Ruak, iha Palásiu Governu.

Diploma legal ne’e rasik instrui Polísia Nasionál Timor-Leste (PNTL) atu intensifika asaun kombate krime sira kona-ba ilísitu husi arte marsiais no rituais sira.

Iha reuniaun Konsellu Ministru ne’e mós S. Exa, Ministru Reforma Lejislativa no Asuntus Parlamentares (MRLAP), Sr. Fidelis Manueal Leite Magalhães, aprezenta inisiativa lima kona-ba lejislativa ne'ebé mak aprova husi Konsellu Ministru, Lei dahuluk husi Proposta lei ne'e refere ba Rejime Seguransa Sosiál ba Eis Titulár husi Orgaun Soberania sira iha kondisaun igualdade, valorizadu ba kareira kontributiva titulár sira husi orgaun soberania sira.

Membru Governu sira mós aprova Proposta Lei kona-ba Autorizasaun Lejislativa ne'ebé ko’alia kona-ba, Baze Jerais husi Organizasaun Administrativa Públika. Objetivu husi Intervensaun lejislativa ne'e hanesan prensimentu ba lakuna konstitusionál iha matéria organizasaun administrativa nian, ho nune'e fornese mós administrasaun públika hotu iha baze jerais no ba nia atuasaun rasik.

Konsellu Ministru mós aprova proposta Dekretu-Lei husi Organizasaun Administrasaun Direta no Indireta husi Estadu nian. Objetivu prinsipál husi intervensaun lejislativa ne’e mak atu organiza adekuadamente ba administrasaun direta no indereta iha Estadu nian rasik.

Ikus liu, S. Exa, Ministru Administrasaun Estatál (MAE) iha ezersísiu, Abílio José Caetano, aprezenta projetu Rezolusaun Governu, ne'ebé aprova husi Konsellu Ministru, kona-ba nomeasaun Filomena da Costa Nunes, ba kargu Administrdóra foun iha munisípiu Manufahi, kargu ne'ebé mamuk husi fulan-Outubru tinan 2018, no truka administradór tuan ne'ebé mate tiha ona.

#Media_MOP

Read More

ENKONTRU INTERMINISTERIÁL, ATUALIZA PROGRESU DEZENVOLVIMENTU AEROPORTU INTERNASIONÁL KUMORO

DILI, 17 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun interministeriál iha Palásiu Governu hodi atualiza progresu ba prosesu dezenvolvimentu Aeroportu Internasionál Prezidente Nicolau Lobato, Kumoro, Dili.

Reuniaun ne'e lidera husi S. Exa, Ministru Estadu Prezidénsia Konsellu Ministru (MEPCM), Dr. Agio Pereira, no partisipa mós husi S. Exa, Vise Ministra Finansas (MF), iha ezersísiu, Sra. Sara Lobo Brites, S. Exa, Ministru Transporte no Komunikasaun (MTK), Sr. José Agostinho da Silva, inklui parte husi Ministériu Negósiu Estranjeiru no Kooperasaun (MNEK).

Aliende ne’e, partisipa mós husi diretór jerál no diretór nasionál relevantes hodi atualiza servisu no informa prosesu sira ne’ebé implika ba implementasaun projetu dezenvolvimentu Aeroportu Internasionál.

#Media_MOP

Read More

MOP HETAN INTERVISTA HUSI ALUMNI BOLSU ESTUDU BA AUSTRÁLIA

DILI, 14 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hetan intervista husi alumni Bolsu Estudu ba Austrália, iha edifísiu MOP, Kaikoli, Dili.

Iha intervista ne’e husu liu kona-ba esperiénsia Sr. Ministru nian hanesan mós benefisiáriu ba bolsu estudu ba Austrália, tanba ne’e Sr. Ministru husu atu bolseiru sira ne’ebé daudauk ne’e kontinua hela estudu atu aproveita didi’ak oportunidade ne’e hodi estuda no aprende di’ak liután, nune’e bainhira remata estudu bele fila mai kontribui ba dezenvolvimentu Timor-Leste nian.

Intervistadór sira hanesan alumni husi bolsu estudu ba Austrália, no intervista ne’e ho objetivu atu promove oportunidade bolsu estudu ba Austrália nune’e Timoroan liuliu estudante sira bele iha interese liután hodi konkore iha bolsu estudu ba Austrália.

Intervista ne’e sei públika liuhosi sítiu sira Australia Awards Scholarship Timor-Leste nian, hodi dada interese husi estudante timoroan sira nian, liuliu estudante sira ne’ebé iha área rural hodi kompete mós iha kompetisaun ba bolsu estudu Austrália nian.

#Media_MOP

Read More

KONSELLU MINISTRU APROVA ESTATUTU ADMINISTRASAUN NO AUTORIDADE MUNISIPÁL BA DESENTRALIZASAUN ADMINISTRATIVA

DILI, 12 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne’e partisipa iha reuniaun Konsellu Ministru (KM) ne’ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Iha reuniaun Konsellu Ministru ne’e aprova projetu husi Dekretu-Governu rua relasiona ho prosesu desentralizasaun administrative, ne'ebé aprezenta husi S. Exa, Ministru Administrasaun Estatál (MAE) iha ezersísiu, Abilio José Caetano, Projetu husi Dekretu-Lei dahuluk nian, ne'ebé hetan aprovasaun husi Konsellu Ministru, kona-ba alterasaun daruak husi Dekretu-Lei n.03/2006 loron 16 fulan-marsu, ne'ebé aprova Estatutu husi Administrasaun Munisipais, no husi Autoridades Munisipais no Grupu Tékniku Interministérial ba Desentralizasaun Administrativa.

Ho Alterasaun ne'ebé sei asume konjuntu husi medidas konkretas ba konkretizasaun husi prosesu dekonsentrasaun no desentralizasaun administrativa, partikularmente haree ba kriasaun no estabelesimentu husi podér lokál autarkia, dezignadamente ba revizaun husi kuadru jurídiku husi organizasaun no funsionamentu husi Autoridade Munisipais no husi Administrasaun Munisipais.

Projetu lejislativu daruka nian ne’ebé mak refere ba Kriasaun Portál Munisipal no respetivu rejime jurídiku no funsionamentu no jestaun. Portál Munisipál viza disponibilizasaun públika husi informasaun munisipál, no forma ida-ne'e atu apoia iha progresu no dezenvolvimentu munisipál iha termu sosiais, ekonómiku, infraestrutura no kulturais. Portál ne’e konstitui mós hanesan instrumentu sentrál atu rekolla informasaun ho forma koerente, sentralizada no transparente kona-ba munisípiu ida-ida ba produsaun husi informasaun estatétika iha área oioin, hanesan edukasaun, saúde, seguransa alimentár, obras públika no transporte, bee no saneamentu báziku no ambiente, agrikultura, jestaun ba merkadu no turizmu, asaun sosiál, protesaun sivíl, jestaun ba dezastre naturais, rejistu notariadu no servisu kadastrais no apoiu ba organizasaun non governamentál no oraganizasaun komunitarias sira.

Konsellu Ministru aprova mós proposta Deliberasaun, ne'ebé aprezenta husi S. Exa, Ministra Edukasaun, Juventude no Desportu (MEJD), Sra. Dulce de Jesus Soares, no S. Exa, Sekretáriu Estadu Juventude no Desportu (SEJD), Sr. Nelio Isaac, kona-ba autorizasaun orsamentál ho valór USD 511.250 ba organizasaun konferénsia Ministros Juventudi no Desportu no mós XII Jogos Desportiva CPLP, hanesan eventu multidesportivu ba atleta sira ho idade-16 no mós hanesan resprezenta husi nasaun Komunidade Lingua Portugueza. No aprezenta mós ba Konsellu Mininistru múzika ofisiál husi Eventu ne’e rasik ne'ebé mak sei hananu husi artista nasionál Maria Vitória no Gerson de Oliveira.

#Media_MOP

Read More

ANTISIPA VIRUS KORONA, KOMPAÑIA SIRA IHA PORTU TIBAR KARATINA TRABALHADÓR SIRA FILA HUSI ESTRANJÉIRU

DILI, 04 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete Governu Timor-Leste halo esforsu makaas kontra virus Korona tanba ne'e kompañia kontratór no konsultór iha Portu Baia Tibar daudauk ne'e prepara ona klínika hodi karantina traballadór sira ne'ebé fila husi estranjeiru liuliu husi Xina durante loron 14, hafoin karantina mak traballadór sira kontinua servisu konstrusaun Portu Baia Tibar.

"Kompañia sira ne'e rasik, sira iha manéira rasik oinsá para atende ida-ne'e, iha portu Tibar, see ha'u la sala sira estabelese klínika, sira-nia staff sira ne'ebé mak foin fila husi fetias sira karantina, sira observa kuandu loos ona sira foin kontinua servisu,"Sr. Ministru Obras Públikas informa ba jornalista sira iha Parlamentu Nasionál (PN) hafoin debate kona-ba atendimentu no prevensaun inundasaun iha kapitál Dili ho deputadu sira iha PN, iha loron 04 Feveréiru 2020.

Traballador Xinesa ne'ebé pasa ferias iha sira-nia rai, bainhira fila mai sei la direita mai Timor-Leste maibé liuhosi (vou) aeroportu sira iha nasaun viziñu sira hanesa Bali-Indonézia no Darwin-Austrália, inklui Singapura, bainhira tránzitu iha aroportu, sira sempre iha sistema screening (pasa revista ho materiál saúde) hodi antisipa ka cek virus korona.

Tanba ne'e, Timor-Leste mós fó atensaun makaas ba virus Korona tanba virus ne'e virus mundiál ne'ebé fó ameasa ba ema barak nia vida.

Maske nune'e, Sr. Ministru hatete, bainhira Governu foti ona medidas hodi halo prevensaun, setór hotu iha konstrusaun sivíl tenke kumpri.

"Kazu Korona nee kazu globál, bainhira Governu foti medidas halo prevensaun, ita hotu-hotu, iha parte setór sira iha konstrusaun sivíl ita tenke tuir, ne'e konsekuénsia ida justifikadu, ita bele dehan dezastre ne'ebé akontese iha mundu ne'ebé lori ameada ba ema nia vida, ba populasaun sira. Prevensaun ne'e nesesáriu husi ministériu relevante sira hanesan Ministériu Saúde no Ministériu Negósiu Estranjeiru no Kooperasaun, Ministru Obras Públukas pontu para koopera de'it see bandu sidadaun sira labele tama ita labele kontra fali ida-ne'e tanba siguransa saúde ba ita-nia populasaun sira-nian ne'e importante,"Sr. Ministru esplika.

Antes ne'e, S. Exa, Ministru Negósiu Estranjeiru no Kooperasaun (MNEK), Sr. Dionisio Babo, deklara katak, Governu Timor-Leste seidauk iha deklaradaun ofisiál ida hodi bandu sidadaun Xinesa tama Timor-Leste, no husu Xinesa sira tama Timor tenke kumpri medida ne'ebé parte saúde no imigrasaun hola ona.

#Media_MOP

Read More

MOP ENKONTRU HO KOMISAUN C, RESPONDE KONTA JERÁL 2018

DILI, 05 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, enkontru ho komisaun C Parlamentu Nasionál (PN) ne'ebé trata asuntu Finansas Públikas hodi responte konta jerál estadu 2018.

Dsikusaun ne'e, Sr. Ministru responde kona-ba ezekusaun OJE 2018 no dívidas finanséira no naun finanséira iha tinan fiskál 2018 nian.

Komisaun C halo diskusaun ho ministériu sira atu responde ba komisaun C antes lori konta jerál estadu 2018 nian ba plenária PN hodi halo apresiasaun.

Dikusaun ne'e partisia mós husi S. Exa, Ministru Justisa (MJ), Sr. Manuel Carseres, S. Exa, Sekretáriu Estadu Teras no Propriedade (SETP), Sr. Mario Ximenes, Segundu Komandante Jerál PNTL, Komisáriu, Mateus Fernandes, no reprezentante husi Ministru Estadu Prezidénsia Konsellu Ministru.

#Media_MOP

Read More

KONSELLU MINISTRU APROVA ALTERASAUN DAHULUK BA PROJETU DILI-AINARU NO AIPELU-BAZARTETE

DILI, 05 FEVERÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, aprezenta projetu deliberasaun iha reuniaun Konsellu Ministru ne'ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu.

Projetu deliberasaun ne'e hetan aprovasaun husi Konsellu Ministru kona-ba alterasaun dahuluk husi kontratu Empreitada n.o ICB/099/MOPTC-2016 ho empreza Shanghai Cosntruction Group.Co.Ltd ba projetu no atu hasa'e kualidade ba manutensaun rodovária, Díli-Ainaru: C16/17. Pakote 1. Aipelu-Bazartete, ho montante USD 5083690,14 husi loron 29 fulan-dezembru tinan 2017.

Iha reuniaun ne'e Konsellu Ministru asisti aprezentasatun husi S. Exa, Ministru Reforma Lejislativa no Asuntus Parlamentares (MRLAP), Sr. Fidelis Manuel LeiteMagalhães, kona-ba Rezolusuan Governu, kona-ba Programa husi Reforma Administrasaun Públika. Programa ida-ne'e aprezenta konjuntu reforma administrativa atu reforsa jestaun no hasa'e kualidade husi funsionamentu husi Ministériu sira no Ajénsia sira husi Governu Sentrál nian.

Konsellu Ministru asiste aprezentasaun kona-ba Proposta Lei ne'ebé aprezenta husi Ministru Reforma Lejislativa no Asuntus Parlamentar, kona-ba Seguransa Sosiál ba Titulár sira husi Orgaun Soberania nian.

Rejime legál ida-ne'e atu promove ezersísu direitu Seguransa Sosiál iha kondisaun husi igualdade, valoriza ba kareira konstrutiva husi titulár órgaun soberania sira.

Rejime Jurídiku husi Konsellu Ministrus mós asisté aprezentasaun husi S. Exa, Ministru Reforma Lejizlativa no Asuntus Parlamentares, Sr. Fidelis Manuel Leite Magalhães, kona-ba Proposta Lei Autorizasaun Lejislativa Baze jerais ba Organizasaun husi Administrasaun Públika.

S. Exa, Ministra Finansas iha ezersísiu, Sra. Sara Lobo Brites, aprezenta projetu aprovasaun husi Konsellu Ministru kona-ba tetu orsamentál ba fulan-fevereiru iha ámbitu rejime duodesimál. Montante totál despeza ba saláriu no vensimentu USD 17.852.076. ba bens no servisu USD 38.614.980. ba transferênsia públika USD 26.591.048 no kapital dezenvolvimentu USD 33 390 953. ho total USD 116.449.057.

Konsellu Ministru mós aprova Projetu Deliberasaun ne'ebé aprezenta husi S. Exa, Ministru Justisa (MJ), Sr. Manuel Carceres da Costa, kona-ba atribuisaun rezidénsia ba eis titulár husi órgaun soberania Eis Prezidente Repúblika no Eis Primeiru-Ministru Kay Rala Xanana Gusmão, Eis Primeiru Ministru Mari Bim Amude Alkatiri no Eis Prezidente Parlamentu Nasionál, Vicente da Silva Guterres.

Konsellu Ministru aprova proposta Dekretu Lei ne'ebé aprezenta husi S. Exa, Ministru ba Asuntu Kombatentes Libertasaun Nasionál iha ezersísiu, Sr. Gil da Costa Monteiru Oan Soru, ne ebé mai ho aprovasaun ba alterasaun da-6 ba Dekretu-Lei n.°15/2008, loron 4 fulan-juñu ne'ebé mak regula pensaun husi kombatentes no martires husi libertasaun nasionál sira menus kazu balun ne'ebé iha opozisaun espresa ne'ebé nia retensaun realiza ona. Ho montante

sira ne'ebé hasai husi Estadu destina ona ba konta bankária ne'ebé titula husi Konsellu Komabtentes Nasionál Libertasaun Nasionál no administradus.

Ikusliu, S. Exa, Ministru Negósiu Estranjeiru no Kooperasaun (MNEK), Sr. ionísio Babo Soares, aprezenta Projetu Rezolusuan Governu ne'ebe hetan aprovasaun husi Konsellu Ministru, kona-ba Rezolusaun Governu nian atu regula aplikasaun no ezekusaun ba medida temporária sira kona-ba interdisaun no restrisaun ba entrada iha territóriu nasionál ba sidadaun estranjeiru sira ne'ebé mai husi Repúblika Populár Xina nian, tanba risku kona-ba moras Coronavírus 2019-nCoV. ne'ebé mak hada'et lais tebetebes.

Liuhusi Rezolusaun ida-nee Aplika medida

interdisaun nian atu tama iha territóriu nasionál ba sidadaun sira husi rai-li'ur ne'ebé iha semana haat ikus ne'e sai husi ka liuhosi Provínsia Hubei, Repúblika Populár Xina no mós medida restritiva nian atu tama iha territóriu nasionál ba sidadaun sira husi rai-liur ne'ebé iha semana haat ikus ne'e sai husi ka liuhosi Repúblika Populár Xina, no bele autoriza atu tama iha territóriu nasionál liuhosi aprezentasaun relatóriu médiku nian, ho fotografia ne'ebé fó sai husi instituisaun ospitalár ne'ebé rekoñesidu internasionálmente.

Medida interdisaun no restrisaun sira ba sidadaun sira husi rai-liur ne'ebé mai husi Repúblika Populár Xina nian atu tama iha Timor-Leste, ne'ebé define tuir rezolusaun ida-ne'e, sei haree fila-fali semana rua

dala ida, ho objetivu atu deside kona-ba ninia manutensaun ka eliminasaun.

Ho abrigu Rezolusaun ida-ne'e Ministra Saúde iha ezersisiu atu fó orden ba servisu kompetente Ministériu Saúde nian, iha koordenasaun ho liña ministeriál relevante sira, atu atua tuir protokolu sira ne'ebé mak estabelese ona husi Organizasaun Mundiál Saúde. Fó mós mandatu ba Ministru Negósius Estranjeirus no Kooperasaun atu garante nafatin komunikasaun diplomátika ho autoridade sira husi Repúblika Populár Xina nian hanesan manifestasaun solidariedade nian ba Governu no Povu Repúblika Populár Xina nian haree ba relasaun klean kooperasaun no amizade nian entre povu rua ne'e no ninia kontinuasaun no atu fó orden ba misaun diplomátika sira atu estabelese komunikasaun adekuada ho autoridade sira husi nasaun viziñu sira kona-ba medida restritiva sira ne ebé prevé iha rezolusaun ida-ne'e.

#Media_MOP

Read More

GOVERNU DEBATE HO PN KONA-BA REZOLVE PROBLEMA INUNDASAUN IHA KAPITÁL DILI

DILI, 04 FEVEREIRU 2020: Governu liuhosi S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi S. Exa, vise Ministru MOP, Eng. Nicolau Lino Freitas Belo, Diretór Jerál no Diretór Nasionál sira realiza debate ho deputadu sira iha Parlamentu Nasionál (PN) kona-ba atendimentu no solusaun ba inundasaun iha kapitál Dili, inklui iha Timor laran tomak.

Problema inundasaun ne'ebé akontese iha kapitál Dili no munisípiu sira, Governu liuhosi diresaun sira preparadu hodi atende situasaun emerjénsia no normaliza drenajen.

Ministériu Obras Públikas kontinua halo servisu interministeriál hodi atende situasaun emerjénsia sira.

MOP liuhosi Institutu Jestaun Ekipamentus (IGE) inklui diresaun seluk kontinua preparadu hodi halo normalizasaun bainhira iha inundasaun no rai-monu.

Durante debate, deputadu sira preokupa liu kona-ba esforsu Governu nian oinsá mak labele hamosu inundasaun ba komunidade sira.

Debate ne'e partisipa mós husi S. Exa, vise Ministra Solidariedade Sosiál no Inkluzaun (MSSI), Sra. Signi Verdiál, S. Exa, Sekretáriu Estadu Protesaun Sivíl (SEPS), Sr. Alexandrinho Xavier Araujo, no S. Exa, Sekretáriu Estadu Meiu Ambiente (SEMA), Sr. Deometrio Amaral.

#Media_MOP

Read More

PMU PORTU TIBAR APREZENTA PROGRESU KONSTRUSAUN PORTU TIBAR BA KAFI

DILI, 31 JANÉIRO 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, asiste aprezentasaun husi Unidade Manajementu Projetu (PMU) Portu Baia Tibar aprezenta progresu konstrusaun Portu Baia Tibar ba Konsellu Administrasaun Fundu Infraestrutura (KAFI).

Progresu konstrusaun ne’e aprezenta direita husi Manajer projetu PMU Portu Baia Tibar, Sr. Rui Soares, ba KAFI iha edifísiu Ministériu Finansas.

Manajer Projetu Portu Baia Tibar informa katak, konstrusaun Portu Baia Tibar daudauk ne’e atinji ona pursentu 20 (20%). Aliende ne’e aprezenta mós problema no servisu ne’ebé daudauk ne’e halo hela iha Portu Baia Tibar.

Reuniaun KAFI ne’e lidera husi Prezidente KAFI, S. Exa, Ministru Estadu Prezidénsia Konsellu Ministru (MEPCM), no Ministru Planeamentu Investimentu Estratéjiku (MPIE) interinu, Sr. Agio Pereira, ho membru KAFI hanesan, S. Exa, Ministru MOP, Arq. Salvador Eugénio Soares dos Reis Pires, S. Exa, Ministru Transporte no Komunikasaun (MTK), Sr. José Agostinho da Silva, no S. Exa, Vise Ministra Finansas (MF), Sra. Sara Lobo Brites.

#Media_MOP

Read More

KAFI AVALIA EZEKUSAUN ORSAMENTU FI 2019 NO DUODÉSIMU 2020

DILI, 31 JANÍERU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Administrasaun Fundu Infraestrutura (KAFI) hodi halo avaliasaun ba ezekusaun orsamentu Fundu Infraestrutura (FI) 2019 no ezekusaun orsamentu duodésimu 2020 iha edifísiu Ministériu Finansas.

Iha reuniaun ne’e partisipa mós husi S. Exa, Sekretáriu Estadu Juventude no Desportu (SEJD), Sr. Nelio Issac Sarmento, hodi aprezenta kona-ba preparasaun ba jogu CPLP ne’ebé sei hala’o iha tinan ida-ne’e, liuliu kona-ba konstrusaun estadiu munisipál Dili, ne’ebé to’o oras ne’e seidauk finaliza hodi fasilita jogu CPLP. Nune’e, KAFI aprova loke tendersizasaun foun hodi finaliza konstrusaun liuliu assesores iha estadiu munisipál Dili nian.

Reuniaun KAFI ne’e lidera husi Prezidente KAFI, S. Exa, Ministru Estadu Prezidénsia Konsellu Ministru (MEPCM), no Ministru Planeamentu Investimentu Estratéjiku (MPIE) interinu, Sr. Agio Pereira, ho membru KAFI hanesan, S. Exa, Ministru MOP, Arq. Salvador Eugénio Soares dos Reis Pires, S. Exa, Ministru Transporte no Komunikasaun (MTK), Sr. José Agostinho da Silva, no S. Exa, Vise Ministra Finansas (MF), Sra. Sara Lobo Brites.

#Media_MOP

Read More

MOP PARTISIPA REUNIAUN KONSELLU MINISTRU LORON 29 JANÉIRU 2020

DILI, 29 JANÉIRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne'e partisipa iha reuniaun Konsellu Ministru lideradu S. Exa, Primeiru Ministru (PM), Sr. Taur Matan Ruak, iha Palásiu Governu.

Iha reuniaun Konsellu Ministru ne'e aprova proposta Rezolusuan Governu ne'ebé aprezenta husi S. Exa, Sekretária Estadu ba Igualdade no Inkluzaun, Sra. Maria José Fonseca Monteiro de Jesus, kona-ba implementasaun Programa "inisiativa

spotlight ba eliminasaun violénsia kontra feto no labarik" ( Spotlight initiative to eliminate violence against women and girls Timor-Leste's country Program"). Inisiativa husi Spotlight ne'e hanesan inisiativa ne'ebé lansa husi União Eropeia no Nasoins Unidas ho objetivu atu elimina forma hotu-hotu violénsia kontra feto no labarik feto iha mundu tomak.

Inisiativa atu koloka tema ba violénsia hanesan sentru husi esforsu globál husi igualdade jenéru no empoderamentu ba feto sira. Programa ne'e sei implementa iha Timor-Leste iha asaun konjunta entre Governu, sosiedade sivíl, Uniaun Europeia no Nasoins Unidas.

Konsellu Ministru aprova proposta Deliberasaun ne'ebé mak aprezenta husi S. Exa, Ministru Reforma Lejislativa no Asuntus Parlamentares, Sr. Fidelis Manuel Leite Magalhães, kona-ba alterasaun akordu husi subvensaun no implementasaun entre Milenium Compact Challange no Governu Repúblika Demokrátika Timor-Leste ba dezenvolvimentu no fasilitasaun husi implementasaun husi Milenium Compact Challange (MCC). Programa ida ne'e espesifikamente hodi responde ba dezafius ekonómiku iha nasaun, konforme identifikadu konjuntamente husi Timor-Leste no husi Timor-Leste no MCC hodi kombate kiak no hasa'e kresimentu ekonómiku nasionál ho bee-moos, saneamentu no drenajen, edukasaun, nutrisaun no rezolusaun ba disputa komersiais.

S. Exa, Ministru Ensinu Supcrior, Siensia no Kultura, Sr. Lounguinhos dos Santos, aprezenta projetu Dekretu-Lei, ne'ebé aprova husi Konsellu Ministru, kona-ba regulamenta Fundu Dezenvolvimentu iha Kapital Umanu. Dekretu-Lei ne'e hodi altera kompozisaun husi Konsellu Administrasaun, iha sentidu atu inklui Ministèriu Ensinu Superiór, Siénsia no Kulturu, atu regula orgánika no funsionamentu ba orgaun ne'e ho apoiu no estabelese regras no kritériu ba programa sira, projetu ou atividade sira ne ebé bele finansiadu husi fundu.

Konsellu Ministru aprova Rezulusaun Governu, aprezenta husi S. Exa, Ministru Negósiu Estranjeiru no Kooperasaun, Sr. Dionisio Babo Soares, ne'ebé define konjuntu medida ida ba prevensaun no kontrolu ba surtu husi Coronavirus 2019-nCoV iha Timor-Leste no protesaun ba komunidade timoroan ne'ebé mak hela iha sidade Wuhan. Provinsia Hubei, iha Republika Popular Xina.

Ho Rezolusaun Governu ida-ne'e, sei airibui osan atu apoiu ba despeza no ba ekuipamentu no roupa no atu adekua fatin espesífiku (fatin karantina) hodi halo diagnóstiku hodi prepara atu hasoru ba cazu eventuais balun, ba prevensaun no kontrolu risku daet husi Corona virus 2019- nCoV iha teritóriu nasionál, no hodi suporta despezas no hasai sidadaun timoroan ne'ebé mak hela iha zona krítikas iha provinsia Xina ne'ebé afeta no atu desloka ba fatin seluk hanesan Pequim no Sanghai, no ba fatin seluk.

Ministra Saúde iha ezersísiu fó instrusaun ona ba servisu husi aprovizionamentu ba akizisaun ekipamentu urgente hanesan mediasaun temperatura korporal (equipamentu ne'ebé bele koko temperatura isin manás) no ekipamentus ba protesaun individuál, ba reforsu husi kontrolu no identifikasaun husi kazu suspeitu iha postu pasajen husi fronteira.

Rezulusaun Govermu aprova ona refere mós perante kazu suspeitu ne'ebé kona virus ida-ne'e, no sei asegura ezisténsia husi área restritas husi izolamentu iha portu fronteira, no sei prepara haris fatin, mobiliáriu, bee no hahan ne'ebé mak nia kualidade dura iha tempu naruk, no mós sei halo ativasaun ba postu fronteira to'o Hospitál.

S. Exa, Ministru Petróleu no Minerais iha Ezersisiu. Sr. Agio Pereira, no Prezidente Autoridade Nasionál aprezenta proposta Rezolusaun Govemu ne'ebé aprova husi Konsellu Ministru, kona-ba alargamentu husi área Bloku A no Bloku C onshore, no altera parsialmente kona-ba Rezolusaun Governu n° 2 39/2016. loron 23 fulan-novembru.

Rezolusaun Governu ida-ne'e aprova hodi fó dalan ba dezenvolviementu no esplorasaun iha área ne'ebé besik malu hanesan Bloku A no C, ne'ebé identifika ona indisius ezisténsia husi formasaun jeolójika ho potensiál dezenvolvimentu no esplorasaun.

Ikus liu, S. Exa, Ministru Defeza, Sr. Filomeno Paixão de Jesus, simu poder tomak atu realiza asinatura Memorandu Entendimentu no Akordu entre Ministériu Defeza Timor-Leste no Xina ba dezenvolvimentu no fortalesimentu relasaun husi kooperasaun entre nasaun rua ne'e iha domíniu Defeza nian, otimizandu ba uzu, ba sustentabilidade no dezenvolvimentu husi kapasidade nasaun rua ne'e nian.

Konforme Memorandu ida-ne'e sei realiza truka delagasaun defeza no militar, kooperasaun iha formasaun no ezersísiu militár no kooperasaun iha saúde militár. Akordu entre Ministériu Defeza husi nasaun rua ne'e, viza ba fornesimentu ba asisténsia militár gratuita husi Xina ba Timor-Leste, ba fornesimentu ekipamentus ba forsa armadas nasionais, inklui protesaun, arma lijeiras, veikulu sira no transimissores atu halo transmisaun.

#Media_MOP

Read More