DILI, 04 DEZEMBRU 2019: S. Exa, Ministru Obras Públikas (MOP), Arq. Salvador
Eugénio Soares dos Reis Pires, partisipa iha reuniaun ne’ebé konvoka husi S.
Exa, Primeiru Ministru (PM), Sr. Taur Matan Ruak, iha Palásiu Governu, Dili,
hodi deskuti no halo reformulasaun ba proposra foun Orsamentu Jerál Estadu ba
2020 nian, ne’ebé Xefe Gpvernu retira ona husi Parlamentu Nasionál (PN).
Iha enkontru ne’e, kria ona ekipa traballu ida ba revizaun Orsamentu, ne’ebé
lidera husi S. Exa, Ministru Estadu no Prezidénsia
Konsellu Ministru (MEPCM), Sr. Agio Pereira, servisu hamutuk ho S. Exa Ministra
Finansas Interina, Sra. Sara Lobo, S. Exa, Ministra Edukasaun, Juventude no
Desportu (MEJD), Sra. Dulce de Jesus Soares, no S. Exa, Ministru Transporte no
Komunikasaun (MTK), Sr. José Agustinho da Silva, atu hahú servisu nesesáriu
hotu-hotu ba preparasaun reformulasaun orsamentu foun tuir rekomendasaun sira
Parlamentu Nasionál nian.
Bainhira reformulasaun hotu, ekipa traballu sei aprezenta ba Konsellu
Ministru hodi hetan aprovasaun ba tetu finál, molok submete hikas ba Parlamentu
Nasionál iha loron 13 fulan-Dezembru 2019.
Entretantu Xefe Ezekutivu deside dada fila Proposta OJE 2020 ho montante dollar
amerikanu billaun 1.950, husi Parlamentu Nasionál iha loron-tersa, 03
fulan-Dezembru, nu'udar konsiderasaun ba preokupasaun no sujestaun deputadu
sira-nian tantu husi apoiu Governu no opozisaun sira inklui pareser husi
Komisaun C Parlamentu Nasionál nian, kona-ba montante orsamentu ne’e rasik no
nia estrutura sira.
#Media_MOP
